پرەزيدەنت كۋبوگى: قازاقستان تەننيسشىلەرى جەڭىمپاز اتاندى

استانادا تەننيستەن پرەزيدەنت كۋبوگى ءۇشىن ءوتىپ جاتقان ITF W15 جارىسىندا اسىلجان ارىستانبەكوۆا مەن ىڭكار دۇيسەباي جۇپتىق سىندا جەڭىمپاز اتاندى، دەپ حابارلادى قازاقستان تەننيس فەدەراتسياسى.

ىڭكار دۇيسەباي مەن اسىلجان ارىستانبەكوۆا فينالدا رەسەيلىك ەكاتەرينا حايرۋتدينوۆا مەن بەلارۋس وكىلى اننا كۋبارەۆامەن ويناپ، جەڭىسكە جەتتى.

ءبىرىنشى پارتيادا رەسەي مەن بەلارۋس جۇبى تاي-برەيكتە 7:6 (7:4) ەسەبىمەن جەڭدى.

ەكىنشى سەتتە اسىلجان ارىستانبەكوۆا مەن ىڭكار دۇيسەباي 6:4 ەسەبىمەن ەسە قايتاردى. سودان كەيىن سۋپەر تاي-برەيكتە 10:3 ەسەبىمەن باسىم ءتۇستى.

وسىلايشا، ا.ارىستانبەكوۆا مەن ءى.دۇيسەباي جۇپتىق سىندا جەڭىمپاز اتاندى.

ارۋجان ساعىندىقوۆا جەكەلەي سىندا جارتىلاي فينالدا الەمنىڭ 739-راكەتكاسى، رەسەيلىك ەددا مامەدوۆادان 2:6، 3:6 ەسەبىمەن جەڭىلدى.