ۇلبوسىن ءادىلوۆا — XII دۇنيەجۇزىلىك ويىندارىنىڭ چەمپيونى!

قىتايدىڭ چەندۋ قالاسىندا XII دۇنيەجۇزىلىك ويىندارىنداعى جاۋىنگەرلىك سامبودان جەكپە-جەكتەر اياقتالدى.

بۇل سىندا قازاقستان قورجىنىنا 1 التىن، 3 كۇمىس مەدال ءتۇستى. جالقى التىن جۇلدەنى 80 كەلىدە كۇش سىناسقان ۇلبوسىن ءادىلوۆا جەڭىپ الدى. ول فينالدا 2024 جىلعى الەم چەمپيوناتىنىڭ كۇمىس جۇلدەگەرى ماۆلۋدا ابدۋللاەۆاعا قىلقىندىرۋ ءادىسىن قولدانىپ، جەڭىسكە جەتتى.

ۇلبوسىن ءادىلوۆا ½ فينالدا فيليپپيندىك ياپ ەيسەلين اگنەستى 2:0، ¼ فينالدا مەكسيكالىق نەنسي ەرناندەستى تازا جەڭدى.

بۇل — دۇنيەجۇزىلىك ويىندارىنىڭ ەكىنشى التىن مەدالى. بۇعان دەيىن دجيۋ-دجيتسۋدان فايتينگ ءبولىمى بويىنشا جانىبەك ءابۋ-باكىر چەمپيون اتانعان بولاتىن.

ماراتبەك راحمەتوللين كۇمىس مەدال الدى

جاۋىنگەرلىك سامبودان ماراتبەك راحمەتوللين دە كۇمىس مەدال يەسى اتاندى. ول 64 كەلىدە 7 دۇركىن الەم چەمپيونى، بەيتاراپ سپورتشى شەيح- مانسۋر حابيبۋللاعا ەسە جىبەرىپ، كۇمىس جۇلدەنى قاناعات تۇتتى.

وتانداسىمىز جارتىلاي فينالدا ازۋلى قارسىلاسى ساياق باراكانوۆ  4:2 ەسەبىمەن، شيرەك فينالدا لۋكاس بورەگالەستى اۋىرتۋ ادىسىمەن جەڭدى.

سونىمەن بىرگە، قازاقستاننىڭ ەرلەر قۇراماسى مەن ايەلدەر قۇراما كومانداسى XII دۇنيەجۇزىلىك ويىندارىنىڭ كۇمىس جۇلدەگەرى اتاندى.

قازاقستان ەرلەر قۇراماسى فينالدا ۋكراينا سپورتشىلارىنا 0:2 ەسەبىمەن جەڭىلدى. ال، ايەلدەر قۇراماسى فينالدا وزبەكستانعا 0:3 ەسەبىمەن ەسە جىبەردى. وسىلايشا، قازاقستان سپورتشىلارى 32 جىلدان كەيىن دۇنيەجۇزىلىك ويىندار باعدارلاماسىنا قايتا ەنگەن جاۋىنگەرلىك سامبودان جەكپە-جەكتەردى 1 التىن، 3 كۇمىس مەدالمەن اياقتادى.

بۇل سپورت ءتۇرى 1993 جىلدان كەيىن دۇنيەجۇزىلىك ويىنداردىڭ باعدارلاماسىنا قايتا ەنگىزىلدى.

دۇنيەجۇزىلىك ويىندارىنىڭ تاريحىندا وتانداستارىمىز 1993 جىلى 1 التىن، 1 كۇمىس، 1 قولا مەدال جەڭىپ العان بولاتىن.

Cپورتتىق قۇزعا ورمەلەۋدەن ريشاد حايبۋللين قولا جۇلدەگەر اتاندى

Cپورتتىق قۇزعا ورمەلەۋدەن جىلدامدىق (Speed 4) سايىسىندا ريشاد حايبۋللين قولا مەدال الدى.

دۇنيەجۇزىلىك ويىندارىنىڭ باعدارلاماسىنا ەنگىزىلگەن سپورتتىق قۇزعا ورمەلەۋدەن وتانداستارىمىز العاش رەت جۇلدەگەرلەر قاتارىنا ەندى.

بۇعان دەيىن 2022 جىلى اقش-تىڭ بيرمەنگەم قالاسىندا وتكەن دۇنيەجۇزىلىك ويىندارىندا جىلدامدىق سايىسى بويىنشا التىنشى ورىندى يەلەنگەن ەدى.

ەندى ەرتەڭ ريشاد حايبۋللين، ءامىر مايمۇراتوۆ، دامير توقتاروۆ، بەكنۇر التىنبەكوۆ باستاعان قازاقستاندىق سپورتشىلار كوماندالىق ەستافەتادا سىنعا تۇسەدى.

قازىرگە دەيىن قازاقستان قۇراماسى 2 التىن، 5 كۇمىس، 3 قولا مەدال الدى.

داستان كەنجالين،

استانا