SportPress.kz قازاقستان سپورت جاڭالىقتارى
قازاقستان تەننيس فەدەراتسياسى مەن Sport+ مەديا توبى اقپاراتتىق ارىپتەستىك جونىندەگى مەموراندۋم جاساستى. قۇجاتقا قتف ۆيتسە-پرەزيدەنتى دياس دوسقاراەۆ پەن مەديا توپتىڭ باس ديرەكتورى ولجاس ابراەۆ قول قويدى.
مەديا توبىنىڭ قىزمەتكەرلەرى تەننيس الەمىندەگى جاڭالىقتار عانا ەمەس، قازاقستان قۇراماسى ويىنشىلارى مەن بولاشاعىنان ءۇمىت كۇتتىرەتىن جاستاردىڭ تابىستارى تۋرالى اڭگىمەلەپ، فەدەراتسيانىڭ تەننيستىك جانە الەۋمەتتىك باستامالارىن تۇراقتى تۇردە جاريالاپ وتىرادى.
«مەن Sport+ تەلەكانالى ۇجىمى مەن ولجاس ابراەۆتىڭ جەكە وزىنە ءبىزدىڭ ەلدەگى تەننيستى جاريا ەتۋدەگى باستامالارى ءۇشىن العىسىمدى ايتقىم كەلەدى. بۇل ءبىزدىڭ العاشقى بىرلەسكەن ءىس-قيمىلىمىز، ونىڭ اياسىن باق ارقىلى تەننيس، سپورتشىلارىمىزدىڭ ءومىرى مەن جەتىستىكتەرى تۋرالى كوبىرەك اقپارات بەرىپ، كەڭەيتكىمىز كەلەدى. سپورت تەلەكانالىمەن وسىنداي قارىم-قاتىناس ورناتۋعا رەسمي مۇمكىندىك العانىمىزعا قۋانىشتىمىز»، — دەدى دياس دوسقاراەۆ.
ءوز تاراپىنان ولجاس ابراەۆ بىلاي دەپ اتاپ ءوتتى:
«تەننيس جىل ساناپ قازاقستاندا كەڭىنەن تارالىپ كەلەدى، ءبىزدىڭ تەلەكانال وتكەن جىلدان بەرى تەننيستى كوپتەپ بەرە باستادى. ءبىز 2026 جىلعى ۋيمبلدون ءتۋرنيرىن كورسەتۋگە تەلەۆيزيالىق قۇقىققا قول جەتكىزدىك. بيىل Sport+ Kazakhstan كورەرمەندەرى تەننيستەن ەرەسەكتەر اراسىندا قازاقستان چەمپيوناتىن، سونداي-اق پرەزيدەنت كۋبوگىن تىكەلەي ەفيردە تاماشالادى. بۇدان بولەك ءبىز الماتىدا وتەتىن اتر 250 ءتۋرنيرىن كورسەتىپ، كورەرمەندەردى قۋانتقىمىز كەلەدى. ءبىزدى سپورتتى دامىتۋ مەن وعان قولجەتىمدىلىككە قول جەتكىزۋ، سونىمەن قاتار قازاقستاندىقتار اراسىندا سالاۋاتتى ءومىر سالتىن ورنىقتىرۋ جولىنداعى ورتاق يدەيا بىرىكتىرەدى. ءبىزدىڭ فەدەراتسيامەن ىنتىماقتاستىعىمىز جەمىستى بولىپ، كونتەنت تەك كاسىبي ويىنشىلار مەن وسى سپورت ءتۇرىنىڭ جانكۇيەرلەرى ءۇشىن عانا ەمەس، بارلىق قىزىعۋشىلىق بىلدىرگەن جاندارعا يگى سەپتىگىن تيگىزەدى دەپ سەنەمىن».
