بيىل بۇقارالىق سپورتپەن 300 مىڭنان استام ادام اينالىسا باستاعان

مەملەكەت باسشىسى قاسىم-جومارت توقاەۆ وتاندىق سپورتتى قولداۋ مەن سپورتشىلارعا جاعداي جاساۋدى تۇراقتى نازاردا ۇستاپ كەلەدى. پرەزيدەنتتىڭ باستامالارى نەگىزىندە ەلىمىزدە بۇقارالىق جانە بالالار سپورتى قارقىندى دامىپ جاتىر.

تۋريزم جانە سپورت مينيسترلىگىنىڭ حابارلاۋىنشا، بىلتىر دەنە شىنىقتىرۋمەن جانە سپورتپەن جۇيەلى تۇردە 8،5 ميلليونعا جۋىق ادام اينالىستى. بۇل – جالپى حالىقتىڭ 41،4% پايىزى. ونىڭ ىشىندە 6 021 117 ادام (72%) – ەر ادام بولسا،  2 385 096 ادام (28%) – ايەلدەر. 3 ميلليونعا جۋىق ادام اۋىلدىق جەرلەردە سپورتپەن تۇراقتى شۇعىلدانادى.

بۇل كورسەتكىش الدىڭعى جىلمەن سالىستىرعاندا 300 مىڭنان استام ادامعا ارتقان. مينيسترلىكتىڭ نەگىزگى ماقساتى – 2029 جىلعا قاراي سپورتپەن شۇعىلدانۋشىلار ۇلەسىن 50%-عا جەتكىزۋ.

بالالار سپورتى – باستى باسىمدىقتاردىڭ ءبىرى. بيىل مەملەكەتتىك سپورت تاپسىرىسىن ورىنداۋ ءۇشىن جەرگىلىكتى بيۋدجەتتەن 50 ملرد تەڭگە ءبولىنىپ، 7 مىڭنان استام سپورت سەكتسياسى اشىلدى. سونىڭ ناتيجەسىندە 240 مىڭنان استام بالا تەگىن سپورتتىق ۇيىرمەلەرگە قاتىسۋ مۇمكىندىگىنە يە بولدى.

سونىمەن قاتار،ەلىمىز  بويىنشا 912 جاسوسپىرىمدەر كلۋبى جۇمىس ىستەپ، 298 مىڭنان استام بالالار مەن جاسوسپىرىمدەردى سپورتپەن قامتىپ وتىر، — دەلىنگەن حابارلامادا.

بۇل باعدارلامالارعا دەگەن سۇرانىس وتە جوعارى. سوندىقتان جەرگىلىكتى اتقارۋشى ورگانداردىڭ مىندەتى – سپورتتى دامىتۋعا ارنالعان قارجىلاندىرۋدى بارىنشا قامتاماسىز ەتۋ.

قازاقستاندا بۇقارالىق سپورتتى دامىتۋ – حالىقتىڭ دەنساۋلىعىن نىعايتۋدىڭ، سالاۋاتتى ءومىر سالتىن قالىپتاستىرۋدىڭ جانە جاس ۇرپاقتى تاربيەلەۋدىڭ باستى تەتىگى.

فوتودا استانا قالاسىندا باق وكىلدەرى اراسىندا جىل سايىن ۇيىمداستىرىلاتىن BAQ Liga جۋرناليستەر بىرىنشىلىگىنە قاتىساتىن Sadaq Media فۋتبول كلۋبى