Bıyl buqaralyq sportpen 300 myńnan astam adam aınalysa bastaǵan

Memleket basshysy Qasym-Jomart Toqaev otandyq sportty qoldaý men sportshylarǵa jaǵdaı jasaýdy turaqty nazarda ustap keledi. Prezıdenttiń bastamalary negizinde elimizde buqaralyq jáne balalar sporty qarqyndy damyp jatyr.

Týrızm jáne sport mınıstrliginiń habarlaýynsha, byltyr dene shynyqtyrýmen jáne sportpen júıeli túrde 8,5 mıllıonǵa jýyq adam aınalysty. Bul – jalpy halyqtyń 41,4% paıyzy. Onyń ishinde 6 021 117 adam (72%) – er adam bolsa,  2 385 096 adam (28%) – áıelder. 3 mıllıonǵa jýyq adam aýyldyq jerlerde sportpen turaqty shuǵyldanady.

Bul kórsetkish aldyńǵy jylmen salystyrǵanda 300 myńnan astam adamǵa artqan. Mınıstrliktiń negizgi maqsaty – 2029 jylǵa qaraı sportpen shuǵyldanýshylar úlesin 50%-ǵa jetkizý.

Balalar sporty – basty basymdyqtardyń biri. Bıyl memlekettik sport tapsyrysyn oryndaý úshin jergilikti bıýdjetten 50 mlrd teńge bólinip, 7 myńnan astam sport sekııasy ashyldy. Sonyń nátıjesinde 240 myńnan astam bala tegin sporttyq úıirmelerge qatysý múmkindigine ıe boldy.

Sonymen qatar,elimiz  boıynsha 912 jasóspirimder klýby jumys istep, 298 myńnan astam balalar men jasóspirimderdi sportpen qamtyp otyr, — delingen habarlamada.

Bul baǵdarlamalarǵa degen suranys óte joǵary. Sondyqtan jergilikti atqarýshy organdardyń mindeti – sportty damytýǵa arnalǵan qarjylandyrýdy barynsha qamtamasyz etý.

Qazaqstanda buqaralyq sportty damytý – halyqtyń densaýlyǵyn nyǵaıtýdyń, salaýatty ómir saltyn qalyptastyrýdyń jáne jas urpaqty tárbıeleýdiń basty tetigi.

Fotoda Astana qalasynda BAQ ókilderi arasynda jyl saıyn uıymdastyrylatyn BAQ Liga Jýrnalıster birinshiligine qatysatyn Sadaq Media fýtbol klýby