بارەكەلدى! قىزىلوردادا جاڭا ستاديون سالىندى

4 قازاندا قىزىلوردادا جاڭادان سالىنعان ستاديوندا فۋتبولدان قازاقستان كۋبوگىنىڭ فينالدىق ماتچى بولادى. وسى كۇنى شىمكەنتتىڭ «ورداباسى» مەن قوستانايدىڭ «توبىل» كلۋبتارى جاڭا الاڭعا شىعادى، دەپ حابارلادى قازاقستان فۋتبول فەدەراتسياسى.

ەكى كلۋب تا ءوز تاريحىندا ەكى رەتتەن قازاقستان كۋبوگىن يەلەنگەن. بۇعان دەيىن دە ولار فينالدا ءۇش مارتە جولىققان. 2007 جانە 2023 جىلدارى جەڭىستى «توبىل» تويلاسا، 2011 جىلى كۋبوك «ورداباسىنىڭ» ەنشىسىنە بۇيىردى.

2025 جىلعى كۋبوكتا كوماندالار ويىندارىن 1/8 فينالدان باستاعان. «ورداباسى» «حان-ءتاڭىرى»، «قايرات» پەن «قىزىلجاردى» جارىس جولىنان شىعاردى. ال «توبىل» بولسا، «جەتىسۋ»، «تۇران» مەن «جەڭىس» كوماندالارىن جەڭدى.

فينالدا جەڭىسكە جەتكەن كلۋب بەدەلدى تروفەيگە عانا يە بولمايدى. سونىمەن قاتار 2026/27 ماۋسىمىنداعى ۋەفا كونفەرەنتسيالار ليگاسىنىڭ ەكىنشى ىرىكتەۋ كەزەڭىنەن باستاپ قاتىسۋ قۇقىعىن الادى. ەگەر «توبىل» چەمپيوناتتاعى العاشقى ۇشتىككە كىرۋدى ءىس جۇزىندە قامتاماسىز ەتىپ ۇلگەرسە، «ورداباسى» ءۇشىن بۇل حالىقارالىق ارەناعا شىعۋدىڭ جالعىز مۇمكىندىگى بولىپ تۇر.

بۇل ماتچ تۋرنيرلىك ماڭىزدان بولەك، ەكى ءتۇرلى جاتتىقتىرۋشىلىق مەكتەپتىڭ تارتىسى رەتىندە دە قىزىق. «ورداباسىنى» مولدوۆالىق مامان اندرەي مارتين جاتتىقتىرسا، «توبىلدىڭ» تىزگىنى قازاقستان قۇراماسىنىڭ بۇرىنعى ويىنشىسى، قوستاناي فۋتبولىنىڭ اڭىزى نۇربول جۇماسقاليەۆتىڭ قولىندا.

كاسىبي كلۋبتار اراسىنداعى جارىستاردى وتكىزۋ ديرەكتسياسىنىڭ باسشىسى باقىتجان پازىلحايىردىڭ ايتۋىنشا،  پرەزيدەنت قاسىم-جومارت توقاەۆتىڭ تاپسىرماسىمەن ەلدە جاڭا ستاديوندار سالۋ جانە قولدانىستاعىلارىن جاڭعىرتۋ بويىنشا اۋقىمدى جۇمىس جۇرگىزىلۋدە. سول جوبالاردىڭ ءبىرى – قىزىلورداداعى «قايسار ارەنا». 2025 جىلعى قازاقستان كۋبوگىنىڭ فينالى وسى زاماناۋي ارەناداعى العاشقى رەسمي ماتچ بولادى. بۇل – ماۋسىمداعى ەڭ باستى وقيعانىڭ ءبىرى. قوستانايلىق كلۋب چەمپيوندىق ءۇشىن تالاسىپ جاتسا، شىمكەنتتىكتەر پرەمەر-ليگاداعى ورنىن كۇشەيتۋگە تىرىسۋدا. كورەرمەندەر جاقسى ويىندى تاماشالايدى دەپ سەنەمىن. اسىرەسە، قىزىلوردالىق جانكۇيەرلەر ءۇشىن بۇل كەزدەسۋدىڭ ەرەكشە ءمانى بار. سەبەبى جاڭا الاڭدا ءوز جەرلەسى اسحات تاعىبەرگەن ونەر كورسەتەدى.

قىزىلوردا قالاسىندا 11 مىڭ ورىندىق جاڭا ستاديون بوي كوتەردى. سپورت نىسانى ۋەفا تالاپتارىنا ساي، ماتەريالدىق-تەحنيكالىق بازاسى سوڭعى ۇلگىدەگى زاماناۋي قۇرالدارمەن جابدىقتالعان.

-پرەزيدەنتىمىز ۇلتتىق قۇرىلتايدىڭ ءتورتىنشى وتىرىسىندا تۋريزم جانە سپورت مينيسترلىگىنە فۋتبول فەدەراتسياسىمەن، ءوڭىر اكىمدەرىمەن بىرلەسىپ جانە بيزنەستى تارتىپ، كلۋبتىق فۋتبولدى كوممەرتسيالاندىرۋ تۋرالى تاپسىرما بەرگەن بولاتىن. قازىرگى تاڭدا بۇل باعىتتا ءتيىستى جۇمىستار جۇرگىزىلۋدە. الداعى ۋاقىتتا سپورتتى قولداۋداعى يگى باستامالار، اۋقىمدى جوبالار جالعاسىن تابادى، – دەدى قىزىلوردا وبلىسىنىڭ اكىمى نۇرلىبەك نالىباەۆ.

جاڭا ستاديوندا وليمپيادالىق سپورت تۇرلەرىنە ارنالعان بوكس، گيمناستيكا، كۇرەس، تاەكۆوندو، اۋىر اتلەتيكا زالدارى بار. نىسان قازان ايىندا ەل يگىلىگىنە تابىستالادى.

بۇدان بولەك، 20 ملرد. 500 ملن. تەڭگەگە «قىزىلوردا ارەنا» كوپبەيىندى سپورت كەشەنى سالىنۋدا. كەشەندە وليمپيادالىق سپورت تۇرلەرىنە ارنالعان جاتتىعۋ زالدارى، ءجۇزۋ باسسەينى، حالىقارالىق جارىستاردى وتكىزۋگە ارنالعان 2500 ورىندىق زال قاراستىرىلعان.