ازيالىق Qazaq Kuresi اسسوتسياتسياسى قۇرىلدى

تۇركىستان قالاسىندا قازاق كۇرەسىنىڭ دامۋىنا سەرپىن بەرەتىن ماڭىزدى جيىن – Qazaq Kuresi اسسوتسياتسياسى اتقارۋشى كوميتەتىنىڭ وتىرىسى ءوتتى.

ازيا چەمپيوناتى اياسىندا ۇيىمداستىرىلعان بۇل باسقوسۋ ۇلتتىق سپورتتىڭ ستراتەگيالىق باعىتىن ايقىنداپ، حالىقارالىق دەڭگەيدەگى جاڭا باستامالاردىڭ نەگىزىن قالاعان تاريحي ءىس-شارا بولدى، دەپ حابارلادى Qazaq Kuresi اسسوتسياتسياسىنىڭ ءباسپاسوز قىزمەتى.

جيىنعا تۇركىستان وبلىسى دەنە شىنىقتىرۋ جانە سپورت باسقارماسىنىڭ باسشىسى عالىمجان حۋدياروۆ، ۇلتتىق جانە ات سپورتى تۇرلەرى ورتالىعىنىڭ ديرەكتورى قايرات پازىلبەك، United World Wrestling ۇيىمىنىڭ تەحنيكالىق دەلەگاتى ونۋر شيمشەك، چەمپيوناتتىڭ باس تورەشىسى ەدمار ابدۋلاەۆ، سالا ارداگەرلەرى مارات جاقيت پەن سەرىك تۇكەەۆ، سونداي-اق قازاقستاندىق جانە شەتەلدىك فەدەراتسيالاردىڭ باسشىلارى مەن وكىلدەرى قاتىستى.

وتىرىستى العىسوزبەن اشقان Qazaq Kuresi اسسوتسياتسياسىنىڭ باس ديرەكتورى دامير بەكبوسىنوۆ ءوز بايانداماسىندا قاۋىمداستىقتىڭ جۇمىستارىنا توقتالىپ، سوڭعى جىلدارى ءتول كۇرەسىمىزدىڭ حالىقارالىق دەڭگەيدە تانىمال بولا تۇسكەنىن اتاپ ءوتتى.

دامير اسەنعازى ۇلىنىڭ ايتۋىنشا، اسسوتسياتسيانىڭ باستاماسىمەن 11 الەم چەمپيوناتى، 13 ازيا چەمپيوناتى، 6 الەم كۋبوگى، 6 ەۋروپا جانە 2 افريكا چەمپيوناتى لايىقتى دەڭگەيدە بولدى. سونىمەن قاتار تورەشىلەر مەن جاتتىقتىرۋشىلارعا ارنالعان بىرىڭعاي اتتەستاتسيالاۋ مەن بىلىكتىلىكتى ارتتىرۋ جۇيەسى ەنگىزىلدى.

وسى باعىتتاعى جۇمىستاردى جۇيەلەۋ ءۇشىن اسسوتسياتسيا قۇرامىندا 8 كوميتەت پەن 3 دەپارتامەنت قۇرىلىپ، تورەشىلىك، مەديتسينا، حالىقارالىق ىنتىماقتاستىق، ماركەتينگ جانە دامۋ باعىتتارى بويىنشا ناقتى مىندەتتەر بەكىتىلگەن.

ازيا ويىندارىنا جول اشاتىن باستاما

جيىندا قازاق كۇرەسىن ازيا ويىندارىنىڭ باعدارلاماسىنا ەنگىزۋ ماسەلەسى دە تالقىلاندى. وليمپيادالىق كەڭەستىڭ (OCA) تالابىنا ساي قازاق كۇرەسى ازيانىڭ كەمىندە 25 ەلىندە دامىپ، 12 مەملەكەت قازاق كۇرەسىنىڭ چەمپيوناتتارىنا تۇراقتى قاتىسۋلارى قاجەت. سونداي-اق، دوپينگكە قارسى ساياسات، گەندەرلىك تەڭدىك جانە بىرىڭعاي تورەلىك جۇيە بولۋى مىندەت.

ونىڭ ايتۋىنشا، بۇگىنگى تاڭدا قازاق كۇرەسى بۇل تالاپتاردىڭ باسىم بولىگىن ورىنداپ وتىر. ياعني، قازاق كۇرەسى ازيانىڭ 15-تەن استام ەلىندە تۇراقتى دامۋدا، تورەشىلەر UWW جۇيەسىمەن ليتسەنزيالانۋدا، ال قازاق كۇرەسىنىڭ جاڭارتىلعان ەرەجەسى حالىقارالىق ستاندارتتارعا ساي.

باسقوسۋدىڭ باستى جاڭالىعى – ازيالىق Qazaq Kuresi اسسوتسياتسياسىنىڭ قۇرىلۋى بولدى. جاڭا قۇرىلىمنىڭ باستى ماقساتى – ازيا قۇرلىعىنداعى بارلىق ۇلتتىق فەدەراتسيالاردىڭ جۇمىسىن ۇيلەستىرۋ، بىرىڭعاي جارىس كۇنتىزبەسىن بەكىتۋ جانە سپورتشىلاردىڭ حالىقارالىق دەڭگەيدە اتتەستاتسيادان ءوتۋىن قامتاماسىز ەتۋ.

جاڭادان قۇرىلعان ازيالىق Qazaq Kuresi اسسوتسياتسياسىنىڭ پرەزيدەنتى بولىپ حاريش تياگي ء(ۇندىستان)، ال باس حاتشىسى قىزمەتىنە پارۆين تياگي ء(ۇندىستان) سايلاندى.

-قازاق كۇرەسى – ۇلتتىق رۋحتىمىزدىڭ ايناسى، ۇلت بولمىسىن، رۋحىن، ەرلىك پەن ادىلدىك ءداستۇرىن بويىنا سىڭىرگەن اسىل مۇرا. ءبىز وسى مۇرانى الەمدىك دەڭگەيدە تانىتىپ، بولاشاقتا ونى وليمپيادالىق قوزعالىستىڭ ءبىر بولىگىنە اينالدىرۋدى ماقسات ەتىپ وتىرمىز. قازاق كۇرەسىن ازيا ويىندارىنىڭ باعدارلاماسىنا ەنگىزۋ – بۇل ۇلتتىق يدەولوگيانىڭ جەڭىسى بولماق. بۇگىندە قازاق كۇرەسى 40-تان استام ەلدە دامىپ كەلەدى. ال ازيا ايماعىندا 15 ەل رەسمي تۇردە ۇلتتىق فەدەراتسيالارىن تىركەگەن. ءبىزدىڭ مىندەتىمىز – وسى كەڭىستىكتە بىرلەسىپ ارەكەت ەتىپ، ورتاق ماقساتقا جەتۋ. سول ءۇشىن ازيا دەڭگەيىندەگى ءبىرتۇتاس باسقارۋ جۇيەسىن قۇرۋ اسا ماڭىزدى، – دەدى دامير اسەنعازى ۇلى.

بولاشاققا باعدار

جيىن سوڭىندا Qazaq Kuresi اسسوتسياتسياسىنىڭ باسشىسى دامير بەكبوسىنوۆ قازاقستاندىق جانە شەتەلدىك فەدەراتسيالارعا ناقتى تاپسىرمالار جۇكتەدى. اتاپ ايتقاندا، 2026 جىلدان باستاپ ءار شەتەلدىك فەدەراتسيا ءوز ەلىندە چەمپيونات وتكىزۋى، ال توقسان سايىن ونلاين وتىرىستارعا قاتىسۋى ءتيىس ەكەندىگى اتاپ ايتىلدى.

-ءبىزدىڭ ماقسات – قازاق كۇرەسىن ەل ىشىندە عانا ەمەس، بۇكىل الەمدىك سپورت قاۋىمداستىعىندا مويىنداتۋ. بۇل باعىتتا مەملەكەت، فەدەراتسيالار مەن باپكەرلەر بىرلەسىپ جۇمىس ىستەۋى كەرەك. قازاق كۇرەسى – ءبىزدىڭ ۇلتتىق برەندىمىز، ونى الەمدىك دەڭگەيدە وركەندەتۋ – ارقايسىمىزدىڭ ابىرويلى بورىشىمىز، – دەدى اسسوتسياتسيا باسشىسى ءسوزىن قورىتىندىلاي كەلە.

بۇل جارىسقا ازيا قۇرىلىعىنىڭ 12 ەلىنەن كەلگەن 150-گە جۋىق سپورتشى قاتىسىپ، 16 سالماق دارەجەسى بويىنشا سىنعا تۇسۋدە.