قازاق كۇرەسى – ۇلى دالانىڭ ۇلكەن ونەرى

دۇنيەجۇزىلىك قازاق كۇرەسى فەدەراتسياسىنىڭ ۆيتسە-پرەزيدەنتى، قازاق كۇرەسىنەن ازيا فەدەراتسياسىنىڭ پرەزيدەنتى سەرىك كەنەنبايمەن اڭگىمە

قازىرگى كەزدە ەلىمىزدە ەستە جوق ەسكى زاماننان بەرى اتا-بابامىزدان تارام-تارام ۇرپاق ارقىلى كەلە جاتقان ۇلتتىق كۇرەسىمىزدى ەل-ەلگە، جەر-جەرگە تاراتىپ، ناسيحاتتاپ، دامىتۋعا قولدا بار مۇمكىندىكتىڭ ءبارىن جاساپ، ءتول كۇرەسىمىزدىڭ تۋىن تىگىپ، تورگە شىعارىپ جۇرگەن ازاماتتار بارشىلىق. قۇدايعا شۇكىر، ەلىمىز 1991 جىلى تاۋەلسىزدىگىن جاريالاپ، ازاتتىقتىڭ اق تاڭى ارايلاپ اتقان كەزدەن بەرى قازاق كۇرەسىن دامىتۋدا قىرۋار شارۋالار جاسالىپ جاتىر. وسى يگى جۇمىستاردىڭ باسى-قاسىندا جۇرگەن ازاماتتار قازىر دە ءتول سپورتىمىزدى قۇرمەت تۇعىرىنىڭ ەڭ بيىك ساتىسىنا شىعارۋ ءۇشىن ايانباي ەڭبەك ەتۋدە. سولاردىڭ ءبىرى – دۇنيەجۇزىلىك قازاق كۇرەسى فەدەراتسياسىنىڭ ۆيتسە-پرەزيدەنتى، ۇلتتىق سپورتىمىزدىڭ ازيا قۇرلىعى بويىنشا توراعاسى سەرىك كەنەنباي.

جاقىندا ءبىز استانادا سەرىك كەنەنبايمەن كەزدەسىپ، تورتكۇل دۇنيەنىڭ ءتورت بۇرىشىندا تالاي جۇرتتى ەرەجەسىمەن، ءادىس-تاسىلدەرىمەن، تازالىعىمەن تامساندىرىپ، تاڭدايىن قاقتىرعان ءتول كۇرەسىمىزدىڭ بۇگىنگى جاعدايى مەن بولاشاعى تۋرالى اڭگىمەلەسۋدىڭ ءساتى تۇسكەن ەدى. ەندى وقىرمان نازارىنا سول سۇحباتتى ۇسىنامىز.

– سەكە، قازىر ءسىز قازاق كۇرەسىن جازعى ازيا ويىندارىنا، ودان كەيىن وليمپيادا ويىندارىنا قوسۋ ءۇشىن قىرۋار شارۋانى اتقارىپ جۇرگەن ازاماتتىڭ ءبىرىسىز. قازاق كۇرەسىنە قالاي كەلدىڭىز؟ كۇرەس ءسىزدى نەسىمەن قىزىقتىردى؟ اڭگىمەنى وسىدان باستاساق.

– ەندى بالا كەزىمىزدە ءبارىمىز كۇرەسىپ وستىك. كۇرەسكە قىزىعۋشىلىعىم سول بال داۋرەن بالالىق شاعىمنان باستالعان. كەيىن ەر جەتىپ، وتاعاسى اتانىپ، ازامات بولىپ قالىپتاسقان سوڭ، ۇلتتىق كۇرەسىمىزدى دامىتۋعا اتسالىسۋدى وزىمە پارىز، كەرەك دەسەڭىز، مىندەت سانادىم. سودان 2009 جىلى قازاق كۇرەسىن ناسيحاتتاۋعا، ونى ءارى قاراي دامىتۋعا بەلسەنە كىرىستىم. وسى جەردە مەن دۇنيەجۇزىلىك قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى، ءوزى 2005 جىلى ۇيىمدى قۇرۋعا اتسالىسىپ، سونىڭ نەگىزىن قالاعان سەرىك ادامبولسىن ۇلى تۇكيەۆتىڭ ەسىمىن ەرەكشە اتاپ وتكىم كەلەدى. سەرىك ادامبولسىن ۇلى – بۇل تۇلعا! مەن سوڭعى 10 جىلدان بەرى وسى ءبىر قازاقتىڭ اياۋلى، اپتال ازاماتىنىڭ جانىندا جۇرگەنىمە ماقتانامىن. ال قازىر فەدەراتسيانىڭ جاڭا باسشىسى يسلام الماقان ۇلى ابىشەۆتى ءبارىڭىز دە جاقسى بىلەسىزدەر. بۇل كىسى دە ەلگە ەلەۋلى، بۇكىل قازاقتىڭ ماقتانىنىشا اينالعان ازامات. مەن وسى ەكى اردا اعالارىممەن 10 جىلدان بەرى تىزە قوسىپ جۇرگەنىمە ريزامىن. ولاردىڭ ءسوزىن ەكى ەتپەي، ارقاشان دا ىنىلىك ءىلتيپات كورسەتىپ، بەرىلگەن تاپسىرمانى ورىنداپ، جۇمىس ىستەپ كەلەمىن.

2009 جىلى قازاق كۇرەسىنە كەلگەندە سەرىك تۇكيەۆ مەنىڭ جان-تانىممەن بەرىلىپ، جۇمىس ىستەۋگە تۇرتكى بولدى. سول جىلى قىزىلوردادا VII ازيا چەمپيوناتى ءوتىپ، سونى ۇيىمداستىرۋعا اتسالىستىم. جارىس بىتكەن سوڭ، ءتول كۇرەسىمىز مەنى وزىنە باۋراپ الدى. قازىر ءبىزدىڭ دۇنيەجۇزىلىك قازاق كۇرەسى فەدەراتسياسى 7 الەم، 12 ازيا، امەريكا، افريكا مەن ەۋروپا چەمپيوناتتارىن ءتورت رەتتەن وتكىزىپ، 52 مەملەكەتتى ءبىر شاڭىراقتىڭ استىنا بىرىكتىرىپ، ۇلكەن ۇيىمعا اينالىپ وتىر. ەگەر بولاشاقتا ۇكىمەتتە قولداۋ تاۋىپ جاتساق، كوپ ۇزاماي ول ازيا ويىندارىنىڭ باعدارلاماسىنا كىرەدى دەپ كامىل سەنەمىن.

– ءسىز ءوزىڭىز قىتايدا تۋىپ، ءوستىڭىز. بالالىق شاعىڭىز، ەسەيىپ ەر جەتكەن كەزىڭىز، ازامات بولىپ قالىپتاسقان جىلدارىڭىزدىڭ ءبارى قىتاي حالىق رەسپۋبليكاسىندا ءوتتى. قازىر وسى ەلدە قازاق كۇرەسىن قالاي ناسيحاتتاپ، دامىتىپ جاتسىزدار؟

– 2013 جىلى قىركۇيەك ايىندا قىتايدىڭ اقساي قازاق اۆتونوميالى اۋدانىندا ءىح ازيا چەمپيوناتىن وتكىزدىك. بۇل جارىس الىپ ەلدە العاش رەت ءوتتى. وعان قاتىسقان ەلدەردىڭ سانىندا سان بولمادى. وتە كوپ پالۋاندار قاتىستى. قىتايدىڭ وزىنەن قانشاما اتاڭ جىلىك، ءاپايتوس پالۋاندار جينالدى.

اقساي قازاق اۋدانى – ىشكى قىتايدىڭ گانسۋ پروۆينتسياسىندا ورنالاسقان. وندا وتكەن عاسىردىڭ ورتا كەزىندە التايدان شىعىسقا كوشكەن قانداستارىمىزدىڭ ۇرپاعى قالعان. جالپى جان سانى – 10 000 ادام. قازاقتاردىڭ ءوزى 3 500 ادام بولادى. سوعان قاراماستان ولار سالت-ءداستۇرىمىزدى، مادەنيەتىمىزدى، كوشپەندىلەردىڭ ونەر سايىستارىن ساقتاعان. ءبىز ازيا چەمپيوناتىندا سونىڭ ءبارىن كوردىك. وسى جارىستا اتىڭنان اينالايىن اعايىننىڭ التاي مەن اتىراۋدىڭ اراسىنداعى قازاقتىڭ سالت-داستۇرلەرىندە، ونەرى مەن مادەنيەتىندە ايىرماشىلىقتىڭ بولمايتىنىن دالەلدەدى. اقسايداعى اعايىننىڭ قازاقستانداعى قانداستارىمەن تىلدىك ديالەكتيكادا دا ايىرماشىلىعى جوق ەكەن. سودان كەيىن ءبىز التاي قالاسىندا ءحى ازيا چەمپيوناتىن وتكىزىپ، 15 اۋدان مەن 5 قالادا ۇلتتىق كۇرەسىمىزدەن قوعامدار اشتىق. ال 2014 جىلى قىتايدا الەم چەمپيوناتىن ۇيىمداستىرۋدى قولعا الدىق. وعان ەكى جىلعا جۋىق ۋاقىت كەتتى. سىزگە ايتايىن، قىتايدا قازاق كۇرەسىنەن الەم چەمپيوناتىن وتكىزۋ سىرت كوزگە وڭاي بولۋى مۇمكىن. ال شىنداپ كەلگەندە از ۇلتتاردىڭ جارىسىن وتكىزۋ وڭاي ەمەس. وسى جارىستىڭ وتكىزىلۋىنە سول كەزدەگى دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى بولعان سەرىك تۇكيەۆ مىرزانىڭ كوپ ەڭبەگى ءسىڭدى. نەگىزى، بۇل بەلدەسۋلەر بۇدان بۇرىن ءوتۋى كەرەك ەدى. بىراق ەكى جىلدا الدىمىزدان شىققان كەيبىر قيىندىقتارمەن اينالىسامىز دەپ ءجۇرىپ ۋاقىت ءوتىپ كەتتى. ءسويتىپ، قىتايدا 2016 جىلدىڭ قىركۇيەك ايىندا العاش رەت الەم چەمپيوناتىنىڭ جالاۋى جەلبىرەدى. وسىنىڭ بارىنە قىتاي بيلىگىندەگى قازاق ازاماتتارى كوپ ەڭبەك ءسىڭىردى. سەبەبى، جارىستى ۇيىمداستىرۋدان بولەك، الەمدىك دودانى وتكىزۋگە رۇقسات الۋدىڭ وزىنە ۇلكەن بەدەل كەرەك. الەمدىك باسەكەنى وتكىزۋ يدەياسىن 2014 جىلى ىلە قازاق اۆتونوميالى وبلىسىنىڭ اكىمى بولعان، قىتاي سەناتىنىڭ دەپۋتاتى، شىڭجاڭ-ۇيعىر اۆتونوميالى اۋدانى ءماجىلىسىنىڭ توراعاسى اسحات كەرىمباي اعامىز قولدادى. ءبىز الەم چەمپيوناتى وتكەننەن كەيىن اسحات كەرىمباي اعاعا، ىلە قازاق اۆتونوميالى وبلىسىنىڭ بۇرىنعى اكىمى قىزايجان سەيىلقوجا ۇلىنا، مۇڭعىلكۇرە اۋداندىق حالىق ۇكىمەتىنە، اۋداندىق پارتيا كوميتەتىنە، قازاقتىڭ ۇلتتىق سپورتىنا جاناشىر بارلىق ازاماتتارعا العىسىمىزدى ايتتىق. قازىر دە العىس ايتامىز. بۇل ازاماتتار ۇلكەن ءىس تىندىردى.

– راس ايتاسىز، سەكە. وسى جارىسقا ءسىزدىڭ دە ماڭداي تەرىڭىزبەن كوپ ەڭبەك ەتكەنىڭىزدى سەرىك ادام ۇلى دا ايتقان. ول بىزبەن ءبىر اڭگىمەدە: «التايدىڭ ار جاعىنداعى اعايىننىڭ اراسىندا ءتول كۇرەسىمىزدىڭ دامۋىنا بارىنشا ۇلەس قوسىپ جۇرگەن باۋىرىمىز سەرىك كەنەنبايدىڭ ەڭبەگى ەرەن. ول سوڭعى ەكى جىلدا ءبىراز جۇمىس ىستەدى. سونىڭ ناتيجەسىندە قامالى بيىك قىتاي ەلىندە ۇلتتىق كۇرەسىمىزدىڭ جالاۋى جەلبىرەدى»، — دەگەن ەدى. بۇل – مەنىڭ قوسقان ءسوزىم ەمەس. بۇل – سەرىك تۇكيەۆتىڭ ءسوزى.

– راحمەت! سەرىك اعاما مىڭ دا ءبىر راحمەت! شىنىندا دا قىتايداعى اعايىن افريكا مەن ازيادان كەلگەن پالۋاندار مەن سپورت دەلەگاتسيالارىنىڭ بارلىق شىعىندارىن وزدەرى كوتەردى. بۇل، ارينە، ىلە قازاق اۆتونوميالى وبلىسى مۇڭعىلكۇرە اۋدانى باسشىلارىنىڭ قازاق كۇرەسىنە دەگەن قامقورلىعى.

– قىتايدا الەم چەمپيوناتىنان بۇرىن ازيا جارىسىنىڭ دا ءوتۋى وڭاي بولمايتىن سياقتى. مىسالى، سەرىك تۇكيەۆپەن اڭگىمەلەسكەنىمدە، ول: «بۇل جارىستىڭ وتۋىنە سەرىك كەنەنباي مەن ايدارحان قابدوللا دەگەن ازاماتتاردىڭ كومەگى كوپ ءتيدى. ولار 2012 جىلى گانسۋ پروۆينتسياسىنا بارىپ، سول جەردەگى اتقامىنەر ازاماتتارمەن كەزدەسىپ، ازيا چەمپيوناتىن وتكىزۋگە كەلىسىمىن الىپ كەلدى»، — دەگەن بولاتىن…

– ءيا، ايتسا ايتقانداي، سول كەزدە التايدىڭ ار جاعىندا ۇلتتىق كۇرەسىمىزدى ناسيحاتتاۋدا ءبىراز قيىنشىلىقتار بولدى. شىڭجاڭ-ۇيعىر اۆتونوميالى اۋدانى – قىتايداعى اۋماعى جاعىنان ەڭ ۇلكەن ءوڭىر. وندا 20 ملن-نان استام حالىق تۇرادى. ال قازاقتاردىڭ سانى شامامەن 2 ملن. عانا. وسىندا ۇرىمجىدەن 1 500 شاقىرىم جەردە گانسۋ دەگەن پروۆينتسيا بار. جاڭا اڭگىمەنىڭ باسىندا ايتقانىمداي، بۇل جەردە كەزىندە گيمالاي تاۋىنان اسىپ، تۇركياعا بەت العان كوشتەن قالىپ قويعان قانداستارىمىز تۇرادى. ولارعا وتكەن عاسىردىڭ 50-ءشى جىلدارى اۆتونوميا بەرىلگەن.

سول كەزدەگى ازيا چەمپيوناتى وتە جاقسى ءوتتى. ونىڭ اشىلۋ سالتاناتىنىڭ ءوزى كەرەمەت اسەر قالدىردى. وندا 100-دەي كيىز ءۇي تىگىلىپ، ەنى 6 مەتر بولاتىن تايقازانعا 50 قويدىڭ ەتى اسىلىپ، 3000-داي قوناقتارعا قۋىرداق تاراتىلدى. 700-دەن استام قىز بەن جىگىت قازاقتىڭ حالىق بيلەرىن بيلەپ، ونەر كورسەتتى. مەنىڭشە، سول جەردەگى اعايىن ازيا دوداسىن وسىلاي جاقسى وتكىزۋگە ۇلەس قوسۋ ارقىلى ەلگە دەگەن ساعىنىشىن كورسەتكىسى كەلگەن سياقتى. سودان كەيىن قىتايدا قازاق كۇرەسىنە دەگەن كوزقاراس وزگەردى. سپورت مينيسترلىگىنىڭ رۇقساتىمەن ەل-ەلدە، جەر-جەردە ۇلتتىق سپورتتان جارىستار وتكىزىلە باستادى. بەيجىڭدە قازاق كۇرەسىنەن ازيا فەدەراتسياسىنىڭ كەڭسەسى اشىلدى.

– مۇنىڭ ءبارى دۇرىس ەكەن. حالقىمىزدا «بىتەر ىسكە سىنشى كوپ» دەيدى عوي. سىزدەردىڭ جۇمىستارىڭىزدى سىناعان ادامدار بولدى ما؟ جالپى، فەدەراتسيانىڭ قىزمەتىنە سىني كوزقاراستار بولىپ تۇرا ما؟

– راس ايتايىن، سىني پىكىرلەردى ەستىمەدىم. «سىن تۇزەلمەي، ءمىن تۇزەلمەيدى» دەيدى اتام قازاق. ارينە، سىناعان دۇرىس. بىراق سىندى دا جونىمەن ايتقان دۇرىس. مەنى الاڭداتاتىنى باسقا نارسە.

– نە نارسە؟

– مەنى كەيبىر ازاماتتاردىڭ مەملەكەتتىك ۇلكەن قىزمەتتە جۇرگەنىن ۇمىتىپ، اياق استىنان قازاق كۇرەسىنە جاناشىر بولا قالاتىنى، «جاۋ جاعادان العاندا ءبورى ەتەكتەن» دەگەندەي تاعى ءبىر حالىقارالىق قوعامداستىق قۇرىپ العانى قىنجىلتادى. بۇل سۇمدىق پا؟ سۇمدىق؟ بۇل كۇلكىلى مە؟ ابدەن كۇلكىلى. باسقا ەمەس، بىزگە جاپونيا، قىتاي، كورەيا ەلدەرى: «وسى سىزدەردە نەشە فەدەراتسيا بار؟ كىممەن جۇمىس ىستەيمىز؟»، دەپ سۇراعاندا كىرەر جەرگە تەسىك تاپپاي قالامىن. بۇل نە سوندا؟ سوڭعى 15 جىلدا سەرىك تۇكيەۆتىڭ ەڭبەگىنىڭ ەش كەتكەنى مە؟ وسى كەزگە دەيىن قازاق كۇرەسىنىڭ ەرەجەسىن جاساپ، ونى زاڭداستىرىپ، بەكىتىپ، الەمدىك دەڭگەيگە الىپ شىققان دۇنيەجۇزىلىك قازاق كۇرەسى فەدەراتسياسىنىڭ جۇمىسىنا ءاتۇستى قاراپ، مەنسىنبەگەنى مە؟ ءبىز ءبىر-بىرىمىزگە قول ۇشىمىزدى بەرىپ، جاقسىلىعىمىزدى اسىرىپ، جامان جەرىمىزدى جاماپ، جاسىرىپ، جۇمىس ىستەۋدىڭ ورنىنا ءبىر-ءبىرىمىزدى كورە الماي، قاتىن-وسەك ايتاتىن دەڭگەيگە جەتكەنىمىز بە؟ بۇل بۇكىل دۇنيەگە قازاق كۇرەسىن ماسقارا ەتىپ كورسەتۋ عوي. ءبىز ەۋروپا، ازيا، افريكا، امەريكا دودادارىن وتكىزسەك، ماعان ۇلتتىق فەدەراتسيالاردىڭ باسشىلارى كەلىپ: «سەكە، كىمنىڭ ءسوزىن تىڭدايمىز؟ بىلمەي قالدىق قوي»، دەيدى. ول از دەسەڭىز ازيا فەدەراتسياسىنىڭ باسشىسى رەتىندەگى مەنىڭ كەلىسىمىمسىز، رۇقساتىمسىز استانادا 5-6 ەلدىڭ وكىلدەرى جينالىپ، ازيا چەمپيوناتى ءوتىپتى. ال ۇيىمنىڭ ءمورى، بارلىق قۇجاتتارى مەنىڭ قولىمدا ەمەس پە؟! سوندا كىم ولارعا جارىس وتكىزۋگە رۇقسات بەردى؟ ءبىز ءبىر جاعادان باس، ءبىر جەڭنەن قول شىعارىپ جۇمىس ىستەۋىمىز كەرەك. قازاق تاريحتا تالاي قيىندىق كورگەن حالىق. ءبىزدىڭ اتا-بابالارىمىزدىڭ باسىنان نەبىر قيىن-قىستاۋ كەزدەر وتكەن. اقتابان شۇبىرىندى، القاكول سۇلاما – قازاق حالقىنىڭ تاريحىنداعى اششى قاسىرەت، وتان باسىنا كۇن تۋعان اسا قايعىلى كەزەڭدى وتكىزگەن. وتكەن عاسىردىڭ 30-شى جىلدارى 3 ملن قازاق قىرىلعان. بۇعان دەيىن كارى تاريحتا ەش جەردە، ەشقاشان ساۋساقپەن سانارلىق ۋاقىتتا 3 ملن حالىق قىرىلماعان. قايدا قىرىلعان؟ قازاقستاندا. كىم قىرىلعان؟ قازاقتار. ال 1991 جىلى ەلىمىز ەگەمەندىك الىپ، ازاتتىقتىڭ ارايلى اق تاڭى اتقاندا باعىمىزعا نۇرسۇلتان ءابىش ۇلى نازارباەۆ بۇيىردى. سول كىسى كەلىپ، ماڭدايىمىز جارقىرادى. قازاقتا «بىرلىك بار جەردە تىرلىك بار»، دەيدى. قازاق ءبارىن تاۋىپ ايتقان. ەشقاشان قاتە ايتپاعان. قازاقتى الىپ شىعاتىن – حالىقتىڭ بىرلىگى. پرەزيدەنت نۇرسۇلتان نازارباەۆ « ۇلى دالانىڭ جەتى قىرى» ماقالاسىندا تاريحىمىزعا، مادەنيەتىمىزگە، سالت-داستۇرىمىزگە ءمان بەرىپ، تەگىمىزدى ۇمىتپاۋىمىز كەرەك دەپ اشىق ايتتى. قازاق – تەكتى حالىق، تازا حالىق. ەلىمىز 2030 جىلعا دەيىن الەمنىڭ دامىعان 30 ەلىنىڭ قاتارىنا كىرسەك دەپ ماقسات قويىپ وتىر. سوندىقتان قازاققا اۋىزبىرشىلىك، ىنتىماق پەن بەرەكە كەرەك. وسى ۇشەۋى بولمايىنشا العا جىلجۋىمىز قيىن.

– سەكە، ءسوزىڭىزدىڭ جانى بار. وسىنى ءسىز ءتۇسىنىپ وتىرسىز. ەندى باسقالار تۇسىنسە جاقسى. ايتۋىن ايتىپ جاتسىز. جاناشىرلىقپەن، نامىسقا تيگەن سوڭ ايتاسىز. بىراق ۋاقىت ءبىر ورىندا تۇرمايدى. العا باسۋ كەرەك. الداعى جىلعا قانداي جوسپارلارىڭىز بار؟ سونى ايتساڭىز.

– مەن جاستايىمنان تاۋدا وسكەنمىن. مەكتەپتى بىتىرگەن سوڭ، قىتايدىڭ دەسانت اسكەرى بولدىم. ودان كەيىن فيلولوگ اۋدارماشى ماماندىعىنا وقىدىم. قحر-ءدىڭ ىلە قازاق اۆتونوميالى وبلىسى اكىمىنىڭ كومەكشى-حاتشىسى بولىپ قىزمەت ەتتىم. 1995 جىلى جاس زيالىنىڭ ءبىرى بولىپ ەكى قىزىمدى الىپ، ەلگە ورالدىم. مەن ەلىمنەن بىردەڭە سۇرايىن دەپ، بىردەڭە الايىن دەپ كەلگەن جوقپىن. ەلگە بەرەيىن، بىلگەنىمدى كورسەتەيىن، ايتايىن دەپ كەلدىم. قازىر ەل قاتارلى قىزمەت ەتىپ ءجۇرمىن. مەنىڭ ەلگە دەگەن سۇيىسپەنشىلىگىم ارتپاسا، ازايعان جوق. بۇگىنگى تاڭدا قازاق كۇرەسىنە 10 جىلداي ءبىر كىسىدەي قىزمەت ەتىپ كەلەمىن. ماڭدايىما سەرىك تۇكيەۆ سياقتى اردا ازاماتپەن كەزدەسۋگە جازدى. ول مەنىڭ ءارى اعام، ءارى دوسىم. ءبىز الداعى كەزدە دە بىرگە جۇمىس ىستەي بەرەمىز. ال جوسپارعا كەلسەك، 2019 جىلى قىتايدىڭ حەبەي پروۆينتسياسىندا تۇڭعىش رەت ءتول كۇرەسىمىزدەن فەستيۆال مەن ءحىىى ازيا چەمپيوناتىن وتكىزۋ ويىمدا بار. قازىر سونىڭ بارىنە كەلىسىم-شارت جاسادىق. بۇل جارىستارعا شامامەن 30 ەلدىڭ وكىلدەرىن شاقىرامىز.

2019 جىل – ەلىمىز ءۇشىن دە، قازاق سپورتى مەن كۇرەسى ءۇشىن دە تابىستى جىل بولعالى تۇر. ءبىز ءبارىمىز ورتاق ىسكە ءبىر جۇدىرىقتاي جۇمىلىپ، سالت-ءداستۇرىمىز، مادەنيەتىمىز بەن سپورتىمىزدى ناسيحاتتاپ، جەر-جۇزىنە تاراتۋىمىز كەرەك. تاعى ءبىر جاڭالىقتى ايتسام، جاقىن ارادا «قازاقتىڭ سالت-ءداستۇرى» دەگەن ءۇش تىلدە باسىلعان كىتابىمدى قىتاي تىلىنە اۋدارىپ، شىعارعالى جاتىرمىن. ول بەيجىڭدەگى ۇلتتار باسپاسىنان قازاق ەلىنە رەسمي سىي رەتىندە شىعادى. سونىمەن بىرگە گۋانچجوۋ قالاسىنان «اسپان استى ەلىنىڭ الەمى» دەگەن كىتابىم جارىق كوردى. بۇل كىتاپتى شىعارۋ ءۇشىن بەس جىلداي ەڭبەكتەندىم. ال جيناق باسپاحاناعا بەرىلەر الدىندا گۋانچجوۋ قالاسىندا ءبىر اي ءجۇرىپ جۇمىس ىستەدىم.

كىتاپ 3 D پىشىنىندە شىقتى. وسى ەڭبەكتى شىعارۋعا قىتايدىڭ قازاقستانداعى ەلشىلىگىنىڭ مادەنيەت ءبولىمى كوپ كومەكتەستى. سول ءۇشىن قحر-دىڭ ەلىمىزدەگى توتەنشە جانە وكىلەتتى ەلشىسىنە ريزاشىلىعىمدى ءبىلدىرىپ، العىس ايتامىن.

جاقىندا كىتاپتىڭ 20 داناسىن استاناداعى ۇلتتىق اكادەميالىق كىتاپحاناعا رەسمي تۇردە تابىس ەتتىم. ەندى ونى ەلىمىزدەگى باسقا دا كىتاپحانالارعا، سىرتقى ساۋدامەن اينالىساتىن وردالارعا، جوعارى جانە ورتا وقۋ ورىندارىنا تەگىن تاراتامىز.

كىتاپ كوپشىلىككە ارنالعان. قىتايدى تانىعىسى كەلگەن ادام وسى 3 D پىشىنىندە شىققان ەڭبەكتى وقىسا ءبارىن بىلەدى دەپ ويلايمىن. ويتكەنى، وندا مىڭداعان جىلدان بەرى جاساپ كەلە جاتقان كورشى ەلدىڭ تاريحى مەن مادەنيەتى قامتىلعان. بۇل جيناق اسىرەسە، قىتايدى زەرتتەپ جۇرگەن ادامدارعا، ورىندارعا تاپتىرماس قۇرال دەپ بىلەمىن. كىتاپ 1000 دانامەن شىققان.

– اڭگىمەڭىزگە راحمەت! جاقسى جاڭالىقتارىڭىز كوپ بولسىن! جۇمىسىڭىزعا ساتتىلىك تىلەيمىن!

اڭگىمەلەسكەن

داستان كەنجالين،

استانا