نۇرجان اسان – الەمدىك ارەناداعى قازاق رۋحىنىڭ ايعاعى

اقش-تىڭ نيۋ-يورك قالاسىندا وتكەن ايگىلى Bill Farrell International 2025 تۋرنيرىندە قازاق بالۋانى نۇرجان اسان تاعى دا ەل نامىسىن ابىرويمەن قورعاپ، كۇمىس مەدال يەگەرى اتاندى.

ول ءوز سالماعىندا (87 كگ) بىرنەشە امەريكالىق قارسىلاسىن ايقىن باسىمدىقپەن جەڭىپ، فينالعا دەيىن سۇرىنبەي جەتتى. سوڭعى بەلدەسۋدە ۇپاي سانىمەن جەڭىلگەنىمەن، نۇرجان اساننىڭ شەبەرلىگى مەن تاباندىلىعى كورەرمەندەر مەن ساراپشىلاردىڭ لايىقتى باعاسىنا يە بولدى.

جارىسقا 30-دان استام ەلدەن 300-گە جۋىق سپورتشى قاتىسقانىن ەسكەرسەك، بۇل ناتيجە – قازاق سپورتىنىڭ وركەندەۋىنىڭ ايقىن دالەلى.

-نۇرجان ەشقاشان بەرىلمەيدى. الەمنىڭ قاي تۇكپىرىندە كۇرەسسە دە، ونىڭ بويىنان قازاق رۋحىنىڭ وتى بايقالادى، — دەدى بالۋاننىڭ جاتتىقتىرۋشىسى رينات يسمايلوۆ جارىستان كەيىن.

ت.رىسقۇلوۆ اۋدانىنىڭ كوگەرشىن اۋىلىندا دۇنيەگە كەلگەن نۇرجان اسان — بۇگىنگى تاڭدا قازاقستاننىڭ ماقتانىشى. ول 12 جىل بويى كۇرەس ونەرىن ومىرلىك سەرىگىنە اينالدىرعان.

بۇعان دەيىن ول 2021جىلى سۋردليمپيادا ويىندارىنىڭ قولا جۇلدەگەرى، 2022 جىلى الەم چەمپيونى، 2023 جىلى ازيا ويىندارىنىڭ ەكى دۇركىن جەڭىمپازى بولىپ، بىلتىر قازاقستان رەسپۋبليكاسىنىڭ ەڭبەك سىڭىرگەن سپورت شەبەرى اتاعىنا يە بولدى.

بۇگىندە نۇرجان اسان اقش پەن برازيليادا شەبەرلىك ساباقتارىن وتكىزىپ، الەم جاستارىنا قازاق كۇرەسىنىڭ رۋحى مەن ونەرىن ناسيحاتتاپ ءجۇر.

-مەن ءۇشىن باستى جەڭىس — ەلىمنىڭ اتىن الەمگە تانىتۋ، — دەيدى سپورتشى.

نۇرشاحريزادا ساليموۆا،

تاراز