ەل سىيلايتىن ەلسيار اعا

جاقىندا ەلىمىزگە بەلگىلى سپورت جاناشىرى، ۇزاق ۋاقىت قازاق سپورتىنىڭ باسىندا بولىپ، ونىڭ دامۋىنا ولشەۋسىز ۇلەس قوسقان قوعام قايراتكەرى ەلسيار بايمۇحامەد ۇلى قاناعاتوۆتى تۋعان كۇنىمەن قۇتتىقتاپ شىقتىم.

ەلەكەڭمەن 2000-جىلداردىڭ باسىنان تانىسپىن. استاناعا العاش رەت كەلگەندە ول كىسى تۋريزم جانە سپورت اگەنتتىگى توراعاسىنىڭ ورىنباسارى بولىپ ىستەگەن ەدى. مىنە، سودان بەرى ەلسيار اعا ەكەۋمىز اعالى-ءىنىلى بولىپ ارالاسىپ كەلەمىز. وسى ۋاقىتتا ونىڭ ادام بالاسىن الالاعانىن ەستىمەپپىن. قايتا كەرىسىنشە، ەلسيار بايمۇحامەد ۇلىن تالاي جيىندا، تالاي جەردە ەلدىڭ قۇرمەتتەيتىنىن كوردىم. مۇنى مەن اتادان بالاعا تارام-تارام ۇرپاق ارقىلى كەلە جاتقان تاربيە مەن مىنەزدەن، تەكتىلىكتەن كورەمىن. سوعان كۇنى بۇگىنگە دەيىن كۋا بولىپ كەلەمىن.

ەلەكەڭ قازىر «قازاقستان سپورت ارداگەرلەرى» رەسپۋبليكالىق قوعامدىق بىرلەستىگىنىڭ توراعاسى. ونىڭ ءبىرىنشى ورىنباسارى دا ەلىمىزگە كەڭىنەن تانىمال سپورت جاناشىرى. ول  — جارتى عاسىر قازاق سپورتىنىڭ ىستىعى مەن سۋىعىنا ءتوزىپ، وسى سالانى زەرتتەپ، كوپتەگەن ەڭبەك جازعان جازۋشى ءارى جۋرناليست نەسىپ ءجۇنىسباي ۇلى اعامىز.

كەزدەسۋدە تۋعان كۇن يەسىن قۇتتىقتاعاننان كەيىن ول جاقىندا ءوزىنىڭ 70 جاسقا تولۋىنا بايلانىستى شىققان «كوڭىلدەن سپورت كوشپەيدى» كىتابىن تارتۋ ەتتى. بۇل ەڭبەكتىڭ قۇندىلىعى سوندا، وندا اۆتوردىڭ قازاق سپورتىنا قاتىستى وي-تولعاۋلارى مەن باسقا دا جاقسى دۇنيەلەرى بەرىلگەن.

كىتاپتا اۆتور سپورت سالاسىن كەڭىنەن قامتىعان. سپورتتى بالا كەزىنەن بەرى سەرىك ەتىپ، ەسەيە كەلە ەلدىك جۇمىستارعا ارالاسىپ، قازاق سپورتىن باسقارعان ۋاقىتتاعى ەستەلىكتەرىن تاماشا كەلتىرگەن. ال قازىر اعامىز جاڭا جازعانىمداي، قوعامدىق بىرلەستىكتە ىستەپ، ەلدىك ىستەرمەن اينالىسىپ كەلەدى.

-ءبىزدىڭ بىرلەستىكتىڭ جۇمىسىنىڭ ءبىر باعىتى — كەزىندە اتى اڭىزعا اينالسا دا بۇگىندە ەسىمى ەلەۋسىز قالىپ بارا جاتقان ارداقتى اعالارىمىز بەن اپالارىمىزدى قولداۋ. ولارعا قولدا بار مۇمكىندىكتىڭ ءبارىن جاساۋ. بۇل ءبىر بىرلەستىكتىڭ جۇمىسى عانا بولماۋ كەرەك. بۇل بۇكىل ەلدىڭ جۇمىسى بولۋى كەرەك. ويتكەنى، ءسىز بەن ءبىز ەلگە ەڭبەك ەتىپ، تالاي دۇرمەكتى دودالاردا تۋىمىزدى تىگىپ، ءانۇرانىمىزدى ويناتقان سپورت ارداگەرلەرىن ەشقاشان ۇمىتپاۋىمىز كەرەك. حالقىمىز «جاڭبىرمەن جەر كوگەرەر، باتامەن ەل كوگەرەر»، دەپ بەكەر ايتپاعان. ءبىز وسى ماقساتتا دا قوعامدىق بىرلەستىكتى دە قۇرىپ وتىرمىز، — دەدى توراعا.

بىرلەستىك باسشىسى ايتسا، ءجونىن ايتادى. وسى جەردە ورايى كەلگەندە قوعامدىق بىرلەستىكتى قۇرۋعا تۋريزم جانە سپورت ءمينيسترى ەربول مىرزابوسىنوۆتىڭ اتسالىسىپ، قولداۋ كورسەتكەنىن اتاپ وتكەنىمىز ءجون. قازىر ەلەكەڭ باستاعان، ونى قوشتاعان نەساعاڭ مەن باسقا دا ازاماتتار «قازاقستان سپورت ارداگەرلەرى» رقب-نىڭ قىزمەتىنە قان جۇگىرتىپ، جۇمىسىن جولعا قويۋ ءۇشىن قولدا بار جاعدايدىڭ ءبارىن جاساپ كەلەدى. وبلىستاردا فيليالدارى اشىلىپ جاتىر. دەگەنمەن قازىرگى كەزدە جاسىراتىنى جوق، جۇمىستى العا جىلجىتۋ ءۇشىن ءبارى دە قارجىعا بارىپ تىرەلەدى.

ەندى مەن قازاق سپورتىنا ولشەۋسىز ەڭبەك سىڭىرگەن ءبىر توپ ازامات قۇرعان قوعامدىق بىرلەستىكتىڭ جۇمىسى ەسكەرىلسە ەكەن دەيمىن. پرەزيدەنت اكىمشىلىگى، ۇكىمەت پەن مينيسترىلىكتەر، جالپى سپورتتىڭ اينالاسىندا جۇرگەن اتىمتاي جومارت ازاماتتار جاڭادان قۇرىلعان» قازاقستان سپورت ارداگەرلەرى» رقب-ءتى جان-جاقتى قولداسا ەكەن دەپ تىلەيمىن!

قازاقتا «بىرلىك بار جەردە تىرلىك بار»، «كوڭىل كوڭىلدەن سۋ ىشەدى»، دەپ تە بەكەر ايتپاعان.

ەلەكەڭنىڭ كىتابىنىڭ اتى دا وسىعان ۇندەس كەلەدى. «كوڭىلدەن سپورت كوشپەيدى».

داستان كەنجالين،

استانا