El syılaıtyn Elsııar aǵa

Jaqynda elimizge belgili sport janashyry, uzaq ýaqyt qazaq sportynyń basynda bolyp, onyń damýyna ólsheýsiz úles qosqan qoǵam qaıratkeri Elsııar Baımuhameduly Qanaǵatovty týǵan kúnimen quttyqtap shyqtym.

Elekeńmen 2000-jyldardyń basynan tanyspyn. Astanaǵa alǵash ret kelgende ol kisi týrızm jáne sport agenttigi tóraǵasynyń orynbasary bolyp istegen edi. Mine, sodan beri Elsııar aǵa ekeýmiz aǵaly-inili bolyp aralasyp kelemiz. Osy ýaqytta onyń adam balasyn alalaǵanyn estimeppin. Qaıta kerisinshe, Elsııar Baımuhamedulyn talaı jıynda, talaı jerde eldiń qurmetteıtinin kórdim. Muny men atadan balaǵa taram-taram urpaq arqyly kele jatqan tárbıe men minezden, tektilikten kóremin. Soǵan kúni búginge deıin kýá bolyp kelemin.

Elekeń qazir «Qazaqstan sport ardagerleri» respýblıkalyq qoǵamdyq birlestiginiń tóraǵasy. Onyń birinshi orynbasary da elimizge keńinen tanymal sport janashyry. Ol  — jarty ǵasyr qazaq sportynyń ystyǵy men sýyǵyna tózip, osy salany zerttep, kóptegen eńbek jazǵan jazýshy ári jýrnalıst Nesip Júnisbaıuly aǵamyz.

Kezdesýde týǵan kún ıesin quttyqtaǵannan keıin ol jaqynda óziniń 70 jasqa tolýyna baılanysty shyqqan «Kóńilden sport kóshpeıdi» kitabyn tartý etti. Bul eńbektiń qundylyǵy sonda, onda avtordyń qazaq sportyna qatysty oı-tolǵaýlary men basqa da jaqsy dúnıeleri berilgen.

Kitapta avtor sport salasyn keńinen qamtyǵan. Sportty bala kezinen beri serik etip, eseıe kele eldik jumystarǵa aralasyp, qazaq sportyn basqarǵan ýaqyttaǵy estelikterin tamasha keltirgen. Al qazir aǵamyz jańa jazǵanymdaı, qoǵamdyq birlestikte istep, eldik istermen aınalysyp keledi.

-Bizdiń birlestiktiń jumysynyń bir baǵyty — kezinde aty ańyzǵa aınalsa da búginde esimi eleýsiz qalyp bara jatqan ardaqty aǵalarymyz ben apalarymyzdy qoldaý. Olarǵa qolda bar múmkindiktiń bárin jasaý. Bul bir birlestiktiń jumysy ǵana bolmaý kerek. Bul búkil eldiń jumysy bolýy kerek. О́ıtkeni, siz ben biz elge eńbek etip, talaı dúrmekti dodalarda týymyzdy tigip, ánuranymyzdy oınatqan sport ardagerlerin eshqashan umytpaýymyz kerek. Halqymyz «Jańbyrmen jer kógerer, batamen el kógerer», dep beker aıtpaǵan. Biz osy maqsatta da qoǵamdyq birlestikti de quryp otyrmyz, — dedi tóraǵa.

Birlestik basshysy aıtsa, jónin aıtady. Osy jerde oraıy kelgende qoǵamdyq birlestikti qurýǵa týrızm jáne sport mınıstri Erbol Myrzabosynovtyń atsalysyp, qoldaý kórsetkenin atap ótkenimiz jón. Qazir Elekeń bastaǵan, ony qoshtaǵan Nesaǵań men basqa da azamattar «Qazaqstan sport ardagerleri» RQB-nyń qyzmetine qan júgirtip, jumysyn jolǵa qoıý úshin qolda bar jaǵdaıdyń bárin jasap keledi. Oblystarda fılıaldary ashylyp jatyr. Degenmen qazirgi kezde jasyratyny joq, jumysty alǵa jyljytý úshin bári de qarjyǵa baryp tireledi.

Endi men qazaq sportyna ólsheýsiz eńbek sińirgen bir top azamat qurǵan qoǵamdyq birlestiktiń jumysy eskerilse eken deımin. Prezıdent ákimshiligi, Úkimet pen mınıstrilikter, jalpy sporttyń aınalasynda júrgen atymtaı jomart azamattar jańadan qurylǵan» Qazaqstan sport ardagerleri» RQB-ti jan-jaqty qoldasa eken dep tileımin!

Qazaqta «Birlik bar jerde tirlik bar», «Kóńil kóńilden sý ishedi», dep te beker aıtpaǵan.

Elekeńniń kitabynyń aty da osyǵan úndes keledi. «Kóńilden sport kóshpeıdi».

Dastan KENJALIN,

ASTANA