«Қайрат» пен «Олимпиакос» ойынына билеттер сатылымға шықты

Бұған дейін Алматының «Қайрат» футбол клубының Чемпиондар лигасы аясындағы кезекті матчын Грекияның «Олимпиакос» командасымен Астанадағы «Астана Арена» стадионында ойнайтынын хабарлаған едік.

Енді қолда бар мәліметке қарасақ, жақында «Қайраттың» Астанадағы алғашқы ойынына билеттер сатылымға шықты.

Алматы клубының хабарлауынша,  билеттің бағасы — 15 000 — 50 000 теңге аралығында. Матч 9 желтоқсан күні 20:30–да «Астана Арена» стадионында болады.

— Бір ЖСН-ға екі билеттен артық сатып алуға болмайды. Шетел азаматтары төлқұжат деректерін көрсете алады, — деп хабарлады клуб.

Осыдан кейін «Қайрат» футбол клубы 20 қаңтарда Бельгияның «Брюгге» командасымен де «Астана Арена» стадионында ойнайды.

Оған дейін «Қайраттың» «Реал Мадрид» мен «Пафос» командаларымен ойындары Алматының Орталық стадионында болды. Бұл матчтарға билет 30-250 мың теңге аралығында сатылды.

Дастан КЕНЖАЛИН,

АСТАНА