گولبولدان قازاقستان قۇراماسى العاش رەت التىن مەدال جەڭىپ الدى

جاسوسپىرىمدەر اراسىنداعى V ازيا پارا ويىندارىندا قازاقستاننىڭ گولبولدان ۇلتتىق قۇراماسى تاريحي جەتىستىككە جەتىپ، العاش رەت التىن مەدال يەلەندى، دەپ حابارلادى تۋريزم جانە سپورت مينيسترلىگى.

جارىستا قازاقستان قۇراماسىمەن بىرگە وڭتۇستىك كورەيا، يران، تايلاند جانە ساۋد ارابياسىنىڭ كوماندالارى باق سىنادى. تۋرنير اينالمالى جۇيە بويىنشا ءوتتى.

ءتۋرنيردىڭ باستاپقى كەزەڭىندە قازاقستان قۇراماسى وڭتۇستىك كورەياعا 9:10، يران كومانداسىنا 3:5 ەسەبىمەن جەڭىلدى.

كەيىننەن كوماندا ويىن جۇيەسىن رەتتەپ، تاكتيكالىق تۇرعىدا جيناقتالىپ، ويىنداردىڭ بارىسىن ءوز پايداسىنا شەشە ءبىلدى. ناتيجەسىندە قازاقستان گولبولشىلارى ساۋد ارابياسىن 12:7، تايلاندتى 11:1 ەسەبىمەن جەڭىپ، پلەي-وفف كەزەڭىنە جولداما الدى.

جارتىلاي فينالدا قازاقستان قۇراماسى يران كومانداسىن 7:5 ەسەبىمەن جەڭىپ، فينالدىق باسەكەدە وڭتۇستىك كورەيا قۇراماسىنان 9:6 ەسەبىمەن باسىم ءتۇسىپ، جارىستىڭ التىن جۇلدەگەرى اتاندى.

جارىس قورىتىندىسى بويىنشا قازاقستان قۇراماسى 1-ورىن، وڭتۇستىك كورەيا 2-ورىن، يران 3-ورىنعا تۇراقتادى.

-جارىستا بارلىعى التى ويىن وتكىزدىك. سپورتشىلار جارىسقا جاقسى دايىندىقپەن كەلدى. مەملەكەت قولداۋىمەن الماتى مەن استانادا وقۋ-جاتتىعۋ جيىندارى ۇيىمداستىرىلدى. ناتيجەگە كوڭىلىمىز تولادى. كوماندا قۇرامىنداعى التى سپورتشىنىڭ تورتەۋى ءۇشىن بۇل العاشقى حالىقارالىق جارىس بولعانىنا قاراماستان، ولار وزدەرىن جوعارى دەڭگەيدە كورسەتە ءبىلدى»، — دەدى گولبولدان باس جاتتىقتىرۋشى اندرەي شپەحت.

جاسوسپىرىمدەر اراسىنداعى V ازيا پارا ويىندارى 10–13 جەلتوقسان ارالىعىندا دۋباي قالاسىندا ء(باا) بولدى. وعان 45 ەلدەن 1300-دەن استام سپورتشى قاتىسىپ، 11 سپورت ءتۇرى بويىنشا 481 مەدال جيىنتىعى ساراپقا سالىندى.

اتالعان ويىنداردا قازاقستان قۇراماسى 9 سپورت تۇرىنەن سىنعا ءتۇسىپ، جالپى سانى 68 مەدال جەڭىپ الدى. ونىڭ ىشىندە 25 التىن، 23 كۇمىس جانە 20 قولا جۇلدە بار.