Golboldan Qazaqstan quramasy alǵash ret altyn medal jeńip aldy

Jasóspirimder arasyndaǵy V Azııa Para oıyndarynda Qazaqstannyń golboldan ulttyq quramasy tarıhı jetistikke jetip, alǵash ret altyn medal ıelendi, dep habarlady Týrızm jáne sport mınıstrligi.

Jarysta Qazaqstan quramasymen birge Ońtústik Koreıa, Iran, Taıland jáne Saýd Arabııasynyń komandalary baq synady. Týrnır aınalmaly júıe boıynsha ótti.

Týrnırdiń bastapqy kezeńinde Qazaqstan quramasy Ońtústik Koreıaǵa 9:10, Iran komandasyna 3:5 esebimen jeńildi.

Keıinnen komanda oıyn júıesin rettep, taktıkalyq turǵyda jınaqtalyp, oıyndardyń barysyn óz paıdasyna sheshe bildi. Nátıjesinde Qazaqstan golbolshylary Saýd Arabııasyn 12:7, Taılandty 11:1 esebimen jeńip, pleı-off kezeńine joldama aldy.

Jartylaı fınalda Qazaqstan quramasy Iran komandasyn 7:5 esebimen jeńip, fınaldyq básekede Ońtústik Koreıa quramasynan 9:6 esebimen basym túsip, jarystyń altyn júldegeri atandy.

Jarys qorytyndysy boıynsha Qazaqstan quramasy 1-oryn, Ońtústik Koreıa 2-oryn, Iran 3-orynǵa turaqtady.

-Jarysta barlyǵy alty oıyn ótkizdik. Sportshylar jarysqa jaqsy daıyndyqpen keldi. Memleket qoldaýymen Almaty men Astanada oqý-jattyǵý jıyndary uıymdastyryldy. Nátıjege kóńilimiz tolady. Komanda quramyndaǵy alty sportshynyń tórteýi úshin bul alǵashqy halyqaralyq jarys bolǵanyna qaramastan, olar ózderin joǵary deńgeıde kórsete bildi», — dedi golboldan bas jattyqtyrýshy Andreı Shpeht.

Jasóspirimder arasyndaǵy V Azııa Para oıyndary 10–13 jeltoqsan aralyǵynda Dýbaı qalasynda (BAÁ) boldy. Oǵan 45 elden 1300-den astam sportshy qatysyp, 11 sport túri boıynsha 481 medal jıyntyǵy sarapqa salyndy.

Atalǵan oıyndarda Qazaqstan quramasy 9 sport túrinen synǵa túsip, jalpy sany 68 medal jeńip aldy. Onyń ishinde 25 altyn, 23 kúmis jáne 20 qola júlde bar.