تارازدان شىققان تالانت: بەكارىس اتىبەكتىڭ جارىستارعا دەيىنگى جولى

شاڭعى قوسسايىسشىسى   بەكارىس اتىبەك ەلدە ونەر كورسەتىپ، قۇرمەت تۇعىرىنىڭ ەڭ بيىك ساتىسىنان كورىنىپ جۇرگەن تالانتتى سپورتشى. ول فينليانديا، نورۆەگيا، پولشا مەن رەسەيدە جالاۋى كوتەرىلگەن جارىستارعا قاتىسىپ، كوزگە تۇسكەن.

قازىر تاراز قالاسىنان شىققان سپورتشى ۇلتتىق قۇراما دەڭگەيىنە دەيىن كوتەرىلىپ، FIS جانە Continental Cup جارىستارىنا قاتىسىپ ءجۇر. بۇل دەڭگەيدە سكانديناۆيا مەكتەپتەرى مەن قىسقى سپورت تۇرلەرىنىڭ ەڭ مىقتى وكىلدەرى باسىمدىققا يە.

شاڭعى قوسسايىسىندا كەزدەيسوق ستارتتار بولمايدى. ەگەر سپورتشى فينليانديا نەمەسە نورۆەگياداعى ترامپليندەر مەن تراسسالاردا جارىسقا شىقسا، بۇل ونىڭ اتالعان سپورت ءتۇرىنىڭ الەمدىك جۇيەسىنە ەنگەنىن بىلدىرەدى. بۇگىندە قازاقستان رەسپۋبليكاسىنىڭ سپورت شەبەرى، ۇلتتىق قۇرامانىڭ مۇشەسى بەكارىس اتىبەك ءدال وسى دەڭگەيدە باق سىناپ ءجۇر.

ول 2003 جىلدىڭ 4 ساۋىرىندە تاراز قالاسىندا تۋعان. بۇل قالا ۇلكەن قىسقى سپورتقا اپاراتىن نەگىزگى ورتالىقتاردىڭ قاتارىنا كىرمەيدى. 2015 جىلى الماتى قالاسىنا قونىس اۋدارىپ، سول جىلى بەكارىس شاڭعى قوسسايىسىن تاڭدادى. بۇل — ترامپليننەن سەكىرۋ مەن شاڭعى جارىسىن بىرىكتىرەتىن، ناتيجەگە جەتۋ جولى سىرت كوزگە كورىنگەننەن الدەقايدا ۇزاق سپورت ءتۇرى.

العاشقى تابىستى قادامدار جاسوسپىرىمدەر دەڭگەيىندە بايقالدى. 2015 جىلى ول قازاقستان رەسپۋبليكاسىنىڭ II قىسقى جاسوسپىرىمدەر ويىندارىندا جەڭىمپاز ءارى جۇلدەگەر اتاندى. ال 2019 جىلى قر III قىسقى جاسوسپىرىمدەر ويىندارىندا توپ جاردى. بۇل جارىستار ونىڭ جاستار جانە ەرەسەكتەر سپورتىنا وتۋىنە بەرىك نەگىز قالادى.

2019 جىلى بەكارىس سپورت شەبەرىنە كانديدات ءنورماتيۆىن ورىندادى. 2020 جىلى قىسقى سپورت تۇرلەرى بويىنشا وليمپيادالىق دايارلاۋ ورتالىعىنا قابىلدانىپ، قازاقستاننىڭ جاسوسپىرىمدەر قۇراماسىنا ەندى. ال 2021 جىلى قازاقستان رەسپۋبليكاسىنىڭ سپورت شەبەرى اتاعىن الىپ، قازاقستان رەسپۋبليكاسىنىڭ ۇلتتىق وليمپيادالىق كوميتەتى ارقىلى ۇلتتىق قۇراما ساپىنا قوسىلدى.

وسى كەزەڭنەن باستاپ ونىڭ سپورتتىق مانسابىنداعى حالىقارالىق كەزەڭ باستالدى. 2021 جىلى بەكارىس رەسەيدىڭ نيجني تاگيل قالاسىندا وتكەن Continental Cup جارىستارىندا دەبيۋت جاسادى. بۇل جارىستاردا ءداستۇرلى تۇردە رەسەي مەن ەۋروپانىڭ ەڭ مىقتى سپورتشىلارى قاتىسادى. سول جىلى ول فينليانديانىڭ رۋكا قالاسىندا وتكەن Continental Cup كەزەڭدەرىندە دە ونەر كورسەتتى. رۋكا — سكانديناۆياداعى شاڭعى قوسسايىسىنىڭ باستى ورتالىقتارىنىڭ ءبىرى.

2022 جىلى سپورتشى پولشانىڭ زاكوپانە قالاسىندا وتكەن FIS Junior World Ski Championships الەم چەمپيوناتىنا (ونىڭ ىشىندە كوماندالىق جارىستارعا) قاتىستى. سونىمەن قاتار نورۆەگيانىڭ نوتوددەن قالاسىندا وتكەن FIS Cup كەزەڭدەرىندە باق سىنادى.

حالىقارالىق ستارتتارمەن قاتار، بەكارىس ەل ىشىندەگى جارىستاردا دا ءوز دەڭگەيىن تۇراقتى تۇردە دالەلدەپ كەلەدى. 2018–2024 جىلدار ارالىعىندا ول قازاقستان رەسپۋبليكاسىنىڭ چەمپيوناتتارى مەن كۋبوكتارىندا ۇنەمى جۇلدەلى ۇشتىككە ەنىپ، ەل بىرىنشىلىگى مەن ۇلتتىق كۋبوك جارىستارىندا جۇلدەلى ورىندارعا يە بولدى.

بەكارىس اتىبەكتىڭ سپورتتىق قالىپتاسۋىندا الماتى قالاسىنىڭ شاڭعى ترامپلينىنەن سەكىرۋ بويىنشا اعا جاتتىقتىرۋشىسى كۋرگانسكي ۆلاديمير ۆيكتوروۆيچتىڭ ەڭبەگى ەرەكشە.

-اتىبەك بەكارىس سوڭعى جەتى جىل بويى مەنىڭ جەتەكشىلىگىمدە جاتتىقتى. وسى ۋاقىت ىشىندە ول ءوزىن ەڭ جاقسى قىرىنان كورسەتە ءبىلدى. ونىڭ ەڭبەكقورلىعى، جاتتىعۋ پروتسەسىنە دەگەن جاۋاپكەرشىلىكتى كوزقاراسى جانە جاتتىقتىرۋشى مەن سپورتشى اراسىنداعى ادامي قارىم-قاتىناسى ءاردايىم جوعارى دەڭگەيدە بولدى، — دەدى جاتتىقتىرۋشى.

دايىندىق پروتسەسى ءجاسوسپىرىم جاستان باستالىپ، كەزەڭ-كەزەڭىمەن جۇرگىزىلدى. ۋاقىت وتە كەلە بەكارىس ۇلكەن ترامپليندەرگە اۋىسىپ، رەسپۋبليكالىق جارىستاردان باستاپ جاستار جانە ەرەسەكتەر اراسىنداعى قازاقستان چەمپيوناتتارىنا دەيىنگى دەڭگەيگە كوتەرىلدى. ناتيجەسىندە ول بۇل جارىستاردا جۇلدەلى ورىندارعا يە بولا باستادى.

باپكەردىڭ ايتۋىنشا، بەكارىس 90 جانە 120 مەترلىك ۇلكەن ترامپليندەردە ءوزىن ەرەكشە جاقسى قىرىنان كورسەتتى. بۇل ونىڭ جارىستارداعى ناتيجەلەرىمەن تولىق دالەلدەنەدى. جاتتىعۋ پروتسەسى الماتى قالاسىنداعى زاماناۋي سپورتتىق كەشەندە ءوتتى، بۇل ساپالى دايىندىققا تولىق مۇمكىندىك بەردى.

-ءبىزدىڭ سپورت ءتۇرىمىز سپورتشىدان جوعارى دەڭگەيدەگى شوعىرلانۋدى تالاپ ەتەدى. بەكارىس بۇل تالاپتاردى تولىق ورىنداي ءبىلدى. ول جاتتىقتىرۋشىلار قۇرامىمەن ءتيىمدى جۇمىس ىستەپ، بەرىلگەن باعدارلامانى ادال ءارى تولىق ورىندادى، — دەپ اتاپ ءوتتى كۋرگانسكي.

ايتا كەتەرلىگى، سپورتتىق مانساپ بەكارىس ءۇشىن جالعىز باعىت بولعان جوق. ول رەسپۋبليكالىق سپورت كوللەدجىن ءتامامداپ، كەيىن نارحوز ۋنيۆەرسيتەتىنىڭ ەكونوميكالىق كوللەدجىن «بانك ءىسى» ماماندىعى بويىنشا اياقتادى.

بۇگىندە بەكارىس اتىبەك — قازاقستاننىڭ FIS جانە Continental Cup جارىستارىنداعى تۇراقتى قاتىسۋىن قالىپتاستىرىپ جۇرگەن سپورتشىلاردىڭ ءبىرى. ونىڭ جولى — ءبىر ساتتىك تابىستىڭ ەمەس، وڭىردەن شىعىپ، نورۆەگيالىقتار مەن فيندەرمەن، سونداي-اق الەمدەگى ەڭ مىقتى قىسقى سپورت مەكتەپتەرىنىڭ وكىلدەرىمەن باسەكەگە تۇسەتىن دەڭگەيگە جۇيەلى ەڭبەك ارقىلى جەتۋدىڭ ايقىن ۇلگىسى

رۇستەم جۇمان،

استانا