قىر استىندا اق وليمپيادا

بيىل – قىسقى وليمپيادا جىلى. بيىل تاعى دا سايىپقىراندارىمىز ءتورت جىلدا ءبىر كەلەتىن وسىناۋ دۇرمەكتى دودادا باق سىنايدى. بۇل بايراقتى باسەكە 7-16 اقپان ارالىعىندا يتاليانىڭ ميلان مەن كورتينا-د’امپەتستسو قالالارىندا بولادى.

وي̆ىنداردىڭ رەسمي بەلگىلەرى – تينا جانە ميلو اتتى ەكى اقكىس. ولاردىڭ ەسكيزىن مەكتەپ وقۋشىلارى ازىرلەگەن. بارلىعى 1600 ديزاي̆ن ۇسىنىسى قابىلدانعان.

يتاليا تاريحتا ءتورتىنشى رەت وليمپييا وي̆ىندارىن وتكىزەدى. ميلاندا العاش رەت وليمپيادانىڭ جالاۋى كوتەرىلەدى. ال كورتينا-د’امپەتستسودا جارىستى ەكىنشى رەت بولادى. بۇعان دەي̆ىن 1956 جىلى وليمپيادا وتكەن.

بيىلعى وليمپيادادا 16 سپورت تۇرىنەن 100-گە جۋىق مەدال جيىنتىعى ساراپقا سالىنادى. بۇل سپورت تۇرلەرىنە بياتلون، بوبسلەي̆، تاۋ شاڭعىسى، كەرلينگ، كونكيمەن جۇگىرۋ سپورتى، شاڭعى جارىسى، شاڭعى قوسساي̆ىسى، فريستاي̆ل، ترامپليننەن سەكىرۋ، شانا سپورتى، سكەلەتون، سكي-الپينيزم، سنوۋبورد، مانەرلەپ سىرعاناۋ، شاي̆بالى حوككەي̆ جانە شورت-ترەك كىرەدى. وليمپيا وي̆ىندارىنا العاش رەت سكي-الپينيزم ەنگىزىلەدى.

قازاقستان قىسقى ويىنداردا

جالپى، جازعى، قىسقى سپورت تۇرلەرىنەن بولسىن وليمپيا ويىندارىنىڭ ورنى بولەك. بۇل – 1991 جىلى ەلىمىز تاۋەلسىزدىگىنىڭ تاڭى ارايلاپ اتقان كەزدەن بەرى سپورتشىلارىمىزدىڭ قاتىساتىن توعىزىنشى وليمپيادا. بۇعان دەيىن ءبىزدىڭ قۇراما 1994 جىلى نورۆەگيانىڭ ليللەحاممەر قالاسىندا وتكەن قىسقى ويىندارعا، ودان كەيىن 1998 جىلى جاپونيانىڭ ناگانو، 2002 جىلى اقش-تىڭ سولت-لەيك-سيتي، 2006 جىلى يتاليانىڭ تۋرين، 2010 جىلى كانادانىڭ ۆانكۋۆەر، 2014 جىلى رەسەيدىڭ سوچي، 2018 جىلى وڭتۇستىك كورەيانىڭ پحەنچحان مەن 2022 جىلى قىتايدىڭ بەيجىڭ قالالارىندا وتكەن وليمپيا ويىندارىنا قاتىستى.

2026 جىلعى قىسقى وليمپيا ويىندارىنىڭ باستالۋىنا از ۋاقىت قالدى. وسىعان وراي، ەلىمىزدىڭ تاۋەلسىزدىك العاننان بەرگى قىسقى وليمپيادالارداعى ناتيجەلەرىنە قىسقاشا توقتالىپ، شولۋ جاساۋدى ءجون كوردىك.

ەلىمىز تاۋەلسىزدىك العاننان كەيىن 1994 جىلى العاش رەت اق وليمپيادادا باق سىنادى. بۇل ءدۇبىرلى دوداعا قازاقستاننان 29 سپورتشى قاتىستى. ەگەمەندىكتىڭ ەلەڭ-الاڭىندا وتىزعا جۋىق وتانداسىمىزدىڭ كوك بايراعىمىزدى كوتەرىپ، سكانديناۆيا تۇبەگىندەگى جارىستا تۋىمىزدى تىگۋىنىڭ ءوزى جەتىستىك ەدى. وليمپيادادا قازاقستان قۇراماسى سپورتتىڭ 8 تۇرىنەن كۇش سىناستى. اتاپ ايتقاندا، بياتلون، تاۋ شاڭعى سپورتى، كونكيمەن جۇگىرۋ سپورتى، شاڭعى جارىسى، شاڭعىمەن تۇعىردان سەكىرۋ، مانەرلەپ سىرعاناۋ، فريستايل جانە شورت-ترەك. بۇل سىندا قازاقستانعا العاش التىن مەدالدى شاڭعىشى ۆلاديمير سميرنوۆ سىيلادى. سونىمەن بىرگە ول تاعى ەكى كۇمىس جۇلدەنى جەڭىپ الدى.

ودان كەيىن اراعا ءتورت جىل سالىپ، 1998 جىلى جاپونيانىڭ ناگانو قالاسىندا وتكەن قىسقى ويىنداردا قازاقستان قۇراماسى ەكى ەسە سپورتشىنى اپارىپ، سپورتتىڭ 8 تۇرىنەن ەل نامىسىن قورعادى. بۇل جارىستا 60 ساڭلاعىمىز تاۋ شاڭعى سپورتى، شايبالى حوككەي، بياتلون، شاڭعى جارىسى، مانەرلەپ سىرعاناۋ، فريستايل، كونكيمەن جۇگىرۋ سپورتى، شاڭعىمەن تۇعىردان سەكىرۋدەن سىنعا ءتۇستى. جارىستا وتانداستارىمىز ەكى قولا جۇلدەنى يەلەندى.

كونكيمەن جۇگىرۋشى ليۋدميلا پروكاشەۆا 5 000 مەتر قاشىقتىقتا جۇلدەگەرلەر قاتارىنان كورىنسە، شاڭعى جارىسىنان ءىز كەسۋ سايىسىندا ۆلاديمير سميرنوۆ ءۇشىنشى ورىنعا شىقتى. وسىلايشا، قازاقستان ەكى قولا جۇلدەمەن جالپىكوماندالىق ەسەپتە 20-ورىندى يەلەندى.

كەلەسى وليمپيادا 2002 جىلى اقش-تىڭ سولت-لەيك-سيتي قالاسىندا جالاۋ كوتەردى. بۇل دودادا 50 سپورتشى جارىستىڭ 7 سپورت تۇرىنەن ونەر كورسەتتى. اتاپ ايتقاندا، تاۋ شاڭعى سپورتى، شاڭعىمەن تۇعىردان سەكىرۋ، شاڭعى جارىسى، كونكيمەن جۇگىرۋ سپورتى، شايبالى حوككەي، فريستايل، بياتلون. بىراق، ولاردىڭ ەشقايسىسى قۇرمەت تۇعىرىنا كوتەرىلمەي، ەلگە قايتتى.

2006 جىلى يتاليانىڭ تۋرين قالاسىندا وتكەن وليمپيادادا دا وتانداستارىمىز جۇلدە العان جوق. اپپەنين تۇبەگىنە 55 سپورتشى بارعان بولاتىن. ولار سپورتتىڭ 7 تۇرىنەن اتاپ ايتقاندا، بياتلون، تاۋ شاڭعى سپورتى، كونكيمەن جۇگىرۋ سپورتى، شاڭعى جارىسى، شاڭعىمەن تۇعىردان سەكىرۋ، فريستايل، شايبالى حوككەي.

2010 جىلى ۆانكۋۆەردە جالاۋى كوتەرىلگەن وليمپيا ويىندارىندا قازاقستان 8 جىلدان كەيىن ءبىر كۇمىس مەدال الدى. ايەلدەر اراسىنداعى 15 شاقىرىمدىق جەكەلەي جارىستا بياتلونشى ەلەنا حرۋستالەۆا وليمپيادا جۇلدەگەرى اتاندى. وسى وليمپيادادا 37  وتانداسىمىز سپورتتىڭ 8 سپورت تۇرىنەن (بياتلون، تاۋ شاڭعى سپورتى، كونكيمەن جۇگىرۋ سپورتى، شاڭعى جارىسى، شاڭعىمەن تۇعىردان سەكىرۋ، فريستايل، مانەرلەپ سىرعاناۋ، شورت-ترەك) كۇش سىناسىپ، جالپىكوماندالىق ەسەپتە 25-ورىنعا يە بولدى.

2014 جىلى رەسەيدىڭ سوچيدە قالاسىندا وتكەن وليمپيادادا 51 سپورتشى  قازاقستان اتىنان جارىستىڭ 10 تۇرىنەن ونەر كورسەتتى. ولار بياتلون، تاۋ شاڭعى سپورتى، كونكيمەن جۇگىرۋ سپورتى، شاڭعى جارىسى، شاڭعىمەن تۇعىردان سەكىرۋ، شانا سپورتى، سنوۋبورد، مانەرلەپ سىرعاناۋ، فريستايل، شورت ترەكتەن سىنعا ءتۇستى. قىسقى وليمپيادانىڭ قورىتىندىسى بويىنشا مانەرلەپ سىرعاناۋشى دەنيس تەن قولا مەدالدى جەڭىپ الدى. وسى ناتيجەمەن قازاقستان جالپىكوماندالىق ەسەپتە 26-ورىنعا ورنالاستى.

2018 جىلى پحەنچحاندا (وڭتۇستىك كورەيا) وتكەن قىسقى وليمپيا ويىندارىنا 46 سپورتشى قاتىستى. وتانداستارىمىز سپورتتىڭ 9  تۇرىنەن سىنعا ءتۇستى. سپورتشىلار بياتلون، تاۋ شاڭعى سپورتى، كونكيمەن جۇگىرۋ سپورتى، شاڭعى جارىسى، شاڭعىمەن تۇعىردان سەكىرۋ، شانا سپورتى، مانەرلەپ سىرعاناۋ، فريستايل، شورت-ترەكتەن كۇش سىناسىپ، ءبىر مەدالدى قاناعات تۇتتى. بۇل جارىستا يۋليا گالىشەۆا فريستايل-موگۋلدان قولا مەدال الىپ، قازاقستان جالپىكوماندالىق ەسەپتە 28-ءشى ورىنعا ورنالاستى.

سوڭعى قىسقى وليمپيادا ويىندارى 2022 جىلى قىتايدىڭ بەيجىڭ قالاسىندا بولدى. بۇل دوداعا 34 سپورتشى قاتىستى. ولار 8 سپورت تۇرىنەن (شاڭعى جارىسى، كونكيمەن جۇگىرۋ سپورتى، بياتلون، شورت-ترەك، شاڭعىمەن تۇعىردان سەكىرۋ، تاۋ شاڭعى سپورتى، شاڭعى قوسسايىسى، فريستايل) جارىستى. الايدا، ەشكىم مەدالعا العان جوق.

ەندى بيىلعى وليمپياداعا وتانداستارىمىز بىرنەشە سپورت تۇرىنەن جولداما الىپ ۇلگەردى. قازاقستان قۇراماسىنىڭ سپورتشىلارى مانەرلەپ سىرعاناۋ، شورت-ترەك جانە كونكيمەن جۇگىرۋ سپورتىنان ىرىكتەۋ كەزەڭىنەن ءوتتى.

شاڭعىمەن تۇعىردان سەكىرۋ جارىستارى ۆال-دي-فەممە ايماعىندا ورنالاسقان Predazzo Olympic Ski Jumping Stadium ترامپلين كەشەنىندە بولادى. بۇل جەر وليمپيادا تالاپتارىنا سايكەس تولىق جاڭارتىلىپ، حالىقارالىق دەڭگەيدەگى جارىستاردى وتكىزۋگە بەيىمدەلگەن. كەشەن 1989 جىلى پايدالانۋعا بەرىلىگەن. وندا 1990 جىلى العاش رەت الەم چەمپيوناتىنىڭ جالاۋى كوتەرىلگەن.

دۇرمەكتى دوداعا دايىندىق

قازىر تۋريزم جانە سپورت مينيسترلىگى ۇلتتىق كوماندانى ححV قىسقى وليمپياداعا دايىنداۋدىڭ كەشەندى جوسپارىن ازىرلەدى. قولدا بار مالىمەتكە قاراعاندا، وليمپياداعا ەل قۇراماسىنان شامامەن 35 سپورتشى بارادى. سپورتشىلار قىسقى وليمپيادانىڭ 10 ديستسيپليناسى بويىنشا باق سىناۋدى جوسپارلاپ وتىر. ولاردىڭ قاتارىندا بياتلون، كونكيمەن جۇگىرۋ سپورتى، مانەرلەپ سىرعاناۋ، شورت-ترەك، شاڭعى جارىسى، شاڭعىمەن ترامپليننەن سەكىرۋ، شاڭعى قوسسايىسى، تاۋ شاڭعىسى سپورتى، فريستايل-موگۋل جانە فريستايل-اكروباتيكا بار.

-قازىرگى كەزدە سوفيا سامودەلكينا مەن ميحايل شايدوروۆتىڭ مانەرلەپ سىرعاناۋدان ەكى جەكە رەسمي وليمپيادا ليتسەنزيالارى بار. سونىمەن قاتار سپورتشىلارىمىز شورت-ترەكتەن – 9، كونكيمەن جۇگىرۋدەن 12 ليتسەنزيا جەڭىپ الدى. كوماندانىڭ تۇپكىلىكتى قۇرامى سپورتشىلاردىڭ حالىقارالىق جارىستارداعى ناتيجەلەرىنە قاراي قالىپتاستىرىلادى. وليمپيادا كۆوتالارىنىڭ ناقتى سانى 2026 جىلعى قاڭتاردىڭ سوڭىندا بەلگىلى بولادى. كەشەندى جوسپاردى ىسكە اسىرۋ اياسىندا مينيسترلىك رەسپۋبليكالىق سپورت فەدەراتسيالارىمەن جانە وڭىردەگى اكىمدىكتەرىمەن بىرلەسىپ جاتتىعۋ ۇدەرىسىن قامتاماسىز ەتۋ بويىنشا جۇيەلى جۇمىس جۇرگىزدى. اتاپ ايتقاندا، قىسقى سپورت تۇرلەرى بويىنشا ۇلتتىق قۇرامالار 178 وقۋ-جاتتىعۋ جيىنىن وتكىزىپ، 125 حالىقارالىق جارىسقا قاتىستى، — دەلىنگەن ۆەدومستۆونىڭ حابارلاماسىندا.

بۇدان باسقا مينيسترلىكتىڭ حابارلاۋىنشا، سپورتشىلار مەديتسينالىق-پسيحولوگيالىق قولداۋ، قارجىلىق قولداۋ، قاجەتتى سپورتتىق قۇرال-جابدىقتار، تاماقتانۋ جانە بىلىكتى جاتتىقتىرۋشىلارمەن جۇمىس جاساۋ قاراستىرىلعان. جاتتىقتىرۋشىلار قۇرامىنا الەم چەمپيوناتتارى مەن وليمپيادادا تاجىريبەسى بار جوعارى دەڭگەيدەگى ماماندار تارتىلعان. اتاپ ايتقاندا، گەرمانيا، نيدەرلاند، يسپانيا، سلوۆەنيا، پولشا، رەسەي جانە بەلارۋس ەلدەرىنەن مانەرلەپ سىرعاناۋ، كونكيمەن جۇگىرۋ، شاڭعى جارىسى، شورت-ترەك جانە بياتلون بويىنشا 13 شەتەلدىك توپ-دەڭگەيدەگى جاتتىقتىرۋشى-كەڭەسشى سپورتشىلارىمىزدىڭ ساپالى دايىندىعىنا جۇمىلدىرىلدى. تۋريزم جانە سپورت مينيسترلىگى ۇلتتىق قۇرامانىڭ باسەكەگە قابىلەتتى دايارلىعىن قامتاماسىز ەتۋ جانە وتاندىق سپورتشىلاردىڭ تورتجىلدىقتىڭ باستى دوداسىندا جاقسى ونەر كورسەتۋى ءۇشىن قاجەتتى جاعدايلاردى جاساۋ باعىتىنداعى جۇيەلى جۇمىسىن جالعاستىرۋدا.

وسىعان بايلانىستى جاقىندا تۋريزم جانە سپورت مينيسترلىگىندە ححV قىسقى وليمپياداعا قاتىساتىن ۇلتتىق قۇرامانىڭ سپورتتىق كيىم جيىنتىعى تانىستىرىلدى. جابدىقتىڭ تەحنيكالىق تالاپتارىن كەلىسۋ، ۇلگىلەرىن بەكىتۋ جانە جەتكىزىلەتىن سپورتتىق كيىمنىڭ ساپاسىن باقىلاۋ ماقساتىندا ارنايى جۇمىس كوميسسياسى قۇرىلدى. ونىڭ قۇرامىنا تۋريزم جانە سپورت مينيسترلىگىنىڭ، ۇلتتىق وليمپيادا كوميتەتىنىڭ، ۆەدومستۆولىق باعىنىستى ۇيىمداردىڭ وكىلدەرى، سونداي-اق تانىمال وتاندىق سپورتشىلار كىردى. جۇمىس كوميسسياسى ۇلتتىق قۇرامانىڭ سپورتتىق كيىمىنىڭ ەسكيزىن بەكىتتى. قازىرگى ۋاقىتتا بۇل ەسكيز حالىقارالىق وليمپيادا كوميتەتىندە كەلىسۋ راسىمىنەن ءوتىپ جاتىر. سپورتتىق كيىم جيىنتىعى 22 اتاۋدان تۇرادى. ونىڭ ىشىنە وليمپيادانىڭ اشىلۋ جانە جابىلۋ سالتاناتتارىنا ارنالعان سالتاناتتى فورما، جارىس كەزەڭىندە پايدالانىلاتىن جىلى سىرت كيىمدەر، سونداي-اق وقۋ-جاتتىعۋ جيىندارى مەن كۇندەلىكتى قولدانۋعا ارنالعان جاتتىعۋ جانە كۇندەلىكتى كيىمدەر كىرەدى. سونداي-اق ۇلتتىق قۇرامانىڭ سپورتتىق كيىمى دەمەۋشىلەر ەسەبىنەن ساتىپ الىنعانىن ايتا كەتكەن ءجون. تۋريزم جانە سپورت مينيسترلىگى 2026 جىلعى قىسقى وليمپياداعا دايىندىق بويىنشا جوسپارلى جۇمىستارىن جالعاستىرۋدا.

 

داستان كەنجالين،

استانا