الماتى جاستارى كيبەرسپورتتان جارىستى

الماتى قالاسى جاستار ساياساتى باسقارماسىنىڭ «دۇيسەنبىلىك سپورت» جوباسى اياسىندا Real كومپيۋتەرلىك كلۋبىندا Social project management ورتالىعىنىڭ ۇيىمداستىرۋىمەن NEET ساناتىنداعى جاستار اراسىندا كيبەرسپورتتان تۋرنير بولدى.

وعان «بايسات»، «كەنجەحان»، «التىن وردا»، «سالەم» «وجەت»، «ارىستان» مەن  باسقا دا بازارلاردان 30 ويىنشى قاتىستى. تۋرنيرگە كيبەرسپورت ماماندارى تورەلىك جاسادى.

كيبەرسپورتتىڭ ءتۇرى كوپ ەكەنى بەلگىلى. ۇيىمداستىرۋشىلار مەن قاتىسۋشىلاردىڭ ۇيعارىمىمەن تۋرنير ويىنى رەتىندە كيبەرسپورتتىڭ FIFA 25 نۇسقاسى تاڭدالدى. ويىنشىلار وزدەرىنە ۇنايتىن كوماندالاردى يەلەنىپ، سول ارقىلى كومپيۋتەر ەكرانىندا ويىن ورنەگىن كورسەتتى.

جاستار فۋتبول كوماندالارى رەتىندە «رەال مادريد»، «پسج»، «باۆاريا»، «گالاتاساراي»، «ينتەر مايامي»، «چەلسي»  سياقتى ۇزدىك كلۋبتاردى تاڭداپ، وزدەرى «تىزگىندەگەن» وسى كلۋبتار ارقىلى ءبىر-بىرىمەن جارىستى.

جارىستىڭ تارتىس بولعانى سونشالىق، تۇتقانى قوس قولدارىنا مىعىم ۇستاعان ويىنشىلار الدارىنداعى ەكراننان كوز المادى. گول سوققان ساتتە قۋانىپ سەرگىپ قالعان قاتىسۋشىلار دا، «قاپ اتتەگەن-اي» دەپ سان سوعىپ قالعاندار دا بولدى. ەڭ باستىسى جەڭىلگەندەر جەڭگەندەردى مويىنداپ، جەڭگەندەر جەڭىلگەندەردى ارقادان قاعىپ جۇباتىپ جاتتى.

تۋرنيرگە قاتىسۋشىلاردىڭ ءبىرى نۇرلان ءىلياس تۋرنير كەزىندە بىلاي دەپ ءوز ويىن ءبىلدىردى.

-ءبىر جىلدارى كيبەرسپورتتى قۇمار ويىندار قاتارىنا جاتقىزاتىنمىن. بۇل ويىم قاتە ەكەنىن كەيىن ءبىلدىم. كيبەرسپورتتىڭ وليمپيادالىق ويىندار تىزىمىندە ەكەنىن ەستىگەنىمدە العاشىندا سەنبەدىم. انىق كوزىم جەتكەن سوڭ وسى سپورتتىڭ ىزىنە ءتۇسىپ، ويىن داعدىمدى جەتىلدىرىپ كەلەمىن. كيبەرسپورت ادامدى شاپشاڭدىققا، اڭعارىمپازدىققا، العىرلىققا باۋليدى ەكەن. مۇقيات بولماساڭ اياق استىنان ءمۇلت كەتەسىڭ، — دەدى ول.

جارىس قورىتىندىسى بويىنشا ءبىرىنشى ورىندى «التىن وردا» بازارىنان كەلگەن ساپاربەك جانىبەك يەلەنىپ، 250 مىڭ تەڭگەنىڭ سەرتيفيكاتىن قانجىعاسىنا بايلادى. ەكىنشى ورىن «كار سيتي» بازارىنىڭ تاعى ءبىر ويىنشىسى ايات يكەتايعا بۇيىرىپ، 150 مىڭ تەڭگەنىڭ سەرتيفيكاتىن ەنشىلەدى. «سالامات» بازارىنىڭ ويىنشىسى الىبەك تۇرىسبەك پەن «بايسات» بازارىنىڭ نامىسىن قورعاعان مىرزابەك قوشتىقوۆ ءۇشىنشى ورىندى ءوزارا ءبولىسىپ، ارقايسىسى 50 مىڭ تەڭگەدەن ولجالادى. جەڭىمپازدارعا سەرتيفيكاتتار مەن مەدال، كۋبوكتاردى ءتۋرنيردىڭ قۇرمەتتى قوناعى – بوكستان قازاقستان رەسپۋبليكاسىنىڭ سپورت شەبەرى الياس التاي تابىس ەتتى.

بۇگىنگى كيبەرسپورت جارىسى «دۇيسەنبىلىك سپورت» جوباسى اياسىندا وتكەن العاشقى تۋرنير. الداعى ۋاقىتتا بازار جاستارى اراسىندا ۆولەيبولدان، شاعىن فۋتبولدان، ۇستەل تەننيسىنەن، سۋعا جۇزۋدەن تۋرنيرلەر وتكىزۋ جوسپارلانىپ وتىر.

ءنازيرا بۋرحانوۆا،

الماتى