Almaty jastary kıbersporttan jarysty

Almaty qalasy Jastar saıasaty basqarmasynyń «Dúısenbilik sport» jobasy aıasynda Real kompıýterlik klýbynda Social project management ortalyǵynyń uıymdastyrýymen NEET sanatyndaǵy jastar arasynda kıbersporttan týrnır boldy.

Oǵan «Baısat», «Kenjehan», «Altyn orda», «Salem» «О́jet», «Arystan» men  basqa da bazarlardan 30 oıynshy qatysty. Týrnırge kıbersport mamandary tórelik jasady.

Kıbersporttyń túri kóp ekeni belgili. Uıymdastyrýshylar men qatysýshylardyń uıǵarymymen týrnır oıyny retinde kıbersporttyń FIFA 25 nusqasy tańdaldy. Oıynshylar ózderine unaıtyn komandalardy ıelenip, sol arqyly kompıýter ekranynda oıyn órnegin kórsetti.

Jastar fýtbol komandalary retinde «Real Madrıd», «PSJ», «Bavarııa», «Galatasaraı», «Inter Maıamı», «Chelsı»  sııaqty úzdik klýbtardy tańdap, ózderi «tizgindegen» osy klýbtar arqyly bir-birimen jarysty.

Jarystyń tartys bolǵany sonshalyq, tutqany qos qoldaryna myǵym ustaǵan oıynshylar aldaryndaǵy ekrannan kóz almady. Gol soqqan sátte qýanyp sergip qalǵan qatysýshylar da, «qap áttegen-aı» dep san soǵyp qalǵandar da boldy. Eń bastysy jeńilgender jeńgenderdi moıyndap, jeńgender jeńilgenderdi arqadan qaǵyp jubatyp jatty.

Týrnırge qatysýshylardyń biri Nurlan Ilııas týrnır kezinde bylaı dep óz oıyn bildirdi.

-Bir jyldary kıbersportty qumar oıyndar qataryna jatqyzatynmyn. Bul oıym qate ekenin keıin bildim. Kıbersporttyń Olımpıadalyq oıyndar tiziminde ekenin estigenimde alǵashynda senbedim. Anyq kózim jetken soń osy sporttyń izine túsip, oıyn daǵdymdy jetildirip kelemin. Kıbersport adamdy shapshańdyqqa, ańǵarympazdyqqa, alǵyrlyqqa baýlıdy eken. Muqııat bolmasań aıaq astynan múlt ketesiń, — dedi ol.

Jarys qorytyndysy boıynsha birinshi oryndy «Altyn orda» bazarynan kelgen Saparbek Jánibek ıelenip, 250 myń teńgeniń sertıfıkatyn qanjyǵasyna baılady. Ekinshi oryn «Kar sıtı» bazarynyń taǵy bir oıynshysy Aıat Iketaıǵa buıyryp, 150 myń teńgeniń sertıfıkatyn enshiledi. «Salamat» bazarynyń oıynshysy Álibek Turysbek pen «Baısat» bazarynyń namysyn qorǵaǵan Myrzabek Qoshtyqov úshinshi oryndy ózara bólisip, árqaısysy 50 myń teńgeden oljalady. Jeńimpazdarǵa sertıfıkattar men medal, kýboktardy týrnırdiń qurmetti qonaǵy – bokstan Qazaqstan Respýblıkasynyń sport sheberi Alııas Altaı tabys etti.

Búgingi kıbersport jarysy «Dúısenbilik sport» jobasy aıasynda ótken alǵashqy týrnır. Aldaǵy ýaqytta bazar jastary arasynda voleıboldan, shaǵyn fýtboldan, ústel tennısinen, sýǵa júzýden týrnırler ótkizý josparlanyp otyr.

Názıra BÝRHANOVA,

ALMATY