SportPress.kz قازاقستان سپورت جاڭالىقتارى
بۇگىن الماتى وبلىستىق ءماسليحاتىنىڭ دەپۋتاتى نۇرسۇلتان جۇماباي ۇلى ورىنباساروۆ پەن توتەنشە جاعدايلار مينيسترلىگىنىڭ قىزمەتكەرى، لەيتەنانت سارا باقتىبايقىزى راحمونوۆا جاڭا كونستيتۋتسيانى قابىلداۋ جونىندەگى رەسپۋبليكالىق رەفەرەندۋمدا داۋىس بەرۋگە قاتىستى.
وبلىستىق ءماسليحات دەپۋتاتى ىلە اۋدانى، مۇحامەتجان تۇيمەباەۆ اۋىلىنداعى «كەلەشەك» مەكتەبىنىڭ عيماراتىندا ورنالاسقان №1058 داۋىس بەرۋ ۋچاسكەسىندە تاڭداۋ جاسادى. سپورت پەن مەملەكەتتىك قىزمەتتى قاتار الىپ جۇرگەن تانىمال جۇپ سايلاۋ ۋچاسكەسىنە ءبىر جاسار قىزدارى ءتوميريستى ەرتە كەلدى.
نۇرسۇلتان ورىنباساروۆ — «Sagadat Batyr» سپورت كلۋبىنىڭ نەگىزىن قالاۋشى جانە 5000-نان استام شاكىرت تاربيەلەگەن بىلىكتى مامان. بۇگىندە ول قورعانىس مينيسترلىگىنىڭ قولداۋىمەن جۇزەگە اسىپ جاتقان «Sarbaz+» جوباسى اياسىندا اسكەري قىزمەتشىلەر مەن ارنايى جاساق وكىلدەرىنىڭ كاسىبي دايىندىعىن شىڭداۋعا، وتاندىق اسكەر سالاسىنا دجيۋ-دجيتسۋ سپورتىن ەنگىزۋگە جەتەكشىلىك ەتەدى.
ال ونىڭ جارى سارا راحمونوۆا — قويان-قولتىق ۇرىستان قازاق قىزدارى اراسىنداعى تۇڭعىش ءۇش دۇركىن الەم چەمپيونى. قازىرگى تاڭدا تجم قۇتقارۋشىلارى قاتارىندا ابىرويلى قىزمەت اتقارىپ جۇرگەن وفيتسەر.
— كوڭىل-كۇيىمىز جاقسى. بۇگىن — ەلىمىزدىڭ بولاشاعى ءۇشىن ايرىقشا كۇن. ءبىز بۇگىن تەك ازاماتتىق قۇقىعىمىزدى پايدالانىپ قانا قويعان جوقپىز، ءبىز قىزىمىزدىڭ، شاكىرتتەرىمىزدىڭ جانە ەلىمىزدىڭ ەرتەڭى ءۇشىن جاۋاپكەرشىلىك تانىتتىق. بارشا قازاقستاندىقتاردى، اسىرەسە جاستاردى سايلاۋ ۋچاسكەلەرىنە بارىپ، ءوز تاڭداۋلارىن جاساۋعا شاقىرامىن. ءاربىر داۋىس — ەلدىڭ ەرتەڭىنە قوسىلعان ۇلەس، — دەدى جۋرناليستەرگە بەرگەن سۇحباتىندا نۇرسۇلتان ورىنباساروۆ.
سپورتتىق قايسارلىقتى مەملەكەتتىك قىزمەتتەگى جاۋاپكەرشىلىكپەن ۇشتاستىرىپ جۇرگەن تانىمال جۇپتىڭ بۇل قادامى جاس بۋىن مەن اۋىل تۇرعىندارى اراسىندا ۇلكەن قولداۋعا يە بولدى.
نايما نۇرالي
