ومىرلەرىنە سەرپىن بەرگەن جارىس

ءاز-ناۋرىز مەيرامىنا وراي ەلىمىزدىڭ ءار وڭىرىندە سپورتتىق ويىندار  بولىپ ءوتتى. سونداي بەرەكەلى، مەرەكەلى  كۇننىڭ اياسىندا وتكەن ءىس-شارانىڭ ءبىرى الماتى وبلىسى ىلە اۋدانىنىڭ وتەگەن كەنتىندە ۇيىمداستىرىلدى.  

نەگىزى  وتەگەن كەنتىندە ارداگەرلەرى سپورتى وتە جاقسى دامىپ كەلەدى. وسى وڭىردەگى سپورتقا جاناشىر مايتالمانداردىڭ اتسالىسۋمەن سپورتتىڭ ءار تۇرىنەن ارداگەرلەر اراسىندا بايراقتى جارىستار وتكىزىلىپ كەلەدى. شاعىن فۋتبولدان ناۋرىز مەيرامىنا قاتىستى ۇيىمداستىرىلعان ارداگەرلەر جارىسىندا «سىرلى اياقتىڭ سىرى كەتسە دە سىنى كەتپەگەن»، دەمەكشى بويلارىندا قۋاتى بار، شەبەرلىگى زور بۇرىنعى سپورت ارداگەرلەرىنىڭ تارتىستى ويىندارى جارىستى تاماشالۋعا كەلگەندەرگە ۇلكەن اسەر قالدىردى.

تۋرنيرگە الماتى وبلىسى مەن الماتى قالاسىنان قاتىسقان سەگىز كوماندانىڭ ىشىندە ساپالى ءارى تارتىستى ويىندى كورسەتكەن ارداگەر جۋرناليستەردەن جاساقتالعان  «قالامگەر» كومانداسى دا بار ەدى. كوپشىلىگى  «Qazaq sporty»  گازەتەنىڭ ۇجىمىنان قۇرالعان «قالامگەر» كومانداسىنىڭ ويىنشىلارىنىڭ كورسەتكەن  ساپالى ءساتتى ويىندارىنا جانكۇيەرلەردىڭ ىقىلاسى زور بولدى. اسىرەسە، اتى الاشقا ايگىلى كۇمىس كومەي ءانشى، كومپوزيتور كەنەن ازىرباەۆ اتامىزدىڭ تۋعان نەمەرەسى مۇرات كەنەنوۆتىڭ دە قالامگەرلەر كومانداسىنىڭ قۇرامىنا قوسىلىپ تەپكەن دوبى ءمۇلت كەتپەي، قارسىلاستاردىڭ  قاقپاسىنىڭ  ىشىنەن تابىلىپ جاتتى.

تۋرنير سوڭىندا ءار نوميناتسيا بويىنشا ۇزدىكتەر باعالى سىيلىقتارمەن ماراپاتتالدى.   تۋرنيردىڭ  «ۇزدىك شابۋىلشىسى»، «ۇزدىك ويىنشىسى»، «ۇزدىك قورعاۋشىسى» «ۇزدىك قاقاپاشىسى» ماراپاتتارى بويىنشا توپ جارىپ تاماشا ويىن كورسەتكەندەر باعالى سىيلىقتارمەن قۇرمەتپەن ماراپاتتالدى.

جارىستى ۇيىمداستىرۋشى ەلگە بەلگىلى جۋرناليست، جازۋشى ءالىم اناپيانوۆ اعامىزدىڭ ارقاسىندا تۋرنير وتە جاقسى دەڭگەيدە بولىپ ءوتتى. ءالىم اعامىز ارقاشاندا وسى ىلە اۋدانىنىڭ ارداگەرلەرىنىڭ باسىن قوسىپ، ىزگى ىسكە ۇيىتقى بولىپ جۇرگەنىن جەرگىلىكتى جۇرت ءجيى ايتادى. سونىمەن قاتار ارداگەر قالامگەر اعامىز سپورت سالاسىندا جارىق كورگەن 10 استام كىتاپتىڭ اۆتورى.

دودادا ءالىم اناپيانوۆ ءوزىنىڭ سوڭعى جازىپ شىعارعان «نارودنىي ترەنەر»، «حالىق باپكەرى» دەگەن  سياسى جاڭادان كەپكەن كىتابىن ۇزدىك ويىنشىلارعا تارتۋ ەتتى.

ارداگەرلەر كوكتەم مەرەكەسىندە وسىلايشا كۇن ۇزاق جاسىل الاڭدا بار شەبەرلىكتەرىن سالىپ، فۋتبولدان العان شەكسىز اسەرلەرىنە ريزا بولىپ ۇيلەرىنە تارقاستى. سپورت — دەنساۋلىق كەپىلى. وزدەرىن قوعامنىڭ ءبىر بولشەگى دەپ سانامايتىن سپورت ارداگەرلەرى ءۇشىن وسىنداي جارىستاردىڭ وتكىزىلىپ تۇرۋى وتە ماڭىزدى. ەڭ باستىسى، وسىلايشا ءار ۋاقىتتا قوزعالىستا بولۋ، ياعني سپورتپەن اينالىسىپ سالاۋاتتى ءومىر ءسۇرۋ ارداگەر جاندارعا تاپتىرماس ەم، دەم ءارى ومىرلەرىنە سەرپىن بەرەدى.

 

اقىن ورداباي ۇلى

الماتى وبلىسى

ىلە اۋدانى وتەگەن كەنتى