نيدەرلاندتاعى ناۋرىز

نيدەرلاند كورولدىگىنىڭ روتتەردام قالاسىندا ادامزات وركەنيەتىندەگى ەڭ كونە ءارى ماعىنالى مەرەكەلەردىڭ ءبىرى – ناۋرىز كەڭ كولەمدە اتالىپ ءوتتى.

ايتۋلى مەيرام نيدەرلاندتىڭ ءارتۇرلى قالالارىندا تۇراتىن وتانداستاردى عانا ەمەس، قازاق حالقىنىڭ مادەنيەتى مەن داستۇرىنە قىزىعۋشىلىق تانىتاتىن جەرگىلىكتى تۇرعىنداردى دا ءبىر شاڭىراق استىنا جينادى.

ءىس-شارانى دۇنيەجۇزى قازاقتارى قاۋىمداستىعى ۇيىمىنىڭ نيدەرلاندتاعى فيليالى ۇيىمداستىردى. ۇيىمداستىرۋشىلار كامشات دەمەۋوۆا مەن ديلەك تاستەمىر-قالقان كەلگەن قوناقتارعا قىسقا ۋاقىت ىشىندە قازاق حالقىنىڭ ۇلتتىق قۇندىلىقتارىن كەڭىنەن تانىستىرۋعا مۇمكىندىك جاسادى. قوناقتار ۇلتتىق تاعامداردان ءدام تاتىپ، ءداستۇرلى ويىنداردى كورىپ، ءان مەن كۇيدى تىڭداپ، قازاق قولونەرىنىڭ ەرەكشەلىكتەرىمەن تانىستى.

مەرەكەلىك كەشتىڭ جۇرگىزۋشىلەرى قازاقستاننان ارنايى كەلگەن ونەر يەلەرى – ساعادىلدا ءۇسىبالى مەن تولقىن سۇلتان بولدى. ولار كورەرمەنگە قازاق ونەرىنىڭ شىنايى بولمىسىن تانىستىرىپ، مەرەكەنىڭ رۋحىن ايشىقتاي ءتۇستى. ال جاس ونەرپاز اسقار ءالىمجان كۇي ورىنداپ، كەشكە ەرەكشە ۇلتتىق رەڭك بەردى.

ءىس-شارادا جۋرناليست تولقىن سۇلتان دۇنيەجۇزى قازاقتارى قاۋىمداستىعى اتىنان تابىس ەتىلەتىن مەرەيتويلىق مەدالدى كامشات دەمەۋوۆا مەن ديلەك تاستەمىر-قالقانعا سالتاناتتى تۇردە تابىس ەتتى. سونداي-اق قاۋىمداستىقتىڭ العىس حاتىمەن يسمايل قالقان، نۇريلا سەرىكقىزى، نازىم بولاتقىزى جانە اسقار ءالىمجان ماراپاتتالدى. ال قازاقستان رەسپۋبليكاسىنىڭ نيدەرلاند كورولدىگىندەگى ەلشىلىگى اتىنان ەلورداسى استانادان كەلگەن تانىمال ونەر يەلەرى ساعادىلدا ءۇسىبالى، تولقىن سۇلتان جانە اسقار الىمجانعا العىس حات تابىس ەتىلدى.

كەشتە قازاق حالقىنىڭ ۇلتتىق قۇندىلىقتارى كەڭىنەن ناسيحاتتالىپ، ەلىمىزدىڭ كوك بايراعى جەلبىرەدى. ءۇشىنشى جىل قاتارىنان ۇيىمداستىرىلىپ وتىرعان بۇل ناۋرىز مەرەكەسىنە دەگەن قىزىعۋشىلىق جىل سايىن ارتىپ، قاتىسۋشىلاردىڭ ىقىلاسى مەن قولداۋى دا كۇشەيىپ كەلەدى. بۇل – شەتەلدە جۇرگەن قانداستاردىڭ تۋعان مادەنيەتكە دەگەن قۇرمەتىنىڭ، سونداي-اق قازاق رۋحانياتىنىڭ حالىقارالىق دەڭگەيدە كەڭىنەن تانىلىپ كەلە جاتقانىنىڭ ايقىن كورىنىسى.

نۇريلا سەرىكقىزى