Nıderlandtaǵy Naýryz

Nıderland Koroldiginiń Rotterdam qalasynda adamzat órkenıetindegi eń kóne ári maǵynaly merekelerdiń biri – Naýryz keń kólemde atalyp ótti.

Aıtýly meıram Nıderlandtyń ártúrli qalalarynda turatyn otandastardy ǵana emes, qazaq halqynyń mádenıeti men dástúrine qyzyǵýshylyq tanytatyn jergilikti turǵyndardy da bir shańyraq astyna jınady.

Is-sharany Dúnıejúzi qazaqtary qaýymdastyǵy uıymynyń Nıderlandtaǵy fılıaly uıymdastyrdy. Uıymdastyrýshylar Kámshat Demeýova men Dılek Tastemir-Qalqan kelgen qonaqtarǵa qysqa ýaqyt ishinde qazaq halqynyń ulttyq qundylyqtaryn keńinen tanystyrýǵa múmkindik jasady. Qonaqtar ulttyq taǵamdardan dám tatyp, dástúrli oıyndardy kórip, án men kúıdi tyńdap, qazaq qolóneriniń erekshelikterimen tanysty.

Merekelik keshtiń júrgizýshileri Qazaqstannan arnaıy kelgen óner ıeleri – Saǵadildá Úsibáli men Tolqyn Sultan boldy. Olar kórermenge qazaq óneriniń shynaıy bolmysyn tanystyryp, merekeniń rýhyn aıshyqtaı tústi. Al jas ónerpaz Asqar Álimjan kúı oryndap, keshke erekshe ulttyq reńk berdi.

Is-sharada jýrnalıst Tolqyn Sultan Dúnıejúzi qazaqtary qaýymdastyǵy atynan tabys etiletin mereıtoılyq medaldi Kámshat Demeýova men Dılek Tastemir-Qalqanǵa saltanatty túrde tabys etti. Sondaı-aq qaýymdastyqtyń alǵys hatymen Ismaıl Qalqan, Nurıla Serikqyzy, Nazym Bolatqyzy jáne Asqar Álimjan marapattaldy. Al Qazaqstan Respýblıkasynyń Nıderland Koroldigindegi Elshiligi atynan elordasy Astanadan kelgen tanymal óner ıeleri Saǵadildá Úsibáli, Tolqyn Sultan jáne Asqar Álimjanǵa alǵys hat tabys etildi.

Keshte qazaq halqynyń ulttyq qundylyqtary keńinen nasıhattalyp, elimizdiń kók baıraǵy jelbiredi. Úshinshi jyl qatarynan uıymdastyrylyp otyrǵan bul Naýryz merekesine degen qyzyǵýshylyq jyl saıyn artyp, qatysýshylardyń yqylasy men qoldaýy da kúsheıip keledi. Bul – shetelde júrgen qandastardyń týǵan mádenıetke degen qurmetiniń, sondaı-aq qazaq rýhanııatynyń halyqaralyq deńgeıde keńinen tanylyp kele jatqanynyń aıqyn kórinisi.

Nurıla SERIKQYZY