ۇشپا دوپتى ۇرشىقشا يىرگەن ۇلاندار 

ۆولەيبولدان قازاقستاننىڭ ەرلەر جانە ايەلدەر چەمپيوناتتارى قىزۋ قارقىندا اياقتالىپ، جەڭىمپازدار مەن جۇلدەگەردىڭ ەسىمدەرى بەلگىلى بولعانىن بىلەمىز. وسى ءبىر ساتتە  الماتى وبلىسىنىڭ ۇشپا دوپ شەبەرلەرىنىڭ جەتىستىكتەرىن كورىپ جەلپىنىپ جۇرگەن جاسوسپىرىمدەردىڭ ويىندارىن كورىپ جاقسى ءبىر ويدا قالاسىڭ.

بۇگىنگى تاڭدا جەتىسۋ وڭىرىندە ۆولەيبول ورلەپ كەلەدى. وعان دالەل جەتىسۋدىڭ ەرلەر مەن ايەلدەر كوماندالارىنىڭ ەل چەمپيوناتىندا توپ جارىپ رەسپۋبليكا چەمپيوندارى اتانۋى.  يا، اربانىڭ الدىڭعى دوڭگەلەگى قايدا جۇرسە ارتقى دوڭگەلەگى دە سولاي جۇرەتىنى بەلگىلى.

الدىڭعى لەكتەگى اعالارىنىڭ تارتىستى ويىندارىن كورىپ ءوسىپ كەلە جاتقان جاس بۋىن سولارعا ۇقساپ تەڭەلۋگە قۇشتار كەلەدى. وسى ورايدا الماتى وبلىسى ىلە اۋدانى وتەگەن كەنتىندە ورنالاسقان قازاقستان رەسپۋبليكاسىنا ەڭبەگى سىڭگەن جاتتىقتىرۋشى قاپار راۋنوۆ باسشىلىق ەتەتىن بالالار مەن جاسوسىپىرمدەر سپورت مەكتەبىنىڭ جالىندى جاس ۆولەيبول شەبەرلەرىنىڭ جەڭىستى جولدارىن اڭگىمە ەتكەندى ءجون كورىپ وتىرمىز.

اۋىل قازاقتىڭ كۇرە تامىرى، التىن بەسىگى. اۋىلدان تۇلەپ ۇشقان تالانتتاردىڭ الەم چەمپيوناتتارى مەن وليمپيادا ويىندارىندا التىن جۇلدەلەردى جەڭىپ الىپ، ەل نامىسىن ابىرويمەن قورعاپ جۇرگەن سپورت جۇلدىزدارىنىڭ اتتارىن ايتىپ تاۋىسا الماسپىز. مىنە، جۋىردا سول اۋىل تالانتتارىن تانىتۋدا ۆولەيبولدان «اۋىل سپورتى» رەسپۋبليكالىق ويىندارى ءوز مارەسىنە جەتىپ، جەڭىمپازدار مەن جۇلدەگەرلەردىڭ ەسىمدەرى بەلگىلى بولدى. سول ۆولەيبولدان «اۋىل سپورتى» رەسپۋبليكالىق جارىسىندا قارسىلاستارىنا ەش مۇمكىندىك بەرمەي، تارتىستى تاماشا ويىندارىمەن وزىپ شىعىپ باس جۇلدەنى الماتى وبلىسى ىلە اۋدانى وتەگەن كەنتىندەگى بالالار مەن جاسوسپىرىمدەر سپورت مەكتەبىنىڭ «ىلە» كومانداسى جەڭىپ الدى.

ءيا، قاراپ تۇرساق ءيا، جەڭگەن ەكەن دەپ قۇتتى بولسىن ايتىپ قويا سالۋعا بولار ەدى. بىراق، تۇپ نەگىزىنە سارالاي وتىرىپ، كوماندانىڭ جايدان جاي ەل چەمپيونى بولا سالماعانىنا كوز جەتكىزىمەز. « ۇلى ىستە ۇيىتقى بولعان ۇلى ادامدار وزىنەن ءوزى ۇلى بولا قالمايدى»، — دەگەن ەكەن پلاتون. كوماندانى ۇيىتىپ، قانشا ۋاقىت سپورت زالدا بالالارمەن بىرگە شۇمەكتەپ تەر توككەن، جاستا بولسا باس بولىپ ۇجىمدى ۇيىتا بىلگەن باپكەرى  عالىم نۇرعالىم ۇلى عاينولدىڭ تولاسسىز ەڭبەگىنىڭ جەمىسىن كورەمىز. ايتپاقشى، وسىنداي تالانتتى جاستاردى جاساقتاپ ۇلكەن بيىككە شىعارا بىلگەن كوماندا تامىرشىسى، باپكەرى عالىم عاينول رەسپۋبليكالىق «اۋىل سپورتى» جارىسىندا الماتى وبلىسىنىڭ «ۇزدىك باپكەر» اتاعىمەن ماراپاتتالعان ەكەن.  «ىلە» كومانداسىندا جاتتىعاتىن  9-10 سىنىپتاردىڭ وقۋشىلارى  تالماي جاساعان تاباندىلىعىنىڭ ارقاسىندا الدىمەن اۋداندى، سوسىن وبلىستا قارسىلاستارىن قاپى قالدىرىپ ۇزدىك شىعىپ بارىپ رەسپۋبليكالىق باسەكەگە اتتانادى. ەلىمىزدىڭ ءار وڭىرىنەن، ياعني 17 وبلىستان كەلىپ قاتىسقان سۋ تيمەس سۋ جورعالارداي جۇيرىك شىققان كوماندالار اراسىندا «ىلە» كومانداسى  بىردە ءبىر رەت جەڭىلمەي باس جۇلدەنى يەلەنەدى. وسى ءتۋرنيردى كوماندانىڭ تىرەگى ءالى جۇرەگى بولعان مۇرات ايبار تورەشىلەردىڭ  پىكىرىمەن «ۇزدىك ويىنشى» اتانادى. وسىلايشا، رەسپۋبليكادا توپ جارعان ات توقىمىنداي وتەگەن كەنتىنەن شىققان «ىلە» جاسوپىرىمدەر كومانداسى ەلىمىزدىڭ نامىسىن قورعاۋ ءۇشىن تۇركيانىڭ انتاليا قالاسىندا وتەتىن حالىقارالىق  «دوستىق ويىندارى»  جارىسىنا جولداما الىپ اتتانىپ كەتەدى.

باعى مەن بابى ساي كەلگەن قازاقتىڭ قارادومالاق ۇلاندارى ول جاقتا نامىستى قولدان بەرمەي، قارسىلاستارىن قالدىرماي جەڭىپ شىعىپ، ءبىرىنشى ورىندى جەڭىپ الادى. بۇل جارىستا ءوزىنىڭ ۇزدىك ويىن ورنەگىمەن كورەرمەندەردىڭ كوزايىمى بولعان ادمير ماحامەدجانوۆ «ۇزدىك ويىنشى» اتانىپ كومانداسىنىڭ عانا ەمەس، قازاق ەلىنىڭ ابىرويىن اسقاقتاتادى. ەلىمىزگە جەڭىسپەن جەلپىنىپ جەتكەن جاسۇلاندارىمىز اراعا ءبىر كۇن سالىپ، ايىلىن جيماستان وبلىستىق جارىسقا قاتىسىپ، وندا دا توپ جارىپ ءبىرىنشى ورىنعا يە بولادى. وسىنداي الامان جارىستاردا ۇلتاراقتاي اۋىلدان شىعىپ وتىرعان وسىنداي دارىندى جاستارىمىزدىڭ جەڭىستى جولدارى كىمدى بولسا قىزىقتىرماي قويماسا انىق. سونىمەن قاتار دارىندى اۋىلدىڭ قارادومالاق جاسوسپىرىمدەرىنە قولداۋ كورسەتىپ، سوناۋ تۇركياعا دەيىن جول پۇل، اس-ءدامىن كوتەرىپ اپارىپ قايتقان ەلدەگى مەتسانات تيمۋر ق ۇلىباەۆتىڭ ىستەگەن بۇل شاراپاتى  ۇلكەن قۇرمەتكە لايىقتى دەگەن دۇرىس شىعار. دەگەنىمەندە سپورتتىق ينۆەنتارلار ايتالىق قولدوبىنىڭ تاپشىلىعى دارىندى بالالاردىڭ ەمىن-ەركىن دايىندالۋىنا قول بايلايتىن جاعى دا بار كورىنەدى. «سىي قىلساڭ سىپىرا قىل»، —  دەمەكشى، مەتسانات مىرزانىڭ ەندى وسىنداي اۋىلدان شىعىپ جاتقان تالانتترعا بارىنشا قولداۋ جاساپ، جاتتىعۋى ءۇشىن قول دوپتارىمەن قامتاماسىز ەتىپ بەرسە، نۇر ۇستىنە نۇر بولار ەدى.  «ماڭدايى تەرلەمەگەننىڭ قازانى قاينامايدى»، — دەگەن ەكەن بابالارىمىز.

ەل نامىسىن ارقالاعان جاسۇلاندارىمىزدىڭ الەمدىك دەڭگەيدە الار اسۋى، جەتەر جەڭىستەرى ءالى الدا دەپ سەنىم بىلدىرەمىز. ەڭ باستىسى  العا مەجە ەتىپ قويعان ارمان ماقساتتارىنان تانباي تاباندى ەڭبەك ەتۋى كەرەك.

اقىن ورداباي ۇلى،

الماتى وبلىسى،

ىلە اۋدانى

وتەگەن كەنتى