SportPress.kz Qazaqstan sport jańalyqtary
Voleıboldan Qazaqstannyń erler jáne áıelder chempıonattary qyzý qarqynda aıaqtalyp, jeńimpazdar men júldegerdiń esimderi belgili bolǵanyn bilemiz. Osy bir sátte Almaty oblysynyń ushpa dop sheberleriniń jetistikterin kórip jelpinip júrgen jasóspirimderdiń oıyndaryn kórip jaqsy bir oıda qalasyń.
Búgingi tańda Jetisý óńirinde voleıbol órlep keledi. Oǵan dálel Jetisýdyń erler men áıelder komandalarynyń el chempıonatynda top jaryp respýblıka chempıondary atanýy. Iá, arbanyń aldyńǵy dóńgelegi qaıda júrse artqy dóńgelegi de solaı júretini belgili.
Aldyńǵy lektegi aǵalarynyń tartysty oıyndaryn kórip ósip kele jatqan jas býyn solarǵa uqsap teńelýge qushtar keledi. Osy oraıda Almaty oblysy Ile aýdany О́tegen kentinde ornalasqan Qazaqstan Respýblıkasyna eńbegi sińgen jattyqtyrýshy Qapar Raýnov basshylyq etetin Balalar men jasósipirmder sport mektebiniń jalyndy jas voleıbol sheberleriniń jeńisti joldaryn áńgime etkendi jón kórip otyrmyz.
Aýyl qazaqtyń kúre tamyry, altyn besigi. Aýyldan túlep ushqan talanttardyń álem chempıonattary men Olımpıada oıyndarynda altyn júldelerdi jeńip alyp, el namysyn abyroımen qorǵap júrgen sport juldyzdarynyń attaryn aıtyp taýysa almaspyz. Mine, jýyrda sol aýyl talanttaryn tanytýda voleıboldan «Aýyl sporty» respýblıkalyq oıyndary óz máresine jetip, jeńimpazdar men júldegerlerdiń esimderi belgili boldy. Sol voleıboldan «Aýyl sporty» respýblıkalyq jarysynda qarsylastaryna esh múmkindik bermeı, tartysty tamasha oıyndarymen ozyp shyǵyp bas júldeni Almaty oblysy Ile aýdany О́tegen kentindegi Balalar men jasóspirimder sport mektebiniń «Ile» komandasy jeńip aldy.
Iá, qarap tursaq ıá, jeńgen eken dep qutty bolsyn aıtyp qoıa salýǵa bolar edi. Biraq, túp negizine saralaı otyryp, komandanyń jaıdan jaı el chempıony bola salmaǵanyna kóz jetkizimez. «Uly iste uıytqy bolǵan uly adamdar ózinen ózi uly bola qalmaıdy», — degen eken Platon. Komandany uıytyp, qansha ýaqyt sport zalda balalarmen birge shúmektep ter tókken, jasta bolsa bas bolyp ujymdy uıyta bilgen bapkeri Ǵalym Nurǵalymuly Ǵaınoldyń tolassyz eńbeginiń jemisin kóremiz. Aıtpaqshy, osyndaı talantty jastardy jasaqtap úlken bıikke shyǵara bilgen komanda tamyrshysy, bapkeri Ǵalym Ǵaınol respýblıkalyq «Aýyl sporty» jarysynda Almaty oblysynyń «Úzdik bapker» ataǵymen marapattalǵan eken. «Ile» komandasynda jattyǵatyn 9-10 synyptardyń oqýshylary talmaı jasaǵan tabandylyǵynyń arqasynda aldymen aýdandy, sosyn oblysta qarsylastaryn qapy qaldyryp úzdik shyǵyp baryp respýblıkalyq básekege attanady. Elimizdiń ár óńirinen, ıaǵnı 17 oblystan kelip qatysqan sý tımes sý jorǵalardaı júırik shyqqan komandalar arasynda «Ile» komandasy birde bir ret jeńilmeı bas júldeni ıelenedi. Osy týrnırdi komandanyń tiregi áli júregi bolǵan Murat Aıbar tóreshilerdiń pikirimen «Úzdik oıynshy» atanady. Osylaısha, respýblıkada top jarǵan at toqymyndaı О́tegen kentinen shyqqan «Ile» jasópirimder komandasy elimizdiń namysyn qorǵaý úshin Túrkııanyń Antalııa qalasynda ótetin halyqaralyq «Dostyq oıyndary» jarysyna joldama alyp attanyp ketedi.
Baǵy men baby saı kelgen qazaqtyń qaradomalaq ulandary ol jaqta namysty qoldan bermeı, qarsylastaryn qaldyrmaı jeńip shyǵyp, birinshi oryndy jeńip alady. Bul jarysta óziniń úzdik oıyn órnegimen kórermenderdiń kózaıymy bolǵan Admır Mahamedjanov «Úzdik oıynshy» atanyp komandasynyń ǵana emes, qazaq eliniń abyroıyn asqaqtatady. Elimizge jeńispen jelpinip jetken jasulandarymyz araǵa bir kún salyp, aıylyn jımastan oblystyq jarysqa qatysyp, onda da top jaryp birinshi orynǵa ıe bolady. Osyndaı alaman jarystarda ultaraqtaı aýyldan shyǵyp otyrǵan osyndaı daryndy jastarymyzdyń jeńisti joldary kimdi bolsa qyzyqtyrmaı qoımasa anyq. Sonymen qatar daryndy aýyldyń qaradomalaq jasóspirimderine qoldaý kórsetip, sonaý Túrkııaǵa deıin jol pul, as-dámin kóterip aparyp qaıtqan eldegi meanat Tımýr Qulybaevtyń istegen bul sharapaty úlken qurmetke laıyqty degen durys shyǵar. Degenimende sporttyq ınventarlar aıtalyq qoldobynyń tapshylyǵy daryndy balalardyń emin-erkin daıyndalýyna qol baılaıtyn jaǵy da bar kórinedi. «Syı qylsań sypyra qyl», — demekshi, meanat myrzanyń endi osyndaı aýyldan shyǵyp jatqan talanttrǵa barynsha qoldaý jasap, jattyǵýy úshin qol doptarymen qamtamasyz etip berse, nur ústine nur bolar edi. «Mańdaıy terlemegenniń qazany qaınamaıdy», — degen eken babalarymyz.
El namysyn arqalaǵan jasulandarymyzdyń álemdik deńgeıde alar asýy, jeter jeńisteri áli alda dep senim bildiremiz. Eń bastysy alǵa meje etip qoıǵan arman maqsattarynan tanbaı tabandy eńbek etýi kerek.
Aqyn ORDABAIULY,
Almaty oblysy,
Ile aýdany
О́tegen kenti
