… الەم چەمپيوناتىنا اۋىلدان قول بۇلعاۋ — 1

… فۋتبولدان الەم چەمپيوناتى اياقتالدى! چەمپيوناتتىڭ باسىندا بولماسام دا سوڭعى نۇكتەسىن قويعان ساتىنە كۋا بولدىم. بۇل مەنىڭ سپورت ءجۋرناليسى رەتىندەگى،فۋتبولدى سۇلۋداي سۇيەتىن جان رەتىندەگى باستى باقىتىم!

… فينالدا ويناعان يسپانيا مەن ارگەنتينا قۇراما كوماندالارىنىڭ ويىنىنىڭ ءبىر سەكۋندىن جىبەرمەي كوردىم! ويىن سوڭىنداعى توبەلەستى دە كورمەس كوزىم كوردى… ودان كەيىنگى جەڭىمپاز بەن ەكىنشى جۇلدەگەرلەردى ماراپاتتاۋ ءراسىمىن دە كوزىمە جاس الا وتىرىپ تاماشالادىم. يسپانيا كومانداسىنىڭ اسپان مەن جەردىڭ اراسىندا قالىقتاپ جۇرگەنىن دە، ارگەنتينا كومانداسىنىڭ، كەرىسىنشە، قارا جەرگە كىرۋگە تەسىك تاپپاي، بىر قارىسقا دا تولمايتىن الاڭ كوگالىنا باستارىن تىعا جەرباۋىرلاعان ساتتەرىن دە كوزدەن تاسا قىلمادىم… 21-ءشى عاسىردىڭ قايتالانباس فۋتبول تۇلعاسى ليونەل مەسسيدىڭ فۋتبولشى رەتىندە دە، ادام رەتىندە دە ۇگىتىلىپ، تاستان قيىرشاققا اينالعان ساتىنە كۋا بولىپ، بولاتتاي بەرىك جىگەرىم قۇم بولدى، جالعىز جانىم قازانداعى قىزعان مايعا شىجعىرىلدى، مەسسيمەن كوگالعا «بىرگە اۋنادىم»، مەسسيمەن بىرگە كوز جاسىما ەرىك بەردىم…

…بىراق بۇل فينال جايلى دا، فينالدان سوڭعى فۋتبولداعى اقىلى بار جاندى باس شايقاتىپ، جەر تەپكىلەتەر وقيعالار جايلى دا بىردەن جازبادىم. جازا المادىم! بىرىنشىدەن، مىنا ۇلى دا ۋلى وقيعالار جايلى الاقانداي تەلەفوندى تۇرتپەكتەپ وتىرىپ، تۇك ايتا الماس ەدىم. ەكىنشىدەن، فينالدىڭ 90 مينۋت ويىنىن، 30 مينۋت تويىن وتكىزىپ، ۇيگە بەتتەگەننىڭ ورنىنا، قوسقانى بار، قوسىلعانى بار 150 مينۋت ويىندى، وعان قوسىمشا 50-60 مينۋت فۋتبول تويىنىڭ شاباتارقارىن كورگەن باسىم، وسى ۋاقىت بويى ستاديونداعى 80-مىڭنان اسا جانكۇيەردىڭ سىرەسىپ وتىرىپ بارىپ، بارى بىتكەندە توسقاۋىلدى بۇزىپ كەتكەن تاۋ سۋى سەكىلدى قاقپالارعا لاپ قويعانىندا بارار جەرىڭ تۇگىلى كەۋدەڭدەگى جانىڭنىڭ قايدا ەكەنىن ۇمىتىپ قالاتىن ءساتتى باستان كەشكەنىم بار، ۇشىنشىسى، جانە ەڭ باستىسى، فۋتبولدى بىلەمىن، تۇسىنەمىن، سۇيەمىن دەيتىن جانداردىڭ ءولىم تۇگىلى وكپەگە قيمايتىن ادامى ليونەل مەسسي كوگالدا دومالاپ جاتقان سۋرەتى كەۋدەدە كونەرگەنشە، كوزدەن تولىق تاسالانعانشا، ءبىر اۋىز ءسوز جازا المادىم! جازبادىم! جازا المايتىن ەدىم! جازباعانىم ءجون ەدى! جازسام دا مەسسي-قۇبىلىس جايلى وسى ءبىر شيرەك عاسىر جيناعان قازىنامدى تولىق اقتارا الماس ەدىم! ويتكەنى، اڭگىمە الەم چەمپيونىنىڭ فينالدىق ويىنى جايلى بولسا دا، جەڭگەن يسپانيا قۇراما كومانداسى مەن جەڭىلگەن ارگەنتينا فۋتبولشىلارى تۋرالى بولسا دا، ءبىز، فۋتبولدى بىلەتىن، تۇسىنەتىن سۇيەتىن، بۇكىل بەس قۇرىلىقتى جايلاعان ميللياردتاعان ءتىرى جاندار ءوزىمىز بىلەتىن، وزىمىز تۇسىنەتىن، وزىمىز سۇيەتىن فۋتبول اتتى ونەردى سول ميلليارد جانداردان ارتىق وينايتىن تۇتاس ءبىر تۇلعانى سول ميللياردتاردىڭ كوز الدىنان ماگىلىككە شىعارىپ سالىپ جاتقان بولاتىنبىز! مەسسي ولگەن جوق! ول — ولمەيدى! ول كەۋدەسىنەن جانى شىققان كۇنى دە ولمەيدى! ول — قاراپايىم دوپ تەبۋدەن بۇكىلعالامدىق تۇسىنىكتى ادام بالاسى تۇسىنبەيتىن دارەجەگە دەيىن شارىقتاتىپ شىعىرىپ بەرگەن تۇلعا! ول — ليونەل مەسسي — فۋتبول سيقىرشىسى!!!

… فينال بىتىسىمەن «نەسىپتىڭ فينالدى كورگەنى راس!» دەگىزۋ ءۇشىن اسىعىس بىردەمەلەر جازىپ، جاريالاي سالماعانىم جاقسى بولدى: سول نيۋ-يوركتىڭ تۇبىندەگى نيۋ-دجەرسيدەگى مەتلايف ستاديونىنان نيۋ-يورككە،ودان فيلادەلفيا ارقىلى بوستونعا جەتىپ،اۆياتسيا زاڭى بويىنشا كەشە ۇشىپ كەلگەن نۇكتەڭنەن دۋباي ارقىلى(ويلانىپ، اقپارات وقۋعا كوپ كومەگى ءتيدى — ءوز باسىم تۇڭعىش كورگەن كەرەمەت وقيعا: ەكى اراعا تىنباي 14 ساعات ۇشقانىمىز ءوز الدىنا، سول 14 ساعاتتا ۇشاقتاعى 300-دەن اسا جۇرگىنشى الگى ۆاي-فايمەن ۇيىمەن دە،كورشىلەرىمەن دە تىكەلەي سويلەسىپ، ۆيدەو جىبەرىپ قابىلداپ وتىردى! — ن. ج.) الماتىعا جەتىپ، ودان استاناداعى شاڭىراعىما جەتكەنىم وسى… وسى ءۇش سوتكەنىڭ باس-اياعىندا الەۋمەتتىك جەلىلەردەن ول فينالدىق ويىن جايلى دا،فينالداعى جەڭگەن-جەڭىلگەندەر جايلى دا،ويىندى سۋرەتتەۋدەگى سولاقايلىق جايلى دا، اسىرەسە، مەسسي باستاعان كوماندانى «جەتەكتەگەن تازىنىڭ تۇلكى الماسىنا…» جەتكىزە سۋرەتتەگەنى جايلى دا، مەسسيدىڭ ءوزىن سۋعا سالعان كۇشىكتەي قىلىپ كورسەتىپ،سوعان ايىزدارى قانىپ وتىرعان فۋتبولداعى «سوقىر» جانداردىڭ ىسقىلاعان الاقاندارىنىڭ سۋسىلىن دا بىلگەنىم جاقسى بولدى. ەندى ول وقيعالارعا فينالدىڭ باس-اياعى جايلى ايتا وتىرىپ، سول ميللياردتىڭ ءبىرى رەتىندە، بىراق ءبىر اۋىز ءسوز ايتۋ ءۇشىن 100 ويلانىپ، 1000 تولعانىپ بارىپ سويلەيتىن اۋزى مەن اقىلىنا ءوزى عانا يە جان رەتىندە جاۋاپ بەرە كەتەتىن بولدىم.

بۇگىنگە وسى جەتەر. جولدان دا، كوتەرەر تاقىرىبىمنىڭ اۋىرلىعىنان دا كوپ ويلانىپ وتىرمىن. ەندى اسىعىس جوق. بولار فينال بولىپ،تاراتىلار جۇلدە تاراتىلدى عوي. ول جاقتا ەندى ەشتەمە وزگەرمەيدى. وزگەرىس بولسا فۋتبولدى بىلەتىن،تۇسىنەتىن، سۇيەتىن جانداردىڭ جان دۇنيەسىندە بولۋى مۇمكىن. ەگەر وزدەرى سونى قالاسا. قالاماسا،قالا بەرەر. اللا تاعالانىڭ ءوزى بۇگىنگى جەر باسىپ جۇرگەن 8،5 ميلليارد ادامدى سويلەسە كەلە، ويلاسا كەلە،تالاسا كەلە ءتۇسىنىسسىن دەپ 8،5 ميلليارد ءتۇرلى ەتىپ جاراتقان عوي. ايتۋشىنىكى — ءوتىنىش. تىڭداۋشىنىكى — قابىلداۋ-قابىلداماۋ. ءبارى — جاراتۋشىنىڭ اركىمنىڭ باسىنا قۇيعان ءبىر ۋىس سۇيىعىنان. بۇل جولى ادام ەمەس،سول سۇيىق سىنعا تۇسەدى. كەلەسى جاريالانىمعا دەيىن باستارىڭىزدىڭ سول سۇيىق تۇر-اۋ دەگەن تۇسىن الاقاندارىڭىزبەن ءبىر سيپاپ قويىڭىزدارشى…

نەسىپ جۇنىسباي ۇلى،

قازاقستاننىڭ ەڭبەك سىڭىرگەن قايراتكەرى،

سپورت ءجۋرناليسى، جازۋشى، سپورت قايراتكەرى