… Álem chempıonatyna aýyldan qol bulǵaý — 1

… Fýtboldan álem chempıonaty aıaqtaldy! Chempıonattyń basynda bolmasam da sońǵy núktesin qoıǵan sátine kýá boldym. Bul meniń sport jýrnalısi retindegi,fýtboldy sulýdaı súıetin jan retindegi basty BAQYTYM!

… Fınalda oınaǵan Ispanııa men Argentına qurama komandalarynyń oıynynyń bir sekýndyn jibermeı kórdim! Oıyn sońyndaǵy tóbelesti de kórmes kózim kórdi… Odan keıingi jeńimpaz ben ekinshi júldegerlerdi marapattaý rásimin de kózime jas ala otyryp tamashaladym. Ispanııa komandasynyń aspan men jerdiń arasynda qalyqtap júrgenin de, Argentına komandasynyń, kerisinshe, qara jerge kirýge tesik tappaı, bir qarysqa da tolmaıtyn alań kógalyna bastaryn tyǵa jerbaýyrlaǵan sátterin de kózden tasa qylmadym… 21-shi ǵasyrdyń qaıtalanbas fýtbol tulǵasy Lıonel MESSIDIŃ fýtbolshy retinde de, adam retinde de úgitilip, tastan qıyrshaqqa aınalǵan sátine kýá bolyp, bolattaı berik jigerim qum boldy, jalǵyz janym qazandaǵy qyzǵan maıǵa shyjǵyryldy, Messımen kógalǵa «birge aýnadym», Messımen birge kóz jasyma erik berdim…

…Biraq bul fınal jaıly da, fınaldan sońǵy fýtboldaǵy aqyly bar jandy bas shaıqatyp, jer tepkileter oqıǵalar jaıly da birden jazbadym. Jaza almadym! Birinshiden, myna uly da ýly oqıǵalar jaıly alaqandaı telefondy túrtpektep otyryp, túk aıta almas edim. Ekinshiden, fınaldyń 90 mınýt oıynyn, 30 mınýt toıyn ótkizip, úıge bettegenniń ornyna, qosqany bar, qosylǵany bar 150 mınýt oıyndy, oǵan qosymsha 50-60 mınýt FÝTBOL TOIYNYŃ shabatarqaryn kórgen basym, osy ýaqyt boıy stadıondaǵy 80-myńnan asa jankúıerdiń siresip otyryp baryp, bári bitkende tosqaýyldy buzyp ketken taý sýy sekildi qaqpalarǵa lap qoıǵanynda barar jeriń túgili keýdeńdegi janyńnyń qaıda ekenin umytyp qalatyn sátti bastan keshkenim bar, úshinshisi, jáne eń bastysy, fýtboldy bilemin, túsinemin, súıemin deıtin jandardyń ólim túgili ókpege qımaıtyn adamy Lıonel MESSI kógalda domalap jatqan sýreti keýdede kónergenshe, kózden tolyq tasalanǵansha, bir aýyz sóz jaza almadym! Jazbadym! Jaza almaıtyn edim! Jazbaǵanym jón edi! Jazsam da MESSI-QUBYLYS jaıly osy bir shırek ǵasyr jınaǵan qazynamdy tolyq aqtara almas edim! О́ıtkeni, áńgime álem chempıonynyń fınaldyq oıyny jaıly bolsa da, jeńgen Ispanııa qurama komandasy men jeńilgen Argentına fýtbolshylary týraly bolsa da, biz, fýtboldy biletin, túsinetin súıetin, búkil bes qurylyqty jaılaǵan mıllıardtaǵan tiri jandar ózimiz biletin, ózimiz túsinetin, ózimiz súıetin FÝTBOL atty ónerdi sol mıllıard jandardan artyq oınaıtyn TUTAS BIR TULǴANY sol mıllıardtardyń kóz aldynan mágilikke shyǵaryp salyp jatqan bolatynbyz! MESSI ólgen joq! Ol — ólmeıdi! Ol keýdesinen jany shyqqan kúni de О́LMEIDI! Ol — qarapaıym dop tebýden Búkilǵalamdyq túsinikti adam balasy túsinbeıtin dárejege deıin sharyqtatyp shyǵyryp bergen TULǴA! Ol — Lıonel MESSI — fýtbol sıqyrshysy!!!

… Fınal bitisimen «Nesiptiń fınaldy kórgeni ras!» degizý úshin asyǵys birdemeler jazyp, jarııalaı salmaǵanym jaqsy boldy: sol Nıý-Iorktiń túbindegi Nıý-Djersıdegi Metlaıf stadıonynan Nıý-Iorkke,odan Fıladelfııa arqyly Bostonǵa jetip,avıaııa zańy boıynsha keshe ushyp kelgen núkteńnen Dýbaı arqyly(oılanyp, aqparat oqýǵa kóp kómegi tıdi — óz basym tuńǵysh kórgen keremet oqıǵa: eki araǵa tynbaı 14 saǵat ushqanymyz óz aldyna, sol 14 saǵatta ushaqtaǵy 300-den asa júrginshi álgi Vaı-faımen úıimen de,kórshilerimen de tikeleı sóılesip, vıdeo jiberip qabyldap otyrdy! — N. J.) Almatyǵa jetip, odan Astanadaǵy shańyraǵyma jetkenim osy… Osy úsh sótkeniń bas-aıaǵynda áleýmettik jelilerden ol fınaldyq oıyn jaıly da,fınaldaǵy jeńgen-jeńilgender jaıly da,oıyndy sýretteýdegi solaqaılyq jaıly da, ásirese, Messı bastaǵan komandany «Jetektegen tazynyń túlki almasyna…» jetkize sýrettegeni jaıly da, Messıdiń ózin sýǵa salǵan kúshikteı qylyp kórsetip,soǵan aıyzdary qanyp otyrǵan fýtboldaǵy «soqyr» jandardyń ysqylaǵan alaqandarynyń sýsylyn da bilgenim jaqsy boldy. Endi ol oqıǵalarǵa fınaldyń bas-aıaǵy jaıly aıta otyryp, sol mıllıardtyń biri retinde, biraq bir aýyz sóz aıtý úshin 100 oılanyp, 1000 tolǵanyp baryp sóıleıtin aýzy men aqylyna ózi ǵana ıe jan retinde jaýap bere ketetin boldym.

Búginge osy jeter. Joldan da, kóterer taqyrybymnyń aýyrlyǵynan da kóp oılanyp otyrmyn. Endi asyǵys joq. Bolar fınal bolyp,taratylar júlde taratyldy ǵoı. Ol jaqta endi eshteme ózgermeıdi. О́zgeris bolsa fýtboldy biletin,túsinetin, súıetin jandardyń jan dúnıesinde bolýy múmkin. Eger ózderi sony qalasa. Qalamasa,qala berer. Alla taǵalanyń ózi búgingi jer basyp júrgen 8,5 mıllıard adamdy sóılese kele, oılasa kele,talasa kele túsinissin dep 8,5 mıllıard túrli etip jaratqan ǵoı. Aıtýshyniki — О́TINISh. Tyńdaýshyniki — QABYLDAÝ-QABYLDAMAÝ. Bári — Jaratýshynyń árkimniń basyna quıǵan bir ýys suıyǵynan. Bul joly adam emes,sol SUIYQ synǵa túsedi. Kelesi jarııalanymǵa deıin bastaryńyzdyń sol suıyq tur-aý degen tusyn alaqandaryńyzben bir sıpap qoıyńyzdarshy…

Nesip JÚNISBAIULY,

Qazaqstannyń eńbek sińirgen qaıratkeri,

sport jýrnalısi, jazýshy, sport qaıratkeri