SportPress.kz قازاقستان سپورت جاڭالىقتارى
تامىز ايىنىڭ ءار ءۇشىنشى جەكسەنبىسىندە ەلىمىزدە سپورت كۇنى اتالىپ وتىلەدى. بيىل دا كاسىبي مەرەكەگە وراي ەلىمىزدىڭ بارلىق وڭىرىندە ءبىر اپتا بويى ءتۇرلى سپورتتىق ءىس-شارالار ۇيىمداستىرىلادى، دەپ حابارلادى SportPress.kz.
تۋريزم جانە سپورت مينيسترلىگىنىڭ حابارلاۋىنشا، مەرەكەلىك اپتا اياسىندا ەلىمىز بويىنشا 250-دەن استام سپورتتىق ءىس-شارا وتكىزۋ جوسپارلانعان. ولاردىڭ قاتارىندا بۇقارالىق سپورتتىق جارىستار، سپارتاكيادالار، تۋرنيرلەر، چەمپيوناتتار، جۇگىرۋ مارافوندارى، ۇلتتىق سپورت تۇرلەرىنەن سايىستار، سپورت ارداگەرلەرىمەن كەزدەسۋلەر جانە باسقا دا ءىس-شارالار بار.
ءىس-شارالارعا سپورتشىلارمەن قاتار بالالار مەن جاسوسپىرىمدەر، سپورت سالاسىنىڭ ماماندارى، ارداگەرلەر جانە قالا تۇرعىندارى قاتىسادى.
«نەگىزگى ماقسات – حالىق اراسىندا سالاماتتى ءومىر سالتىن ناسيحاتتاۋ، بۇقارالىق سپورتتى دامىتۋ جانە ازاماتتاردى تۇراقتى تۇردە دەنە شىنىقتىرۋمەن اينالىسۋعا تارتۋ»، دەلىنگەن حابارلامادا.
11-15 تامىز ارالىعىندا استانا قالاسىنداعى «سارىارقا» ۆەلوترەگىندە وڭىرلەردىڭ دەنە شىنىقتىرۋ جانە سپورت مەكەمەلەرى قىزمەتكەرلەرى اراسىندا رەسپۋبليكالىق جارىس بولادى. جارىس سپورت سالاسىنىڭ ماماندارىن بىرىكتىرىپ، كوماندالىق رۋحتى نىعايتۋعا جانە ارىپتەستەر اراسىندا تاجىريبە الماسۋعا مۇمكىندىك بەرەدى. سونداي-اق، 12 تامىز اسىق اتۋ، ۇستەل تەنيسى، دويبى سپورت تۇرلەرى بويىنشا سپورت اردەگەرلەرى اراسىندا جارىس باستالادى.
مينيسترلىكتىڭ قولداۋىمەن 13 تامىزدا قازاق ۇلتتىق سپورت ۋنيۆەرسيتەتىندە «سپورتشىلار كەڭەسى» قب بىرنەشە تاقىرىپقا ارنالعان پلەنارلىق سەسسياسى وتەدى. قازىرگى سپورتتاعى رەفورمالار، ارداگەر سپورتشىلار مەن مامانداردى قولداۋ، مەديتسينالىق وزگەرىس پەن دامۋ جولدارى جيىن بارىسىندا كەڭىنەن تالقىلانادى.
مەرەكەلىك اپتا اياسىندا ەلىمىزدىڭ وڭىرلەرىندە ءتۇرلى فورماتتاعى اۋقىمدى سپورتتىق ءىس-شارالار وتەدى. اتاپ ايتقاندا، تالدىقورعان قالاسىندا سپورت مەكەمەلەرى قىزمەتكەرلەرى اراسىندا وبلىستىق سپارتاكيادا، اتىراۋدا جاسوسپىرىمدەر اراسىندا كروسس جۇگىرۋدەن جارىس، الماتىدا سپورت كۇنىنە ارنالعان فەستيۆال جانە اۋەسقوي ۆەلوسپورتشىلار اراسىندا Gran Fondo World Championship الەم چەمپيوناتى، قاراعاندىدا QARAQANDY HALF MARATHON – 2026 جارتىلاي مارافونى، استانادا بۇقارالىق ۆەلوجارىس، «Astana Handball DAY» اشىق گاندبول ءتۋرنيرى جانە بايداركا مەن كانوەدە ەسۋدەن قالا چەمپيوناتى، اقتاۋدا «جاس باتىر» تاەكۆوندو كۋبوگى، شىمكەنتتە TARTYL FEST سپورتتىق-بۇقارالىق فەستيۆالى، قوستانايدا KOSTANAY HALF MARATHON جەڭىل اتلەتيكالىق مارافونى ۇيىمداستىرىلادى.
بۇل ءىس-شارالار كاسىبي سپورتپەن قاتار، بۇقارالىق سپورتتى دامىتۋعا، حالىقتىڭ سپورتتىق بەلسەندىلىگىن ارتتىرۋعا جانە سالاماتتى ءومىر سالتىن كەڭىنەن ناسيحاتتاۋعا باعىتتالعان.
