Elimizde Sport kúnine oraı 250-den astam sporttyq is-shara ótedi

Tamyz aıynyń ár úshinshi jeksenbisinde elimizde Sport kúni atalyp ótiledi. Bıyl da kásibı merekege oraı elimizdiń barlyq óńirinde bir apta boıy túrli sporttyq is-sharalar uıymdastyrylady, dep habarlady SportPress.kz.

Týrızm jáne sport mınıstrliginiń habarlaýynsha, merekelik apta aıasynda elimiz boıynsha 250-den astam sporttyq is-shara ótkizý josparlanǵan. Olardyń qatarynda buqaralyq sporttyq jarystar, spartakıadalar, týrnırler, chempıonattar, júgirý marafondary, ulttyq sport túrlerinen saıystar, sport ardagerlerimen kezdesýler jáne basqa da is-sharalar bar.

Is-sharalarǵa sportshylarmen qatar balalar men jasóspirimder, sport salasynyń mamandary, ardagerler jáne qala turǵyndary qatysady.

«Negizgi maqsat – halyq arasynda salamatty ómir saltyn nasıhattaý, buqaralyq sportty damytý jáne azamattardy turaqty túrde dene shynyqtyrýmen aınalysýǵa tartý», delingen habarlamada.

11-15 tamyz aralyǵynda Astana qalasyndaǵy «Saryarqa» velotreginde óńirlerdiń dene shynyqtyrý jáne sport mekemeleri qyzmetkerleri arasynda respýblıkalyq jarys bolady. Jarys sport salasynyń mamandaryn biriktirip, komandalyq rýhty nyǵaıtýǵa jáne áriptester arasynda tájirıbe almasýǵa múmkindik beredi. Sondaı-aq, 12 tamyz asyq atý, ústel tenısi, doıby sport túrleri boıynsha sport ardegerleri arasynda jarys bastalady.

Mınıstrliktiń qoldaýymen 13 tamyzda Qazaq ulttyq sport ýnıversıtetinde «Sportshylar keńesi» QB birneshe taqyrypqa arnalǵan plenarlyq sessııasy ótedi. Qazirgi sporttaǵy reformalar, ardager sportshylar men mamandardy qoldaý, medıınalyq ózgeris pen damý joldary jıyn barysynda keńinen talqylanady.

Merekelik apta aıasynda elimizdiń óńirlerinde túrli formattaǵy aýqymdy sporttyq is-sharalar ótedi. Atap aıtqanda, Taldyqorǵan qalasynda sport mekemeleri qyzmetkerleri arasynda oblystyq spartakıada, Atyraýda jasóspirimder arasynda kross júgirýden jarys, Almatyda Sport kúnine arnalǵan festıval jáne áýesqoı velosportshylar arasynda Gran Fondo World Championship álem chempıonaty, Qaraǵandyda QARAQANDY HALF MARATHON – 2026 jartylaı marafony, Astanada buqaralyq velojarys, «Astana Handball DAY» ashyq gandbol týrnıri jáne baıdarka men kanoede esýden qala chempıonaty, Aqtaýda «Jas batyr» taekvondo kýbogi, Shymkentte TARTYL FEST sporttyq-buqaralyq festıvali, Qostanaıda KOSTANAY HALF MARATHON jeńil atletıkalyq marafony uıymdastyrylady.

Bul is-sharalar kásibı sportpen qatar, buqaralyq sportty damytýǵa, halyqtyń sporttyq belsendiligin arttyrýǵa jáne salamatty ómir saltyn keńinen nasıhattaýǵa baǵyttalǵan.