باس جاتتىقتىرۋشى نۇرجان ناسانوۆ: بوكسشىلاردىڭ جەڭىسكە دەگەن جىگەرى جاقسى

بوكستان جاپونيادا جالاۋى جەلبىرەگەن حح جازعى ازيا ويىندارىنداعى بوكستان جەكپە-جەكتەر 21 قىركۇيەكتە باستالدى. بۇل كۇنى قازاقستان قۇراماسى شارشى الاڭعا شىققان جوق. بوكستان جەكپە-جەكتەر 2 قازانعا دەيىن بولادى.

ازيا ويىندارىنىڭ الدىندا ۇلتتىق قۇراما ونشاقتى ەلمەن بىرگە جارىس الدىندا بىرلەسكەن جاتتىعۋ جيىنىنا قاتىستى. سونىمەن ەرلەر قۇراماسىندا ماحمۇد سابىرحان (55 كگ)، ورازبەك اسىلقۇلوۆ (60 كگ)، تورەحان سابىرحان (70 كگ)، سابىرجان اققالىقوۆ (80 كگ)، نۇربەك ورالباي (90 كگ)، ايبەك ورالباي (+90 كگ) كۇش سىناسادى.

ازيا ويىندارى كەزىندە ءبىز ەرلەر قۇراماسىنىڭ باس جاتتىقتىرۋشى  نۇرجان ناسانوۆپەن از-كەم اڭگىمەلەسكەن ەدىك. سونى وقىرماننىڭ نازارىنا ۇسىنىپ وتىرمىز.

— بوكسشىنىڭ جەكپە-جەككە دايىندىعى اۋەلى پسيحولوگيالىق دايىندىققا بايلانىستى عوي. ءبىزدىڭ جىگىتتەردىڭ ازياداعا دايىندىعى قالاي بولدى؟ جەكپە-جەك باستالار الدىندا كوڭىل-كۇيلەرى قالاي؟ ۇيقىلارى قانىق پا؟

— دايىندىقتىڭ ءبارى ويداعىداي، جاقسى بولدى. ازيادانىڭ الدىندا وقۋ-جاتتىعۋ جيىنىن وتكىزدىك. وسى جەرگە كەلىپ، تاعى دايىندالدىق. ونشاقتى ەلدىڭ سپورتشىلارىمەن بىرگە جاتتىقتىق.

ازيا ويىندارىنا ءۇش كەزەڭدىك دايىندىقپەن كەلىپ وتىرمىز. العاشقى كەزەڭ امەريكا قۇراما شتاتتارىندا ۇيىمداستىرىلدى. ماقساتىمىز جالپى دەنە دايىندىعىن ارتتىرۋ بولدى. ءارى قاراي الماتى وبلىسىندا بوكستاعى شەبەرلىكتى شىڭدايتىن كەزەك وتكىزىلدى. وندا سپاررينگتەر مەن بوكس جاتتىعۋلارىنا باسىمدىق بەرىلدى. ال قورىتىندى كەزەڭ جاڭا ايتىپ كەتكەنىمدەي، جاپونيادا بولدى. بۇل جاقتا دا جاتتىعۋلارعا قوسا ءار بوكسشىمىز ەكى سپاررينگتىك جەكپە-جەكتەن وتكىزدى. سپورتشىلاردىڭ كوڭىلى-كۇيى، جارىسقا دايىندىعى مەن جەڭىسكە دەگەن ۇمتىلىسى دا جاقسى. سپورتتىق رەجيم ساقتاپ، قالىپقا كەلۋ پروتسەسى بولىپ جاتىر.

— ۇلتتىق قۇراماعا لايىقتى بوكسشىلار تاڭدالىپ، ىرىكتەلىنىپ الدى عوي. ءبارى ەل نامىسىن قورعاۋعا باردى. باسقا ەلدەر دە قاراپ وتىرعان جوق. ءبىزدىڭ بىلعارى قولعاپ شەبەرلەرىنە قاي مەملەكەتتىڭ بوكسشىلارى مىقتى قارسىلاس بولا الادى دەپ ويلايسىز؟

— نەگىزگى قارسىلاستار وزبەكستان، ءۇندىستان، جاپونيا ەلدەرىنەن دەۋگە بولادى. سونىمەن قاتار، يران، موڭعوليا، فيليپپين، تايلاندتتان دا بىرنەشە بوكسشى بار.

— قازىر بوكس دۇنيەجۇزى بويىنشا دامىپ كەلەدى. ازيا ەلدەرى دە دامۋدىڭ بۇل جولىنان قالىس قالىپ وتىرعان جوق. ازيادادا ءبىزدىڭ بوكسشىلارىمىزدىڭ مۇمكىندىگى قانداي؟

— مۇمكىندىك ارينە بار. قازاقستان بوكس قۇراماسى جەڭىس ءۇشىن بارىن سالىپ، دىتتەگەن ماقساتقا جەتەدى دەگەن سەنىم مول.

— ولاي بولسا، بوكسشىلارعا تەك ساتتىلىك تىلەيمىز! بوكسشىلار وزدەرىنە سەنىمدى بولسا ءبارى ساتىمەن بولسىن!

ايەلدەر قۇراماسىنا كەلسەك، ازيادادا الۋا بالقىبەكوۆا (51 كگ)، نازىم قىزايباي (54 كگ)، ۆيكتوريا گرافەەۆا (60 كگ)، ايدا ابىكەەۆا (65 كگ)، ناتاليا بوگدانوۆا (75 كگ) قولعاپ تۇيىستىرەدى.

باس جاتتىقتىرۋشى — ەلدوس سايدالين.

جاقىندا قازاقستان ايەلدەر قۇراماسىنىڭ باس جاتتىقتىرۋشىسى ەلدوس سايدالين اقش-تىڭ لوس-اندجەلەس قالاسىندا وتكەن وقۋ-جاتتىعۋ جيىنىنىڭ قورىتىندىسىنا باعا بەرىپ، بۇرىمدى بوكسشىلاردىڭ ازياداعا دايىن ەكەنىن اتاپ ايتتى.

ول قۇراما كوماندانىڭ اتلانت مۇحيتىنىڭ ار جاعىنداعى الىپ ەلدە ءبىر اي بويى جاتتىققانىن، ءبارى جوسپار بويىنشا بولعانىن جەتكىزدى.

— ءبىزدىڭ جاتتىعۋ شىلدە ايىنىڭ باسىنان تامىزعا دەيىن بولدى. وقۋ-جاتتىعۋ جيىنىنا  8 سپورتشى قاتىستى. ءار بوكسشى 3-4 رەت سپاررينگكە شىقتى.  قارسىلاستاردىڭ دەڭگەيى جاقسى ەكەن.

بۇل جيىننىڭ باستى ەرەكشەلىگى — كاسىپقوي بوكسشىلارمەن قولعاپ ءتۇيىستىرۋ بولدى. ولاردىڭ شەبەرلىگىنە ەشكىم داۋ ايتا المايدى. دەگەنمەن بىزگە جەكپە-جەكتەر وتە پايداسىن بەردى. قىزدار 4 راۋندتان 8 راۋندقا دەيىن سپاررينگكە شىقتى.

قازىر بوكسشىلارىمىز ازيا ويىندارىنا تىڭعىلىقتى دايىندالىپ جاتىر.  اقش-تان كەلگەن سوڭ، الماتى وبلىسىندا كەزەكتى وقۋ-جاتتىعۋ جيىنىن وتكىزدىك. بۇل جەردە ءبىز 16-30 تامىز ارالىعىندا جاتتىقتىق.  بارلىعى، ويداعىداي بولدى، — دەدى ول.

ونىڭ ايتۋىنشا، قۇراما كوماندا ازياداعا قاتىسۋ ءۇشىن كۇنشىعىس ەلىنە ەرتەرەك كەلدى. وسى جەردە تاعى جاتتىقتى. جاپونياعا 20 سپورتشى اتتاندى. ونىڭ بەسەۋى ازياداعا قاتىسسا، 15 بوكسشى تاجىريبە جيناۋ ءۇشىن كەلىپ وتىر. وسىندا جازعى ازيا ويىندارىنا قاتىساتىن بەس ارۋىمىز بەن قۇراماداعى تاعى 15 قىزىمىز بار. ويتكەنى، ايەلدەر اراسىندا جارىستار وتە از. سوندىقتان وسى مۇمكىندىكتى پايدالانىپ، ءار سالماقتاعى ءتورت سپورتشىنىڭ دا تاجىريبە جيناۋىنا جاعداي جاساعىمىز كەلەدى. ودان كەيىن ازيا ويىندارىنا قاتىساتىن بوكسشىلارعا جاقسى دايىندالۋ ءۇشىن كومەك كەرەك.

ەلدوس سايدالين ەرلەر مەن ايەلدەر قۇرامالارىنىڭ بىرىگىپ جاتتىعاتىنىن دا جاسىرمادى.

— مەن نۇرجان ناسانوۆپەن سويلەسىپ، ءبىر-ەكى قىزىمىزدى بىرتىندەپ سپاررينگكە قوسساق دەگەن ۇسىنىس ايتتىم. سەبەبى، ەرلەر بوكسى وتە جىلدام.  قىزدارعا قارقىن كەرەك. مۇنداي تاجىريبە پايدالى. ونى اقش-تاعى وقۋ-جاتتىعۋ كەزىندە كوردىك. وسى ءتاسىلدى قولدانعانبىز، — دەدى باس جاتتىقتىرۋشى.

قورىتا ايتقاندا،  ايەلدەر قۇراماسىنىڭ ازياداداعى باستى ماقساتى – التىن جۇلدە الۋ. كوماندانىڭ باس مامانى جوسپاردىڭ ويداعىداي بولاتىنىنا سەنىمدى.

جالپى، بيىلعى ازيادادا سپورتشىلار 43 سپورت تۇرىنەن 71 ديستسيپلينا بويىنشا 469 مەدالدار جيىنتىعى ءۇشىن باق سىنايدى.

جارىستار توكيو قالاسى مەن سيدزۋوكا، وساكا جانە گيفۋ پرەفەكتۋرالارىنداعى ارەنالاردى قوسا العاندا، 50-دەن استام سپورت نىسانىندا ۇيىمداستىرىلادى.

قورىتا ايتقاندا، ازياداعا قازاقستان ساپىنان 9 الەم چەمپيونى مەن 2 الەم چەمپيوناتىنىڭ ءفيناليسى قاتىسادى. بۇل دودادا 11 جۇلدە جيىنتىعى ۇلەستىرىلەدى. شىنىن ايتقاندا، بىلعارى قولعاپ يەلەرىنىڭ قاي-قايسىسى بولسىن التىن جۇلدەنى جەڭىپ الۋعا ۇمىتكەر. بۇعان دەيىن قازاقستان ۇلتتىق قۇراماسى انگليانىڭ ليۆەرپۋل قالاسىندا وتكەن الەم چەمپيوناتى مەن موڭعوليادا جالاۋى جەلبىرەگەن ازيا چەمپيوناتىندا جالپى ەسەپتە توپ جارعان ەدى. سوعان قاراپ ۇلتتىق قۇراما تاعى دا بيىكتەن كورىنۋى ابدەن مۇمكىن. دەگەنمەن، ازيادا ەلىمىزگە وزبەكستان، ءۇندىستان، موڭعوليا، پاكىستان، قىتاي، جاپونيا سياقتى ەلدەردىڭ وكىلدەرى دە باسەكەلەس بولا الادى. ولار جاقىندا ناگويا قالاسىندا وتكەن سوڭعى حالىقارالىق وقۋ-جاتتىعۋ جيىنىندا قازاقستان قۇراماسىمەن بىرگە ءبىر زالدا جاتتىقتى.

 

اڭگىمەلەسكەن،

داستان كەنجالين

استانا