Bas jattyqtyrýshy Nurjan Nasanov: Boksshylardyń jeńiske degen jigeri jaqsy

Bokstan Japonııada jalaýy jelbiregen HH jazǵy Azııa oıyndaryndaǵy bokstan jekpe-jekter 21 qyrkúıekte bastaldy. Bul kúni Qazaqstan quramasy sharshy alańǵa shyqqan joq. Bokstan jekpe-jekter 2 qazanǵa deıin bolady.

Azııa oıyndarynyń aldynda ulttyq qurama onshaqty elmen birge jarys aldynda birlesken jattyǵý jıynyna qatysty. Sonymen erler quramasynda Mahmud Sabyrhan (55 kg), Orazbek Asylqulov (60 kg), Tórehan Sabyrhan (70 kg), Sabyrjan Aqqalyqov (80 kg), Nurbek Oralbaı (90 kg), Aıbek Oralbaı (+90 kg) kúsh synasady.

Azııa oıyndary kezinde biz erler quramasynyń bas jattyqtyrýshy  Nurjan Nasanovpen az-kem áńgimelesken edik. Sony oqyrmannyń nazaryna usynyp otyrmyz.

— Boksshynyń jekpe-jekke daıyndyǵy áýeli psıhologııalyq daıyndyqqa baılanysty ǵoı. Bizdiń jigitterdiń Azıadaǵa daıyndyǵy qalaı boldy? Jekpe-jek bastalar aldynda kóńil-kúıleri qalaı? Uıqylary qanyq pa?

— Daıyndyqtyń bári oıdaǵydaı, jaqsy boldy. Azıadanyń aldynda oqý-jattyǵý jıynyn ótkizdik. Osy jerge kelip, taǵy daıyndaldyq. Onshaqty eldiń sportshylarymen birge jattyqtyq.

Azııa oıyndaryna úsh kezeńdik daıyndyqpen kelip otyrmyz. Alǵashqy kezeń Amerıka Qurama Shtattarynda uıymdastyryldy. Maqsatymyz jalpy dene daıyndyǵyn arttyrý boldy. Ári qaraı Almaty oblysynda bokstaǵy sheberlikti shyńdaıtyn kezek ótkizildi. Onda sparrıngter men boks jattyǵýlaryna basymdyq berildi. Al qorytyndy kezeń jańa aıtyp ketkenimdeı, Japonııada boldy. Bul jaqta da jattyǵýlarǵa qosa ár boksshymyz eki sparrıngtik jekpe-jekten ótkizdi. Sportshylardyń kóńili-kúıi, jarysqa daıyndyǵy men jeńiske degen umtylysy da jaqsy. Sporttyq rejım saqtap, qalypqa kelý proesi bolyp jatyr.

— Ulttyq quramaǵa laıyqty boksshylar tańdalyp, iriktelinip aldy ǵoı. Bári el namysyn qorǵaýǵa bardy. Basqa elder de qarap otyrǵan joq. Bizdiń bylǵary qolǵap sheberlerine qaı memlekettiń boksshylary myqty qarsylas bola alady dep oılaısyz?

— Negizgi qarsylastar О́zbekstan, Úndistan, Japonııa elderinen deýge bolady. Sonymen qatar, Iran, Mońǵolııa, Fılıppın, Taılandttan da birneshe boksshy bar.

— Qazir boks dúnıejúzi boıynsha damyp keledi. Azııa elderi de damýdyń bul jolynan qalys qalyp otyrǵan joq. Azıadada bizdiń boksshylarymyzdyń múmkindigi qandaı?

— Múmkindik árıne bar. Qazaqstan boks quramasy jeńis úshin baryn salyp, dittegen maqsatqa jetedi degen senim mol.

— Olaı bolsa, boksshylarǵa tek sáttilik tileımiz! Boksshylar ózderine senimdi bolsa bári sátimen bolsyn!

Áıelder quramasyna kelsek, Azıadada Alýa Balqybekova (51 kg), Nazym Qyzaıbaı (54 kg), Vıktorııa Grafeeva (60 kg), Aıda Ábikeeva (65 kg), Natalıa Bogdanova (75 kg) qolǵap túıistiredi.

Bas jattyqtyrýshy — Eldos Saıdalın.

Jaqynda Qazaqstan áıelder quramasynyń bas jattyqtyrýshysy Eldos Saıdalın AQSh-tyń Los-Andjeles qalasynda ótken oqý-jattyǵý jıynynyń qorytyndysyna baǵa berip, burymdy boksshylardyń Azıadaǵa daıyn ekenin atap aıtty.

Ol qurama komandanyń Atlant muhıtynyń ar jaǵyndaǵy alyp elde bir aı boıy jattyqqanyn, bári jospar boıynsha bolǵanyn jetkizdi.

— Bizdiń jattyǵý shilde aıynyń basynan tamyzǵa deıin boldy. Oqý-jattyǵý jıynyna  8 sportshy qatysty. Ár boksshy 3-4 ret sparrıngke shyqty.  Qarsylastardyń deńgeıi jaqsy eken.

Bul jıynnyń basty ereksheligi — kásipqoı boksshylarmen qolǵap túıistirý boldy. Olardyń sheberligine eshkim daý aıta almaıdy. Degenmen bizge jekpe-jekter óte paıdasyn berdi. Qyzdar 4 raýndtan 8 raýndqa deıin sparrıngke shyqty.

Qazir boksshylarymyz Azııa oıyndaryna tyńǵylyqty daıyndalyp jatyr.  AQSh-tan kelgen soń, Almaty oblysynda kezekti oqý-jattyǵý jıynyn ótkizdik. Bul jerde biz 16-30 tamyz aralyǵynda jattyqtyq.  Barlyǵy, oıdaǵydaı boldy, — dedi ol.

Onyń aıtýynsha, qurama komanda Azıadaǵa qatysý úshin Kúnshyǵys eline erterek keldi. Osy jerde taǵy jattyqty. Japonııaǵa 20 sportshy attandy. Onyń beseýi Azıadaǵa qatyssa, 15 boksshy tájirıbe jınaý úshin kelip otyr. Osynda jazǵy Azııa oıyndaryna qatysatyn bes arýymyz ben quramadaǵy taǵy 15 qyzymyz bar. О́ıtkeni, áıelder arasynda jarystar óte az. Sondyqtan osy múmkindikti paıdalanyp, ár salmaqtaǵy tórt sportshynyń da tájirıbe jınaýyna jaǵdaı jasaǵymyz keledi. Odan keıin Azııa oıyndaryna qatysatyn boksshylarǵa jaqsy daıyndalý úshin kómek kerek.

Eldos Saıdalın erler men áıelder quramalarynyń birigip jattyǵatynyn da jasyrmady.

— Men Nurjan Nasanovpen sóılesip, bir-eki qyzymyzdy birtindep sparrıngke qossaq degen usynys aıttym. Sebebi, erler boksy óte jyldam.  Qyzdarǵa qarqyn kerek. Mundaı tájirıbe paıdaly. Ony AQSh-taǵy oqý-jattyǵý kezinde kórdik. Osy tásildi qoldanǵanbyz, — dedi bas jattyqtyrýshy.

Qoryta aıtqanda,  áıelder quramasynyń Azıadadaǵy basty maqsaty – altyn júlde alý. Komandanyń bas mamany jospardyń oıdaǵydaı bolatynyna senimdi.

Jalpy, bıylǵy Azıadada sportshylar 43 sport túrinen 71 dısıplına boıynsha 469 medaldar jıyntyǵy úshin baq synaıdy.

Jarystar Tokıo qalasy men Sıdzýoka, Osaka jáne Gıfý prefektýralaryndaǵy arenalardy qosa alǵanda, 50-den astam sport nysanynda uıymdastyrylady.

Qoryta aıtqanda, Azıadaǵa Qazaqstan sapynan 9 álem chempıony men 2 álem chempıonatynyń fınalısi qatysady. Bul dodada 11 júlde jıyntyǵy úlestiriledi. Shynyn aıtqanda, bylǵary qolǵap ıeleriniń qaı-qaısysy bolsyn altyn júldeni jeńip alýǵa úmitker. Buǵan deıin Qazaqstan ulttyq quramasy Anglııanyń Lıverpýl qalasynda ótken álem chempıonaty men Mońǵolııada jalaýy jelbiregen Azııa chempıonatynda jalpy esepte top jarǵan edi. Soǵan qarap ulttyq qurama taǵy da bıikten kórinýi ábden múmkin. Degenmen, Azııada elimizge О́zbekstan, Úndistan, Mońǵolııa, Pákistan, Qytaı, Japonııa sııaqty elderdiń ókilderi de básekeles bola alady. Olar jaqynda Nagoıa qalasynda ótken sońǵy halyqaralyq oqý-jattyǵý jıynynda Qazaqstan quramasymen birge bir zalda jattyqty.

 

Áńgimelesken,

Dastan KENJALIN

ASTANA