الەكسەي لۋتسەنكو التى دۇركىن ازيادا چەمپيونى اتاندى

جاپونيانىڭ ايچي پرەفەكتۋراسى مەن ونىڭ ورتالىعى ناگويا قالاسىندا ءوتىپ جاتقان حح جازعى ازيا ويىندارىندا قازاقستان قۇراما كومانداسىنىڭ قورجىنى تاعى ءبىر التىن مەدالمەن تولىقتى.

تاس جولداعى ۆەلوسپورتتان ەرلەر اراسىنداعى توپتىق جارىستا الەكسەي لۋتسەنكو توپ جاردى.

ۆەلوشاباندوز 4 ساعات 13 مينۋت 11 سەكۋندتا مارە سىزىعىن ءبىرىنشى بولىپ كەستى. بۇل – لۋتسەنكونىڭ بيىلعى ازيا ويىندارىنداعى ەكىنشى التىن جۇلدەسى. ول جارىستىڭ العاشقى كۇنىندە جەكەلەي سىندا دا چەمپيون اتانعان ەدى.

وسى جەڭىسىنەن كەيىن الەكسەي لۋتسەنكونىڭ قالتاسىنا جازعى ازيا ويىندارىنداعى التىنشى التىن مەدال ءتۇستى.  وسىلايشا ول ازيادا تاريحىندا ەڭ كوپ التىن جۇلدە جەڭىپ العان وتاندىق سپورتشى اتاندى.

لۋتسەنكونىڭ ازياداداعى ناتيجەسى:

ينچحون-2014 – 1 التىن جۇلدە;

دجاكارتا-2018 – 2 التىن مەدال;

حانچجوۋ-2022 – 1 التىن، 1 كۇمىس جۇلدە;

ايچي-ناگويا-2026 – 2 التىن مەدال.

بۇعان دەيىن بۇل رەكورد كانوەدە ەسكەك ەسۋدەن كونستانتين نەگودياەۆقا تيەسىلى ەدى. ول حيروسيما مەن بانگكوكتا وتكەن ازيا ويىندارىندا جالپى 5 التىن مەدال جەڭىپ العان بولاتىن.

الەكسەي لۋتسەنكو – قازاقستان ۆەلوسپورتىنىڭ تانىمال وكىلدەرىنىڭ ءبىرى. ول 2012 جانە 2013 جىلدارى U23 ساناتىندا الەم چەمپيونى اتانىپ، پاريج–نيتستسا مەن ۆۋەلتا يسپانيا جارىستارىنىڭ كەزەڭدەرىندە جەڭىسكە جەتكەن.

 

داستان كەنجالين،

استانا