كۇرەستەن ءاچ: قازاق بالۋاندارى تاعى ءۇش جۇلدە الدى

اقش-تىڭ لاس-ۆەگاس قالاسىندا ءوتىپ جاتقان كۇرەس تۇرلەرىنەن U23 الەم چەمپيوناتىندا قازاقستان قۇراماسىنىڭ قورجىنى تاعى ءۇش مەدالمەن تولىقتى.

تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ سوڭعى مالىمەتىنە قاراعاندا، گرەك-ريم كۇرەسىنەن 87 كەلىگە دەيىنگى سالماقتا سىنعا تۇسكەن وتانداسىمىز تەمىرلان تۇرداقىن (سۋرەتتە) فينالدا يراندىق ياسين ءالي يازديمەن بەلدەسىپ، 0:4 ەسەبىمەن جەڭىلدى. ءسويتىپ، بالۋانىمىز كۇمىس مەدالگە يە بولدى.

سونداي-اق بۇگىن ارسەن جۇما (-55 كگ) ءۇشىنشى ورىن ءۇشىن وتكەن بەلدەسۋدە قىرعىزستاننىڭ وكىلى بارسبەك اسانقوجوەۆتى جەڭىپ، قولا جۇلدەگەر اتاندى. تاعى ءبىر سپورتشىمىز دجوحار ۋزاروۆ اسا اۋىر سالماقتا ارمەنيا وكىلىنەن باسىم ءتۇسىپ، قولا مەدالدى قاناعات تۇتتى.

وسىلايشا، گرەك-ريم كۇرەسىنەن قازاقستان كومانداسى الەم چەمپيوناتىندا بەس جۇلدەمەن جالپىكوماندالىق ەسەپتە ەكىنشى ورىنعا تۇراقتادى. وسىعان دەيىن ايبەك ايتبەكوۆ (-60 كگ) پەن يۋسۋف اشراپوۆ (-72 كگ) چەمپيون اتانعان ەدى.

ەندى الەمدىك دوداداعى بەلدەسۋلەر ايەلدەر كۇرەسىمەن جالعاسادى.

داستان كەنجالين،

استانا