سوڭعى كۇنگى سەرپىلىس

جاپونيانىڭ ايچي پرەفەكتۋراسى مەن ناگويا قالاسىندا تىرەك-قيمىل اپپاراتى، كورۋ قابىلەتى زاقىمدانعان جانە زياتكەرلىك دامۋ ەرەكشەلىكتەرى بار سپورتشىلار اراسىندا وتكەن V ازيا پارا ويىندارى مارەسىنە جەتتى.

قازاقستان سپورتشىلارىنىڭ اراسىنان جارىس الاڭىنا سوڭعى بولىپ شىققان ۆولەيبولدى وتىرىپ ويناۋدان ۇلتتىق قۇراما كوماندا كۇمىس مەدال يەلەندى.

وتانداستارىمىز فينالدا يران قۇراماسىمەن ويناپ، 0:3 ەسەبىمەن جەڭىلدى. وسىلايشا، ۇلتتىق كوماندا ازيا پارا ويىندارىنىڭ كۇمىس جۇلدەگەرى اتاندى. ال قولا جۇلدەنى يراك قۇراماسى يەلەندى.

ءسويتىپ، بيىلعى V ازيا پارا ويىندارىندا قازاقستان قۇراماسى 50 مەدال جەڭىپ الدى. ونىڭ ىشىندە 12 التىن، 16 كۇمىس جانە 22 قولا جۇلدە بار. وسى ناتيجەمەن وتانداستارىمىز جالپىكوماندالىق ەسەپتە توعىزىنشى ورىنعا تۇراقتادى.

ازيا پارا ويىندارىندا قازاقستان نامىسىن 12 سپورت تۇرىنەن 150 سپورتشى قورعادى. اتاپ ايتقاندا، ۆولەيبولدى وتىرىپ ويناۋدان – 12، پارا تاەكۆوندودان – 8، پارا دزيۋدودان – 26، پارا ۇستەل تەننيسىنەن – 12، پارا وق اتۋدان – 12، پارا جەڭىل اتلەتيكادان – 14، پارا ساداق اتۋدان – 9، پارا جۇزۋدەن – 21، ارباداعى تەننيستەن – 3، پارا پاۋەرليفتينگتەن – 15، بوچچادان – 5 جانە پارا ۆەلوسپورتتان – 13 سپورتشى قاتىستى.

ءبىر اپتاعا سوزىلعان جارىستا وتانداستارىمىز پارا دزيۋدو، پارا ۆەلوسپورت، پارا ءجۇزۋ جانە وزگە دە سپورت تۇرلەرىنەن جۇلدەلى ورىندارعا يە بولدى.

پارا ازيادانىڭ اياقتالۋىنا ساناۋلى كۇندەر قالعاندا پاراسپورتشىلار اراسىنان اقتولقىن سەيىلبەكوۆا، زارينا رايفوۆا، نايل ەرمۇحانبەت، يبراھيم نۇرماحان ۇلى، بەكسۇلتان قۇلمىرزا، جۇرقامىرزا شۇكىربەكوۆ پەن اناستاسيا كالاۋس التىن مەدال جەڭىپ الىپ، ەل قورجىنىنىڭ تولىعۋىنا ۇلەس قوستى.

پارا دزيۋدودان جانبوتا امانجول كۇمىس مەدال جەڭىپ الدى. عالىمجان سماعۇل ۇلى، ەرمەك نۇرقاباەۆ، باعلانبەك ونالبەك، ەرلان وتەپوۆ، ءالفيا تىلەكقابىل، دايانا فەدوسوۆا جانە ايالا مەرەكە قولا جۇلدەگەر اتاندى.

بۇل سپورت تۇرىنەن سپورتشىلار 5 التىن، 1 كۇمىس جانە 7 قولا مەدال يەلەنىپ، جالپى سانى 13 جۇلدەگە يە بولدى.

پارا جۇزۋدەن قازاقستان قۇراماسى 1 التىن، 5 كۇمىس جانە 4 قولا مەدال جەڭىپ الىپ، جالپى سانى 10 جۇلدەنى يەلەندى.

سپورتتىڭ وسى تۇرىنەن دياس كەنجەبەك S10 كلاسىندا 100 مەترگە ارقامەن جۇزۋدەن ازيا پارا ويىندارىنىڭ چەمپيونى اتانسا، 100 مەترگە ەركىن ءجۇزۋ جانە 200 مەترگە كەشەندى ءجۇزۋ قاشىقتىقتارىندا كۇمىس، 100 مەترگە باتتەرفلياي ادىسىمەن جۇزۋدەن قولا مەدال جەڭىپ الدى.

ءالي تۇرعانبەكوۆ SB4 كلاسىندا 100 مەترگە براسس ادىسىمەن جۇزۋدەن كۇمىس جۇلدەگە يە بولدى. سونىمەنە بىرگە ول  قۇراما ساپىندا 4×50 مەترگە ارالاس كەشەندى ەستافەتاعا قاتىسىپ، تاعى ءبىر كۇمىس مەدال يەلەندى. بۇل جارىستا ۇلتتىق قۇراما نامىسىن ءالي تۇرعانبەكوۆپەن بىرگە ناتاليا زۆياگينتسەۆا، ءزۇلفيا عابيدۋللينا، ايسۇلتان قۇلقاەۆ پەن سيازبەك داليەۆ قورعادى.

قازاقستان قۇراماسى 4×50 مەترگە ەركىن ستيلدەگى ارالاس ەستافەتادا دا كۇمىس جۇلدەگەر اتاندى. بۇل سىندا ناتاليا زۆياگينتسەۆا، ايسۇلتان قۇلقاەۆ، سيازبەك داليەۆ پەن ءزۇلفيا عابيدۋللينا جارىس جولىنا شىقتى. ال رومان پوتاپوۆ، ۆيكتور ۆولكوۆ پەن الينا سينەلنيكوۆا قولا مەدال جەڭىپ الىپ، ۇلتتىق قۇرامانىڭ جۇلدەلەر سانىن تولىقتىردى.

پارا ۆەلوسپورتتان ەل قۇراماسى 4 التىن، 4 كۇمىس پەن 1 قولا مەدال جەڭىپ الدى.

نايل ەرمۇحامبەت ەرلەر اراسىنداعى B كلاسىندا تاسجولداعى توپتىق جارىس پەن جەكە ۋاقىتقا جارىسۋدان ەكى التىن جۇلدەنى يەلەندى.

اناستاسيا كالاۋس تا ايەلدەر اراسىنداعى وسى ەكى باعدارلامادا چەمپيون اتاندى. سونىمەن قاتار ول ترەكتەگى 4000 مەترگە جەكە قۋالاۋ جارىسىندا كۇمىس جۇلدەگە يە بولدى.

كيريلل يليۋكەۆيچ تاسجولداعى توپتىق جارىس پەن جەكە ۋاقىتقا جارىسۋدان ەكى كۇمىس، ترەكتەگى 4000 مەترگە جەكە قۋدالاۋ جارىسىندا قولا مەدال جەڭىپ السا، جۇلدىز قايناروۆا تاسجولداعى توپتىق جارىستا كۇمىس جۇلدەگەر اتاندى.

پارا پاۋەرليفتينگتەن قازاقستان قۇراماسى دا ەرلەدى. ولار 1 التىن، 2 كۇمىس پەن 3 قولا مەدال الدى.

داۆيد دەگتيارەۆ 54 كەلىگە دەيىنگى سالماق دارەجەسىندە 192 كەلىنى كوتەرىپ، ازيا پارا ويىندارىنىڭ رەكوردىن جاڭارتىپ، چەمپيون اتاندى.

تۇرسىناي قابىل 41 كەلىگە دەيىنگى، الينا سولودۋحينا 45 كەلىگە دەيىنگى سالماق دارەجەسىندە كۇمىس مەدالدى يەلەندى.

ستانيسلاۆ شاكيەۆ پەن ايجان بەرىمقۇلوۆا جەكەلەي سىندا قولا جۇلدەگەر اتاندى. سونىمەن قاتار ەربولات كارىباي، داۆيد دەگتيارەۆ پەن ستانيسلاۆ شاكيەۆتەن قۇرالعان قازاقستان ەرلەر قۇراماسى كوماندالىق جارىستا قولا مەدالدى قاناعات تۇتتى.

پارا جەڭىل اتلەتيكادان قازاقستان قۇراماسى 2 كۇمىس جانە 2 قولا مەدال جەڭىپ الدى. يسلام ءسالىموۆ T13 كلاسىندا ۇزىندىققا سەكىرۋدەن، داستان مۇقاشبەكوۆ F36 كلاسىندا يادرو يتەرۋدەن كۇمىس جۇلدەگەر اتانسا، يۆان زالەزنياك F36 كلاسىندا، ماحامبەت سەرىكقاليەۆ F53 كلاسىندا يادرو يتەرۋدەن قولا مەدالگە يە بولدى. ال ايسۇلۋ سۇلەيمەنوۆا ايەلدەر اراسىندا 100 مەترگە جۇگىرۋدەن T62 كلاسىندا 16،18 سەكۋند ناتيجە كورسەتىپ، ازيا رەكوردىن جاڭارتتى.

پارا ۇستەل تەننيسىنەن قازاقستان سپورتشىلارى قورجىندى 4 قولا مەدالمەن تولىقتىردى. وسىلايشا ۇلتتىق قۇراما اتالعان سپورت تۇرىنەن دە جۇلدەگەرلەر قاتارىنان كورىندى.

پارا ساداق اتۋدان قازاقستان قۇراماسى 1 كۇمىس پەن 1 قولا جۇلدەنى يەلەندى. ەرلەر اراسىنداعى W1 كلاسىندا جۇپتىق سىندا نۇرشات تولەۋقاسىم مەن تەمىرلان سەيتقامال كۇمىس جۇلدەگەر اتاندى. بۇل — قازاقستاننىڭ ازيا پارا ويىندارى تاريحىنداعى پارا ساداق اتۋدان العاشقى جۇلدەسى.

سونىمەن قاتار نۇرشات تولەۋقاسىم W1 كلاسىنداعى جەكەلەي جارىستا قولا مەدال جەڭىپ الدى.

پارا وق اتۋدان ەركىن عابباسوۆ R1 باعدارلاماسىندا، SH1 كلاسىندا 10 مەتر قاشىقتىقتان پنەۆماتيكالىق ۆينتوۆكامەن اتۋ سايىسىندا ازيا پارا ويىندارىنىڭ چەمپيونى اتاندى. ال پارا تاەكۆوندو، بوچچا جانە ارباداعى تەننيستەن سىنعا تۇسكەن قازاقستان سپورتشىلارى جۇلدەلى ورىندارعا يە بولا المادى.

تۋريزم جانە سپورت مينيسترلىگىنىڭ حابارلاۋىنشا، بيىلعى ازيا پارا ويىندارى قازاقستان ۇلتتىق قۇراماسى ءۇشىن ناتيجەلى بولدى. 2023 جىلى قىتايدىڭ حانچجوۋ قالاسىندا وتكەن IV ازيا پارا ويىندارىمەن سالىستىرعاندا سپورتشىلارىمىز جالپىكوماندالىق ەسەپتە ەكى ورىنعا كوتەرىلدى. قىتايدا 8 التىن، 12 كۇمىس پەن 21 قولا مەدال جەڭىپ الىپ، جالپىكوماندالىق ەسەپتە 11-ورىن يەلەنگەن بولاتىن. ال بيىل ۇلتتىق قۇراما 12 التىن، 16 كۇمىس پەن 22 قولا مەدالگە يە بولدى. سونىمەن بىرگە بيىل ەل قۇراماسى ازيا پارا ويىندارىنىڭ تاريحىندا العاش رەت پارا ۇستەل تەننيسى مەن پارا ساداق اتۋدان مەدال جەڭىپ الدى. سپورتشىلارىمىز بىرنەشە رەكورد جاسادى.

ەركىن عابباسوۆ پەن داۆيد دەگتيارەۆ ازيا پارا ويىندارىنىڭ رەكوردتارىن جاڭارتسا، دياس كەنجەبەك پەن ايسۇلۋ سۇلەيمەنوۆا ءوز كلاستارىندا ازيا رەكوردىن جاسادى. بۇل جەتىستىكتەر — ەڭ الدىمەن، مەملەكەت تاراپىنان پارا سپورتتى دامىتۋعا كورسەتىلىپ وتىرعان قولداۋدىڭ، سپورتشىلارىمىزدىڭ تاباندىلىعى مەن قاجىرلى ەڭبەگىنىڭ، جاتتىقتىرۋشىلاردىڭ كاسىبي جۇمىسى مەن جۇيەلى دايىندىقتىڭ ناتيجەسى.

پارا ازيادانىڭ جابىلۋ سالتاناتىندا ەلىمىزدىڭ كوك تۋىن كوركەم گيمناستيكادان جاسوسپىرىمدەر اراسىندا الەم چەمپيونى، 16 جاستاعى اقمارال ەرەكەشەۆا الىپ شىقتى.

بيىلعى پارا ازيادادا قىتاي قۇراماسى جالپىكوماندالىق ەسەپتى ءبىرىنشى ورىنعا يە بولدى. ولار 207 التىن، 117 كۇمىس پەن 111 قولا جۇلدەنى، بارلىعى 435 مەدالدى جەڭىپ الدى. ەكىنشى ورىندى 63 التىن، 60 كۇمىس جانە 62 مەدالمەن جاپونيانىڭ سپورتشىلارى يەلەندى. ءۇشىنشى ورىنعا 45 التىن، 49 كۇمىس جانە 52 قولا جۇلدە العان وزبەكستان وكىلدەرى شىقتى.

ەندى كەلەسى VI ازيا پارا ويىندارى 2030 جىلى 4-19 قاراشا ارالىعىندا ءوز تاريحىندا ەكىنشى مارتە كاتاردىڭ استاناسى دوحا قالاسىندا بولادى.

 

داستان كەنجالين،

استانا