Sońǵy kúngi serpilis

Japonııanyń Aıchı prefektýrasy men Nagoıa qalasynda tirek-qımyl apparaty, kórý qabileti zaqymdanǵan jáne zııatkerlik damý erekshelikteri bar sportshylar arasynda ótken V Azııa Para oıyndary máresine jetti.

Qazaqstan sportshylarynyń arasynan jarys alańyna sońǵy bolyp shyqqan voleıboldy otyryp oınaýdan ulttyq qurama komanda kúmis medal ıelendi.

Otandastarymyz fınalda Iran quramasymen oınap, 0:3 esebimen jeńildi. Osylaısha, ulttyq komanda Azııa Para oıyndarynyń kúmis júldegeri atandy. Al qola júldeni Irak quramasy ıelendi.

Sóıtip, bıylǵy V Azııa Para oıyndarynda Qazaqstan quramasy 50 medal jeńip aldy. Onyń ishinde 12 altyn, 16 kúmis jáne 22 qola júlde bar. Osy nátıjemen otandastarymyz jalpykomandalyq esepte toǵyzynshy orynǵa turaqtady.

Azııa Para oıyndarynda Qazaqstan namysyn 12 sport túrinen 150 sportshy qorǵady. Atap aıtqanda, voleıboldy otyryp oınaýdan – 12, para taekvondodan – 8, para dzıýdodan – 26, para ústel tennısinen – 12, para oq atýdan – 12, para jeńil atletıkadan – 14, para sadaq atýdan – 9, para júzýden – 21, arbadaǵy tennısten – 3, para paýerlıftıngten – 15, bochchadan – 5 jáne para velosporttan – 13 sportshy qatysty.

Bir aptaǵa sozylǵan jarysta otandastarymyz para dzıýdo, para velosport, para júzý jáne ózge de sport túrlerinen júldeli oryndarǵa ıe boldy.

Para Azıadanyń aıaqtalýyna sanaýly kúnder qalǵanda parasportshylar arasynan Aqtolqyn Seıilbekova, Zarına Raıfova, Naıl Ermuhanbet, Ibrahım Nurmahanuly, Beksultan Qulmyrza, Jurqamyrza Shúkirbekov pen Anastasııa Kalaýs altyn medal jeńip alyp, el qorjynynyń tolyǵýyna úles qosty.

Para dzıýdodan Janbota Amanjol kúmis medal jeńip aldy. Ǵalymjan Smaǵululy, Ermek Nurqabaev, Baǵlanbek Onalbek, Erlan О́tepov, Álfııa Tilekqabyl, Daıana Fedosova jáne Aıala Mereke qola júldeger atandy.

Bul sport túrinen sportshylar 5 altyn, 1 kúmis jáne 7 qola medal ıelenip, jalpy sany 13 júldege ıe boldy.

Para júzýden Qazaqstan quramasy 1 altyn, 5 kúmis jáne 4 qola medal jeńip alyp, jalpy sany 10 júldeni ıelendi.

Sporttyń osy túrinen Dıas Kenjebek S10 klasynda 100 metrge arqamen júzýden Azııa Para oıyndarynyń chempıony atansa, 100 metrge erkin júzý jáne 200 metrge keshendi júzý qashyqtyqtarynda kúmis, 100 metrge batterflıaı ádisimen júzýden qola medal jeńip aldy.

Álı Turǵanbekov SB4 klasynda 100 metrge brass ádisimen júzýden kúmis júldege ıe boldy. Sonymene birge ol  qurama sapynda 4×50 metrge aralas keshendi estafetaǵa qatysyp, taǵy bir kúmis medal ıelendi. Bul jarysta ulttyq qurama namysyn Álı Turǵanbekovpen birge Natalıa Zvıagıneva, Zúlfııa Ǵabıdýllına, Aısultan Qulqaev pen Sııazbek Dalıev qorǵady.

Qazaqstan quramasy 4×50 metrge erkin stıldegi aralas estafetada da kúmis júldeger atandy. Bul synda Natalıa Zvıagıneva, Aısultan Qulqaev, Sııazbek Dalıev pen Zúlfııa Ǵabıdýllına jarys jolyna shyqty. Al Roman Potapov, Vıktor Volkov pen Alına Sınelnıkova qola medal jeńip alyp, ulttyq quramanyń júldeler sanyn tolyqtyrdy.

Para velosporttan el quramasy 4 altyn, 4 kúmis pen 1 qola medal jeńip aldy.

Naıl Ermuhambet erler arasyndaǵy B klasynda tasjoldaǵy toptyq jarys pen jeke ýaqytqa jarysýdan eki altyn júldeni ıelendi.

Anastasııa Kalaýs ta áıelder arasyndaǵy osy eki baǵdarlamada chempıon atandy. Sonymen qatar ol trektegi 4000 metrge jeke qýalaý jarysynda kúmis júldege ıe boldy.

Kırıll Ilıýkevıch tasjoldaǵy toptyq jarys pen jeke ýaqytqa jarysýdan eki kúmis, trektegi 4000 metrge jeke qýdalaý jarysynda qola medal jeńip alsa, Juldyz Qaınarova tasjoldaǵy toptyq jarysta kúmis júldeger atandy.

Para paýerlıftıngten Qazaqstan quramasy da erledi. Olar 1 altyn, 2 kúmis pen 3 qola medal aldy.

Davıd Degtıarev 54 kelige deıingi salmaq dárejesinde 192 kelini kóterip, Azııa Para oıyndarynyń rekordyn jańartyp, chempıon atandy.

Tursynaı Qabyl 41 kelige deıingi, Alına Solodýhına 45 kelige deıingi salmaq dárejesinde kúmis medaldi ıelendi.

Stanıslav Shakıev pen Aıjan Berimqulova jekeleı synda qola júldeger atandy. Sonymen qatar Erbolat Káribaı, Davıd Degtıarev pen Stanıslav Shakıevten quralǵan Qazaqstan erler quramasy komandalyq jarysta qola medaldi qanaǵat tutty.

Para jeńil atletıkadan Qazaqstan quramasy 2 kúmis jáne 2 qola medal jeńip aldy. Islam Sálimov T13 klasynda uzyndyqqa sekirýden, Dastan Muqashbekov F36 klasynda ıadro ıterýden kúmis júldeger atansa, Ivan Zaleznıak F36 klasynda, Mahambet Serikqalıev F53 klasynda ıadro ıterýden qola medalge ıe boldy. Al Aısulý Súleımenova áıelder arasynda 100 metrge júgirýden T62 klasynda 16,18 sekýnd nátıje kórsetip, Azııa rekordyn jańartty.

Para ústel tennısinen Qazaqstan sportshylary qorjyndy 4 qola medalmen tolyqtyrdy. Osylaısha ulttyq qurama atalǵan sport túrinen de júldegerler qatarynan kórindi.

Para sadaq atýdan Qazaqstan quramasy 1 kúmis pen 1 qola júldeni ıelendi. Erler arasyndaǵy W1 klasynda juptyq synda Nurshat Tóleýqasym men Temirlan Seıtqamal kúmis júldeger atandy. Bul — Qazaqstannyń Azııa Para oıyndary tarıhyndaǵy para sadaq atýdan alǵashqy júldesi.

Sonymen qatar Nurshat Tóleýqasym W1 klasyndaǵy jekeleı jarysta qola medal jeńip aldy.

Para oq atýdan Erkin Ǵabbasov R1 baǵdarlamasynda, SH1 klasynda 10 metr qashyqtyqtan pnevmatıkalyq vıntovkamen atý saıysynda Azııa Para oıyndarynyń chempıony atandy. Al para taekvondo, bochcha jáne arbadaǵy tennısten synǵa túsken Qazaqstan sportshylary júldeli oryndarǵa ıe bola almady.

Týrızm jáne sport mınıstrliginiń habarlaýynsha, bıylǵy Azııa Para oıyndary Qazaqstan ulttyq quramasy úshin nátıjeli boldy. 2023 jyly Qytaıdyń Hanchjoý qalasynda ótken IV Azııa Para oıyndarymen salystyrǵanda sportshylarymyz jalpykomandalyq esepte eki orynǵa kóterildi. Qytaıda 8 altyn, 12 kúmis pen 21 qola medal jeńip alyp, jalpykomandalyq esepte 11-oryn ıelengen bolatyn. Al bıyl ulttyq qurama 12 altyn, 16 kúmis pen 22 qola medalge ıe boldy. Sonymen birge bıyl el quramasy Azııa Para oıyndarynyń tarıhynda alǵash ret para ústel tennısi men para sadaq atýdan medal jeńip aldy. Sportshylarymyz birneshe rekord jasady.

Erkin Ǵabbasov pen Davıd Degtıarev Azııa Para oıyndarynyń rekordtaryn jańartsa, Dıas Kenjebek pen Aısulý Súleımenova óz klastarynda Azııa rekordyn jasady. Bul jetistikter — eń aldymen, memleket tarapynan para sportty damytýǵa kórsetilip otyrǵan qoldaýdyń, sportshylarymyzdyń tabandylyǵy men qajyrly eńbeginiń, jattyqtyrýshylardyń kásibı jumysy men júıeli daıyndyqtyń nátıjesi.

Para Azıadanyń jabylý saltanatynda elimizdiń kók týyn kórkem gımnastıkadan jasóspirimder arasynda álem chempıony, 16 jastaǵy Aqmaral Erekesheva alyp shyqty.

Bıylǵy Para Azıadada Qytaı quramasy jalpykomandalyq esepti birinshi orynǵa ıe boldy. Olar 207 altyn, 117 kúmis pen 111 qola júldeni, barlyǵy 435 medaldi jeńip aldy. Ekinshi oryndy 63 altyn, 60 kúmis jáne 62 medalmen Japonııanyń sportshylary ıelendi. Úshinshi orynǵa 45 altyn, 49 kúmis jáne 52 qola júlde alǵan О́zbekstan ókilderi shyqty.

Endi kelesi VI Azııa Para oıyndary 2030 jyly 4-19 qarasha aralyǵynda óz tarıhynda ekinshi márte Katardyń astanasy Doha qalasynda bolady.

 

Dastan KENJALIN,

ASTANA