Karateshi Móldir Jańbyrbaı men Sofıa Berýleva jeńimpaz atandy

Búgin Reseı Federaııasynyń astanasy Máskeýde WKF karateden V Moscow Karate Universe halyqaralyq jarysy aıaqtaldy, dep habarlaıdy SportPress.kz.

Týrızm jáne sport mınıstrligi Sport jáne dene shynyqtyrý isteri komıteti Sportty damytý dırekııasynyń málimetine qaraǵanda, Qazaqstan komandasy jarys nátıjesinde 2 altyn, 4 qola medal alyp, jalpy esepte ekinshi orynǵa turaqtady.

Karateden qazaqtan shyqqan tuńǵysh álem chempıony Móldir Jańbyrbaı kýmıte baǵdarlamasynda 50 kg deıingi salmaqta top jardy. Ol fınalda ózbekstandyq tatamı sheberi Dııora Pýlatovany aıqyn basymdyqpen jeńdi. Jekpe-jek 5:1 esebimen aıaqtaldy.

Tokıo Olımpıadasynyń qola júldegeri, eki dúrkin Azıada chempıony Sofıa Berýleva (+68 kg) altyn júldeni jeńip aldy. Otandasymyz fınalda Mahbýb Basharı Atenaǵa (Iran) esh múmkindik qaldyrǵan joq.

Gúlmıra Úsenova (-55 kg), Aıjan Bákirova (-61 kg), Azııa chempıony Daııana Darenskaıa (-68 kg) men Nıkıta Tarnakın (-84 kg) óz salmaǵynda úzdik úshtikti túıindedi.

Úsh kúnge sozylǵan básekege 40 memleketten 400-den astam tatamı sheberi jınaldy.

Byltyr Qazaqstan sportshylary týrnırde 1 altyn, 2 kúmis, 2 qola medal ıelengen edi.