جاقىندا سەنەگالدىڭ داكار قالاسىندا وتكەن جاسوسپىرىمدەر وليمپياداسىندا وتانداسىمىز تورەحان تۇرسىمباەۆ ەلىمىز اتىنان جالعىز ءوزى فۋتزال ماتچتارىنا تورەلىك ەتىپ قايتتى.
ول فۋتزال ءتۋرنيرىنىڭ ويىندارىنا قىزمەت كورسەتۋ ءۇشىن حالىقارالىق فۋتبول فەدەراتسياسىنىڭ (فيفا) تاراپىنان تاعايىندالدى.
فيفا-نىڭ 14 قازاندا جاريالاعان رەسمي تىزىمىنە الەمنىڭ التى كونفەدەراتسياسىنان 20 تورەشى مەن ءبىر قوسالقى تورەشى ەندى. ولاردىڭ اراسىندا ءبىز ءسوز ەتكەلى وتىرعان تورەحان تۇرسىمباەۆ تا بولدى.
جاسوسپىرىمدەر وليمپياداسىنىڭ ءداستۇرلى ءتۋرنيرى داكاردا 1-12 قاراشا ارالىعىندا ءوتتى. وعان ۇلدار مەن قىزدار اراسىنداعى 16 قۇراما كوماندا قاتىسىپ، بارلىعى 32 ماتچ وتكىزىلدى.
وليمپيادادا ول كوستا-ريكا — يران، پاناما — اۋعانستان، سەنەگال -ۆەنەسۋەلا، پاراگۆاي — ماروككو، ماروككو — سولومون ارالدارى، جارتىلاي فينالدا ارگەنتينا مەن ماروككو، قولا جۇلدە ءۇشىن ويىندا اۋعانستان مەن ماروككو كوماندالارىنىڭ ويىندارىنا تورەلىك ەتتى. بۇل ەلىمىز ماماندارىنىڭ حالىقارالىق دەڭگەيدەگى كاسىبي بىلىكتىلىگى مەن تورەشىلەر شەبەرلىگىنە كورسەتىلگەن سەنىمنىڭ بەلگىسى دەۋگە بولادى. سونىمەن بىرگە تورەحاننىڭ وسىنداي بەدەلدى حالىقارالىق جارىسقا تاعايىندالۋى تورەشىلەر ءۇشىن ماڭىزدى جەتىستىك.
وسىلاي قازاقتىڭ بالاسى العاش رەت جاسوسپىرىمدەر وليمپياداسىندا فۋتزال ويىندارىنا تورەشى بولىپ قايتتى. تورەحان تورەشى بولۋدى جوعارى وقۋ ورنىن بىتىرىسىمەن ماقسات ەتكەن ەكەن.
ول 1992 جىلى 25 اقپاندا اتباسار قالاسىندا تۋىپ، 1999 جىلى مەكتەپ تابالدىرىعىن اتتاعان. 2010 جىلى قالاداعى №2 ورتا مەكتەپتى تامامداعاننان كەيىن استاناعا كەلىپ، س.سەيفۋللين اتىنداعى قازاق اگرارلىق تەحنيكالىق ۋنيۆەرسيتەتىنە «جەر كاداسترى» ماماندىعى بويىنشا وقۋعا تۇسەدى.
2011 جىلى ولەگ سوكولوۆ دەگەن فۋتبولدان اربيترلار مەكتەبىنىڭ كۋراتورىمەن جولىعادى. سول كەزدەن باستاپ تورەحاننىڭ فۋتبولعا دەگەن قىزىعۋشىلىعى ارتىپ، ول كاسىبي مامان بولۋدى الدىنا ماقسات ەتىپ قويادى.
-مەن 10 جاسىمنان بەرى دوپ تەۋىپ كەلەمىن. فۋتبولدى بالا كەزىمنەن جاقسى كورەمىن.
2010 جىلى وبلىستىق جارىستارعا قاتىسىپ، ءتىپتى ەكى رەت رەسپۋبليكالىق تۋرنيردە دە ويناعانمىن، — دەيدى ول. – 2011 جىلى تورەشىنىڭ جۇمىسىنا قىزىعىپ، اربيترلار دايىندايتىن مەكتەپكە بارىپ، سول جەردە فۋتبول ەرەجەلەرىن ۇيرەنىپ، دەنە شىنىقتىرۋ دايىندىعىنان تەستتەر تاپسىردىم. سودان كەيىن استانا قالاسىنىڭ چەمپيوناتىندا تورەشىنىڭ كومەكشىسى بولدىم. سول كەزدە اۋەسقوي فۋتبولشىلار ليگاسى تۋرالى ەستىپ، 2012 جىلى فۋتزالدان تورەشى قىزمەتىن اتقارا باستادىم.
تورەحاننىڭ ايتۋىنشا، ول العاش رەت 2013 جىلى قازاقستان چەمپيوناتى جوعارعى ليگاسىنىڭ تورەشىسى بولىپ تىركەلگەن. قازىر دە ول سۋپەر ليگانىڭ تورەشىسى.
-2013 جىلى الماتىنىڭ «بتا فۋتزال» مەن ورالدىڭ «تايپاك» كلۋبتارىنىڭ ماتچى مەنىڭ كاسىبي تۇرعىدا العاش رەت تورەلىك ەتكەن ويىنىم بولدى. وسىدان كەيىن مەن حالىقارالىق ماتچتارعا شاقىرىلا باستادىم.
2017 جىلى ۋەفا-نىڭ سەربيادا وتكەن دامۋ كۋبوگى تۋرنيرىندە قىزمەت ەتتىم. سول جىلدىڭ شىلدە ايىندا يتاليادا ۋەفا-نىڭ ايەلدەر اراسىنداعى دامۋ كۋبوگىندە تورەشى بولدىم. بۇل جارىستاردا قازاقستان، سەربيا، رۋمىنيا، يتاليا مەن رەسەي كوماندالارىنىڭ ويىندارىنا تورەلىك ەتتىم. سودان كەيىن 2019 جىلى فيفا-نىڭ حالىقارالىق دارەجەدەگى تورەشىسى اتاندىم، — دەيدى ول.
تورەشىنىڭ حالىقارالىق دەڭگەيدە مويىندالۋى ۇلكەن جەتىستىك. سول كەزدەن بەرى تورەحان ۋەفا چەمپيوندار ليگاسى، الەم جانە ەۋروپا چەمپيوناتتارىنىڭ ىرىكتەۋ تۋرنيرلەرىندە قىزمەت ەتىپ كەلەدى. ال بىلتىر قاراشا ايىندا سلوۆەنيادا وتكەن چەمپوندار ليگاسىنىڭ نەگىزگى كەزەڭىندە تورەلىك ەتتى. فيفا-نىڭ حالىقارالىق دارەجەدەگى تورەشىسى دەگەن اتاق جەر-جۇزىندەگى ماڭىزى زور ماتچتارعا، سونىڭ ىشىندە حالىقارالىق تۋرنيرلەر مەن ىرىكتەۋ كەزەڭدەرىندەگى ويىندارعا قىزمەت كورسەتۋگە مۇمكىندىك بەرەدى.
داستان كەنجالين،
استانا

(تورەحان تۇرسىمباەۆ سولداڭ وڭعا قاراي ءۇشىنشى، توپتىڭ ورتاسىندا تۇر)

SportPress.kz قازاقستان سپورت جاڭالىقتارى