فۋتبولدان ۇلتتىق قۇراما كوماندانىڭ باس جاتتىقتىرۋشى تاعى اۋىساتىن بولدى. بۇل تۋرالى قازاقستان فۋتبول فەدەراتسياسىنىڭ باس حاتشىسى سكوتت مانن ايتتى. ول سەيسەنبى كۇنى قفف كەڭسەسىندە ەلىمىز قۇراما كومانداسىنىڭ ۇلتتار ليگاسىنداعى ناتيجەسىنە قاتىستى مالىمدەمە جاساپ، باس جاتتىقتىرۋشىسى دجون ۆان’ت شكيپتىڭ وسى اپتانىڭ سوڭىندا قىزمەتىنەن كەتەتىنىن ەسكەرتتى.
قازىر قفف ونىڭ ورنىنا باسقا باپكەردى ىزدەپ جاتىر. سكوتت ماننىڭ ايتۋىنشا، جاڭا باپكەر كەلەسى جىلى ناۋرىز ايىندا بەلگىلى بولادى. ال جاڭا باس جاتتىقتىرۋشىنىڭ جەرىلىكتى مامان بولا ما الدە شەتەلدەن كەلە مە ول جاعى ءالى بەلگىسىز. وسى جەردە ول ۇلتتار ليگاسىندا سۇرەڭسىز ناتيجە كورسەتكەن قۇراما كوماندا ءۇشىن كەشىرىم سۇراپ، بار جاۋاپكەرشىلىكتى ءوز موينىنا الاتىنىن ايتتى.
«دجون ۆان’ت شكيپتى قىزمەتكە شاقىرعانىما وكىنىپ قالدىم. ءبىز ونى ۋاقىت تىعىز بولعان سوڭ، كومانداعا شاقىردىق. ول قولىنان كەلگەن جۇمىستى ىستەدى. بىراق ونىڭ جۇمىسىنا كوڭىلىمىز تولعان جوق. سوندىقتان ول قىزمەتىنەن الىنادى»، دەدى ول.
سونىمەن بىرگە ول سوڭعى 10 جىلدا 11 ادامنىڭ ەلىمىزدىڭ باس كومانداسىنىڭ تىزگىنىن ۇستاعانىن، ۇلتتىق قۇراما جاتتىقتىرۋشىسىنىڭ ءجيى اۋىسۋى فۋتبولعا كەرى اسەرىن تيگىزەتىنىن اتاپ ءوتتى. ونىڭ پىكىرىنشە، الدىنا ۇلكەن ماقسات قويعان كوماندا باپكەردى ءجيى اۋىستىرماۋ كەرەك. قازىر باستى مىندەت – الەمدىك رەيتينگتە ۇزدىك 75 قۇرامانىڭ قاتارىنا جاقىنداۋ. ول وسى ماقساتقا جەتۋ ءۇشىن قۇرامانى جاڭارتۋ كەرەك ەكەنىن اتاپ ايتتى.
«بىزگە جاس تالانتتار كەرەك. كوماندانىڭ تامىرىنا قان جۇگىرتەتىن جاس جىگىتتەر قاجەت. سوڭعى ءتورت جىلدا رەيتينگىمىز 110-120-ورىنداردىڭ اراسىندا قۇبىلىپ كەلەدى. سوندىقتان بىزگە كوماندانى جاڭارتىپ، 75-ورىنعا كوتەرىلۋدى ماقسات ەتۋىمىز كەرەك»، دەدى ول.
سكوت مانننىڭ ايتۋىنشا، قازاقستاندا فۋتبولدى دامىتۋ ءۇشىن ناقتى جوسپارى مەن ستراتەگياسى بار. ول ءدال قازىر فارەر ارالدارىنىڭ دەڭگەيى ءبىزدىڭ ەلدەن بيىك ەكەنىن، ويتكەنى بۇل كوماندانىڭ نەگىزگى قۇرامىنداعى فۋتبولشىلاردىڭ 90 پايىزى دانيادا وينايتىنىن، ال قازاقستان كومانداسىنداعى ويىنشىلاردىڭ 90 پايىزى قازاقستان چەمپيوناتىندا دوپ تەبەتىنىن ايتتى.
«ونىڭ وزىندە جەرگىلىكتى فۋتبولشىلار كلۋبتارىندا كوپ وينامايدى. سەبەبى كوماندالاردا لەگيونەرلەر كوپ»، دەدى ول.
وسى جەردە ول بۇگىندە بارلىق ەل 17-19 جاس ارالىعىنداعى جاس فۋتبولشىلارعا ۇلكەن سەنىم ارتاتىنىن، ال قازاقستاندا كەرىسىنشە، جاس تالانتتارعا ەرەسەك فۋتبولشىلارمەن ويناۋعا مۇمكىندىك بەرىلمەيتىنىن ەسكەرتتى.
«شىندىقتىڭ بەتىنە تۋرا قاراساق، 17 جانە 19 جاستاعى ۇزدىك ويىنشىلار بولۋى كەرەك. قازىر قازاقستان فۋتبولىنىڭ باستى پروبلەماسى لايىقتى باس جاتتىقتىرۋشىنىڭ بولماۋى مەن جاس تالانتتاردىڭ اشىلماۋى. بىزگە ۇلتتىق قۇرامانى جاتتىقتىرۋعا مىقتى مامان عانا ەمەس، جاسى دا، مەنتاليتەتى دە سايكەس كەلەتىن، وسىنداي اۋىر جاۋاپكەرشىلىكتى كوتەرۋگە دايىن باپكەر قاجەت.
ەگەر تاجىريبەسى از جاس ماماندى بىردەن ۇلتتىق قۇرامانىڭ جاتتىقتىرۋشىسى ەتىپ قويساق، بۇل ۇلكەن تاۋەكەل بولادى. سوندىقتان بىزگە بايسۋفينوۆ سياقتى تاجىريبەسى مول، جۇيەدە ۇزاق ۋاقىت جۇمىس ىستەگەنىن ادام كەرەك. مەن شىنىن ايتقاندا ونىڭ قىزمەتتەن كەتكەنىن قالامادىم»، دەدى ول.
قفف باس حاتشىسى ۇلتتىق قۇرامانىڭ ءساتسىز ويىندارىنا قاراماستان قىزمەتتەن كەتپەيتىنىن، كەلىسىمشارت بويىشا ءالى 2023 جىلعا دەيىن جۇمىس ىستەيتىنىن، قازاقستانعا فۋتبولدى دامىتۋ ءۇشىن كەلگەنىن مالىمدەدى.
ەسكە سالا كەتسەك، 52 جاستاعى اۋستراليالىق سكوتت مانن بيىل 27 ساۋىردە قازاقستان فۋتبول فەدەراتسياسىنىڭ باس حاتشىسى قىزمەتىنە تاعايىندالدى. ول قىزمەتكە كەلگەننەن كەيىن قازاقستان ۇلتتىق قۇراماسى سەگىز ماتچتا بىردە-ءبىر رەت جەڭىسكە جەتە المادى. ۇلتىق قۇراما ءتورت ويىندا تەڭ ويناپ، ءتورت ماتچتا جەڭىلىپ قالدى.
داستان كەنجالين،
استانا
SportPress.kz قازاقستان سپورت جاڭالىقتارى