اتىراۋدا «مۇنايشى» ستاديونى جاڭاردى

فۋتبولدان قازاقستان كۋبوگىنىڭ فينالدىق تارتىسىنا  قىزىلوردانىڭ «قايسار» كلۋبى مەن «اتىراۋ» كومانداسى شىقتى.

22 قىركۇيەكتە ەكى كلۋب ەل كۋبوگى ءۇشىن تارتىسقا تۇسەتىن بولادى.

اتىراۋدىڭ  «اتىراۋ» كومانداسى قازاقستان كۋبوگىنىڭ جارتىلاي فينالدىق قارىمتا ويىنىن ءوز الاڭىندا، «مۇنايشى» ستاديونىندا وتكىزدى. ماتچ بارىسىنىڭ قالاي وتكەنى جونىندە جازىلدى. ءبىزدىڭ ايتپاعىمىز «مۇنايشى» ستاديونى جونىندە. قاققان قازىعىڭا قارا التىن جاعىلاتىن قازىنالى ءوڭىر، مۇنايلى استاناداعى «مۇنايشى» ستاديونىنىڭ توزىعى جەتىپ، الاڭىنداعى جاسىل جەلەكتىڭ دە ۇسقىنى قاشىپ، كەتەۋى كەتكەن ەدى. وسىدان الپىس جىل بۇرىن سالىنعان ستاديون ۋەفا تالاپتارىنا ساي كەلمەيتىن-ءدى. تابيعي كوگالىن دا كۇن كۇيدىرىپ، جەل سىندىرىپ الا-قۇلا، ويقى-شويقى بوپ جاتاتىن.

بيىلعى جىلدىڭ ناۋرىز ايىندا ستاديوننىڭ الاڭىنا جاساندى  كوگال –  گازون توسەۋ جۇمىستارى باستالعان بولاتىن. اتىراۋ حالقىنا تاماشا سىي، وراسان تارتۋدى «GAZ stroy montazh KZ» جاۋاپكەرشىلگى شەكتەۋلى سەرىكتەستىگى جاساپ، مەجەلى مەرزىمدە «مۇنايشى» ستاديونىن جاساندىرىپ جىبەردى.

قازاقستان كۋبوگىنىڭ جارتىلاي فينالدىق قارىمتا كەزدەسۋىنە تۇسپا-تۇس كۇردەلى جوندەۋدەن وتكەن  ستاديوننىڭ سالتاناتتى اشىلۋىنا  اتىراۋ وبلىستىق دەنەشىنىقتىرۋ جانە سپورت باسقارماسىنىڭ باسشىسى رينات يبراگيموۆ،  فۋتبول ارداگەرى قانات گالياموۆ جانە ستاديوندى كۇردەلى جوندەۋدەن وتكىزىپ بەرگەن مەتسەنات، «GAZ stroy montazh KZ» جشس-ءنىڭ نەگىزىن قالاۋشى، اتىراۋ وبلىستىق جاۋىنگەرلىك ونەر اسسوتسياتسياسىنىڭ ديرەكتورى ەرلان تابىلديەۆ قاتىسىپ، تۇساۋكەسەر ءراسىمىن جاسادى.

ۋەفا ستاندارتىنا ساي، بارلىق تالاپقا لايىقتى   جاڭارتىلعان ستاديوندا وتكەن «اتىراۋ» مەن شىمكەنتتىڭ «ورداباسى» كوماندالارى اراسىنداعى ماتچ 0:0 ەسەبىمەن ءبىتتى. شىمكەنتتە وتكەن العاشقى ويىن 1:1ەسەبىمەن اياقتالعاندىقتان «اتىراۋ» كومانداسىنىڭ سىرت الاڭدا سوققان گولىنىڭ سالماعى باسىپ، فينالعا جولداما الدى.

اتىراۋ وبلىسىنىڭ اكىمى نۇرلان نوعاەۆ تا ويىندا ستاديوننان تاماشالاپ، فۋتبولشىلاردى فينالعا جولداما الۋىمەن قۇتتىقتادى.

– كوماندامىزعا قولداۋ كورسەتۋگە جينالعان جانكۇيەرلەر اتىنان، ءوز اتىمنان وسىناۋ ستاديونعا كۇردەلى جوندەۋ جۇمىسىن جۇرگىزىپ، تاماشا تارتۋ جاساعان اتىمتاي-جومارت ازامات ەرلان حيسمەت ۇلىنا زور العىسىمدى ايتامىن. «اتىراۋ» كومانداسىنىڭ ويىنشىلارى  جاقسى ويىن ورنەگىن كورسەتتى.  جانكۇيەرلەردىڭ ۇلكەن قولداۋى فۋتبولشىلاردىڭ جىگەرىن جاني تۇسكەنى انىق.   قازاقستان كۋبوگىنىڭ فينالدىق كەزەڭىنە بۇعان بۇعان دەيىن ەكى رەت جەتىپ، سۇرىندىك. ەندى بىزگە كۋبوك بۇيىرسىن دەپ تىلەيمىن، – دەدى وبلىس اكىمى نۇرلان اسقار ۇلى.

ستاديونعا كۇردەلى جوندەۋ جۇمىسىن جۇرگىزىپ، الاڭىن جاڭارتىپ بەرگەن ەرلان تابىلديەۆ تە فۋتبولشىلاردى قۇتتىقتاپ،  ساتتىلىك تىلەدى.

– وبلىسىمىزدىڭ فۋتبول كومانداسى جەتىستىككە جەتسە، اتىراۋلىقتاردىڭ قۋانىشى ەكەنى ءسوزسىز. ءوزىمىز بالا كۇنىمىزدەن فۋتبول ماتچتارىن قالت جىبەرمەي تاماشالاپ، جانكۇيەر بولىپ كەلەمىز. اتىراۋلىقتارعا  زاماناۋي ۇلگىدە جوندەۋدەن وتكەن ستاديوندا فۋتبول تاماشالاۋعا وراي تۋعىزعانىمىزدى  پارىز ساناپ، وسىناۋ جاۋاپكەرشىلىكتى ارقالادىق.  قالاعا فۋتبول مەرەكەسى قايتا ورالسا دەگەن تىلەگىمىز ورىندالعانىنا قۋانىشتىمىز. الەمدىك تالاپقا ساي كۇردەلى جوندەۋ جۇرگىزىلگەن  ستاديوندا ەندى فۋتبولشىلارىمىز تولايىم تابىستارىمەن قۋانتا بەرسىن، – دەدى اتىراۋ وبلىستىق جاۋىنگەرلىك ونەر اسسوتسياتسياسىنىڭ ديرەكتورى ەرلان تابىلديەۆ.

توعىز مىڭعا جۋىق كورەرمەن سياتىن ستاديوندا وتكەن «اتىراۋ» مەن «ورداباسى» اراسىنداعى ويىندى تاماشالاۋعا جينالعان قالىڭ كورەرمەن ماتچ سوڭىندا  جەرگىلىكتى كلۋب فۋتبولشىلارىنا ەرەكشە قۇرمەت كورسەتتى.

قۋانىش رازاق،

اتىراۋ.