Аспантауда халықаралық айқас өтеді

27 шілде күні Аспантаулар етегінде, Алматы облысы, Кеген ауданының орталығында жекпе-жек өнерінен Әлмерек батыр атындағы халықаралық турнир жалауын желбіретеді.

Кеген ауданының әкімдігі,  «Әлмерек абыз» қоғамдық қоры және Дүниежүзілік жекпе-жек қауымдастығы тізе қосып ұйымдастыратын турнир Кеген ауданының және Шырғанақ ауылының құрылғанына 90 жыл толуына орай өткізілмек. Ата қазақ жекпе-жек айқасынан Әлмерек батыр  атындағы халықаралық додада  еліміздің таңдаулы сайыпқырандары Орталық Азия елдерінен келетін нояндарға қарсы айқасқа түседі.

Әлмерек батыр бабамызға тағзым ету құрметіне арналған Ата қазақ жекпе-жек ұлттық спорт түрінен кәсіпқой спортшылар арасындағы халықаралық турнирге қатысушылар 10 салмақта айқасқа түседі. Соның ішінде 2 салмақ дәрежесінде чемпиондық атақ пен арнайы  кубок бәйгеге тігіледі.

27 шілде күні 14:00-де басталатын сайыс Кеген ауылындағы спорт алаңында өтеді.

Қуаныш БАЖАҚ,

АЛМАТЫ