استانانىڭ توڭىرەگىندە جاپپاي كوكپاردىڭ جالاۋى جەلبىرەدى

سوڭعى جىلداردا جاپپاي كوكپار ۇيىمداستىرۋ  ەلىمىزدىڭ بارلىق وڭىرىندە بەلەڭ الا باستادى. جۇرتشىلىقتى ءداستۇرلى ويىن مەن ۇلتتىق سپورتقا قىزىقتىرۋ، بۇقارالىق سپورتتى جانداندىرۋ، جاستاردى وتانسۇيگىشتىككە تاربيەلەۋ ماقساتىندا نۇر-سۇلتان قالاسىنىڭ اۋماعىندا ۇلتتىق سپورتتىڭ دوداسى بۇعان دەيىنگى ۋاقىتتا دا از وتكىزىلگەن جوق. سونداي ءدۇبىرلى باسەكەنىڭ ءبىرى ەلوردانىڭ ىرگەسىندەگى تالاپكەر اۋىلىندا 3 قاراشا كۇنى تاماشالانباق. بۇل تۋرالى ۇلتتىق سپورت قاۋىمداستىعى حابارلادى.

بۇل جاپپاي كوكپاردى حاسەنوۆتەر اۋلەتى ومىردەن وزعان اسقار تاۋداي اكەلەرىن ەسكە الۋ قۇرمەتىنە جاساعان جىلدىق اسقا وراي ۇيىمداستىرىپ وتىر. بەلگىلى اتبەگى حاسەن ۇلى اماندىق اقساقال كەزىندە اقمولا ءوڭىرىنىڭ اۋىل شارۋاشىلىعى سالاسىندا ۇزاق جىلدار تابىستى  ەڭبەك ەتىپ، سوتسياليستىك ەڭبەك ەرى وردەنىن يەلەنگەن ەلگە تانىمال تۇلعا. زووتەحنيكا سالاسىنىڭ جوعارى ءبىلىمدى مامانى. جەتى ۇل-قىز تاربيەلەپ وسىرگەن ابزال اكە.

3 قاراشا كۇنى ساعات 11.00-دە باستالاتىن  حاسەنوۆتەر اۋلەتىنىڭ  كوكپارى تۋرالى جارنامانىڭ جاسالعانىنا ايدىڭ ءجۇزى ءوتتى. جاپپاي كوكپاردىڭ جۇلدە قورى اسا قوماقتى. اقشالاي سالىم – 1 ميلليون تەڭگە. سونىمەن قاتار سالىمعا  2 تانا، 2 جاباعى، 2 تاي، 2 ات، 2 تۇيە، بىرنەشە قوي-ەشكى اتالعان. كوكپاردىڭ «وگىز ءولدى»  سالىمى ەكى تۇيە، ياعني، بارۋى ءبىر تۇيە، قايتۋى ءبىر تۇيە. سونداي-اق، كوكپار دوداسىنىڭ دۋمانى قىزعان كەزدە اعايىن-تۋىستىڭ تىگەتىن اتاۋلى سالىمدارى بولماق.  كوكپار تاماشالاۋعا جيىلعان كوپشىلىككە ارنايى اس بەرىلەدى.

قازىرگى كەزدە ارقا تورىندەگى بيىلعى جىلدىڭ ايتۋلى دوداسى سانالعان جاپپاي كوكپارعا الىستان ات تەرلەتىپ كەلگەن اتاقتى بالۋاندار قاتارى مول ەكەنى ءمالىم بولدى. بۇل جاپپاي كوكپاردا اقمولا، قاراعاندى، قوستاناي،  سولتۇستىك قازاقستان، تۇركىستان، جامبىل وبلىستارىنىڭ اتاقتى كوكپارشىلارى باق سىناماق. ۇيىمداستىرۋشىلار بولجامىنا  قاراعاندا وسى جولى تالاپكەر اۋىلىندا ەكىجۇزدەن استام كوكپارشى دوداعا تۇسەدى.

ەلوردانىڭ  ىرگەسىندە وسىنداي ءدۇبىرلى توي  ۇيىمداستىرىلۋدا. ەلىمىزدىڭ ءار وڭىرىندەگى اتاقتى بالۋاندار باق سىنايتىن جاپپاي كوكپاردىڭ دوداسىن تاماشالاۋعا اسىعىڭىز، اعايىن!