بەيسەن قۇرانبەك اتىنداعى جارىستىڭ جالاۋى جەلبىرەدى

تالدىقورعاندا بۇقارالىق اقپارات قۇرالدارى اراسىندا شاعىن فۋتبولدان بەلگىلى جۋرناليست  بەيسەن قۇرانبەكتى ەسكە الۋعا ارنالعان تۋرنير ءوتتى.

وعان جەتىسۋ وڭىرىنەن 6 كوماندا قاتىستى. بەيسەن قۇرانبەك جۋرناليستيكاداعى جولىن «سپورت» گازەتىندە ءتىلشى بولىپ  باستاعان.  فۋتبولشى بولۋدى ارمانداعان.  سپورتتى ەرەكشە باعالادى. سالاماتتى ءومىر سالتىن ۇستاندى. ۇستانىپ قانا قويماي، ايكيدودان قارا بەلبەۋ يەگەرى بولعان. سوندىقتان دا قازاق جۋرناليستيكاسىندا وزىندىك تاڭباسىن قالدىرعان تۇلعانى ەسكە الۋعا ارنالعان جارىستى ۇيىمداستىرۋ كەزدەيسوقتىق ەمەس.

– جۋرناليست بولۋدى ارمانداعان جوقپىن، فۋتبوليست بولعىم كەلگەن. بىراق، بولا المادىم. اسكەردەن كەلگەن سوڭ «فۋتبوليست بولماسام دا، فۋتبول تۋرالى جازاتىن جۋرناليست بولايىن» دەپ ويلادىم. ءسويتىپ «سپورت»  گازەتىنە جۇمىسقا كەلدىم، – دەپ ايتقان ەدى بەيسەن قۇرانبەك «اق جەلكەن» مەن «ۇلاننىڭ» جاس تىلشىلەرىمەن كەزدەسۋگە كەلگەنىندە.

جەتىسۋ جەرىندەگى جارىستى سپورت ءجۋرناليسى ريشاد تۇرعانباەۆ پەن ارىپتەستەرى ۇيىمداستىردى. بولاشاقتا جارىستىڭ اۋقىمىن كەڭەيتۋ جوسپارى دا بار ەكەن.

–تالدىقورعاندا بۇقارالىق اقپارات قۇرالدارى اراسىندا Baq league جارىسى ءوتىپ كەلەدى. سۋپەركۋبوك تا ءوتۋى كەرەك بولعان. وسى سۋپەركۋبوك جارىسىن اعامىز بەيسەن قۇرانبەكتى ەسكە الۋعا ارنادىق. جاقىندا ومىردەن وتكەن اعامىز سپورتتى، ونىڭ ىشىندە فۋتبولدى جاقسى كوردى. ەڭبەك جولىن سپورت سالاسىنان باستاعان. سپورتتاعى جاڭالىقتاردى ماعان حابارلاسىپ سۇراپ وتىراتىن. سوندىقتان جۋرناليستەرمەن كەڭەسە كەلە جارىستىڭ سۋپەركۋبوگىن بەيسەن قۇرانبەك اتىنداعى كۋبوك دەپ اتادىق. بۇل جارىستى كەلەشەكتە رەسپۋبليكالىق دەڭگەيدە وتكىزسەك دەگەن دە ماقسات بار. بىراق كۋبوك جارىسى ەمەس، باق اراسىندا بەيسەن قۇرانبەك اتىنداعى سپارتاكيادا ەتىپ جاساۋ جوسپاردا بار. سەبەبى اعامىز بار سپورت تۇرىنە دەن قويدى. «بارسەلونا» مەن نيدەرلاندى قۇراماسىنىڭ جانكۇيەرى بولدى. فۋتبول عانا ەمەس، ايكيدومەن دە اينالىسقان. قازاق كۇرەسىنەن وتكىزىلگەن جارىستاردى جۇرگىزدى، – دەيدى ريشاد تۇرعانباەۆ.
جارىس سانيتارلىق تالاپتاردى ساقتاي وتىرىپ وتكىزىلدى. ويىنعا جانكۇيەرلەر شاقىرىلماعان. اشىلۋ سالتاناتىندا ءسوز العان الماتى وبلىستىق «جەتىسۋ» تەلەارناسىنىڭ ديرەكتورى سەرىك ابىكەن ۇلى بەيسەن اعامىز جايلى جىلى ەستەلىكتەر ايتىپ، ويىننىڭ ءساتتى وتۋىنە نيەتتەس ەكەنىن ءبىلدىردى. دوپ دوداسىندا العاشقى ءۇش ويىن وليمپيادالىق جۇيە بويىنشا ءوتتى. ياعني، جەڭىلگەن كوماندالار جارىس جولىنان شىعىپ وتىردى. ال جەڭىستىڭ جەلكەنىن كوتەرگەن كوماندالار اينالمالى جۇيە بويىنشا ويىن وتكىزىپ، جەڭىمپازداردى انىقتادى.

جارىس قورىتىندىسى بويىنشا ءبىرىنشى ورىندى «VIP Press» كومانداسى قانجىعاسىنا بايلاسا، ەكىنشى ورىندى «Taldy Paris» كومانداسى ەنشىلەدى. ال ءۇشىنشى ورىن «Baq United» كومانداسىنا بۇيىردى. الماس مىرزاحمەتوۆ («VIP Press») ۇزدىك سۇرمەرگەن اتاندى. سايىس سوڭىندا جەڭىمپازدار مەن جۇلدەگەرلەرگە ماقتاۋ قاعازى مەن مەدالدار، باعالى سىيلىقتار تابىستالدى. ءبىرىنشى ورىن العان «VIP press» كومانداسىنا بەيسەن قۇرانبەك اتىنداعى كۋبوك بەرىلدى. ايتا كەتەيىك، وسىعان دەيىن قازاقستان رەسپۋبليكاسى اقپارات جانە قوعامدىق دامۋ مينيسترلىگى بۇقارالىق اقپارات قۇرالدارىندا وزىندىك شەبەرلىگىمەن كوزگە تۇسكەن جازبا جانە ەلەكتروندى ءباسپاسوز قۇرالدارىندا جۇمىس ىستەيتىن جاس تىلشىلەردى قولداۋ، شىعارماشىلىق ىزدەنىستەرىن شىڭداۋعا جىگەرلەندىرۋ، كورنەكتى جۋرناليست بەيسەن قۇرانبەكتىڭ جارقىن بەينەسىن ەستە قالدىرۋ ماقساتىندا جاستار اراسىندا «جىگەر» سىيلىعىن جاريالاعان ەدى.

ومىربەك سانسىزباي،

الماتى