ىنتىماقتاستىق تۋرالى قۇجاتقا قوي قويىلدى

قازاقستان رەسپۋبليكاسى ءبىلىم جانە عىلىم مينيسترلىگىنىڭ «ۇلتتىق عىلىمي-پراكتيكالىق دەنە تاربيەسى ورتالىعى» رمقك  مەن «استانا مەديتسينا ۋنيۆەرسيتەتى» كەاق ىنتىماقتاستىق تۋرالى مەموراندۋم جاساستى. بۇل تۋرالى اتالعان ورتالىقتىڭ ءباسپاسوز قىزمەتى حابارلادى.

 مەموراندۋم ارنايى مەديتسينالىق توپتار  ءۇشىن دەنە شىنىقتىرۋ ماسەلەلەرى جونىندەگى باعدارلامالاردى ازىرلەۋ جانە ەنگىزۋ، ەمدىك جانە بەيىمدىك دەنە شىنىقتىرۋدى جۇرگىزۋ، بەيىمدىك دەنە شىنىقتىرۋ بويىنشا مۇعالىمدەردىڭ بىلىكتىلىگىن ارتتىرۋ كۋرستارىن وتكىزۋ بويىنشا ءىس-شارالاردى جۇزەگە اسىرۋ ءۇشىن نەگىز بولادى.

مەموراندۋم اياسىندا «ۇلتتىق عىلىمي-پراكتيكالىق دەنە تاربيەسى ورتالىعىنىڭ» باس ديرەكتورى تاستانبەك قۇتجان ۇلى استانا مەديتسينا ۋنيۆەرسيتەتىنىڭ رەكتورى، پروفەسسور داينيۋس پاۆالكيسپەن كەزدەستى.

–مەموراندۋم شەڭبەرىندە ءبىزدىڭ ورتالىقتىڭ جانە ۋنيۆەرسيتەتتىڭ پروفيلاكتيكالىق مەديتسينا جانە نۋتريتسيولوگيا كافەدراسىنىڭ، سپورتتىق مەديتسينا، رەابيليتولوگيا جانە دەنە شىنىقتىرۋ كافەدراسىنىڭ قىزمەتكەرلەرى بىرلەسىپ باعدارلامالاردى ازىرلەيدى، باسپا جانە ەلەكتروندىق باسىلىمداردى، وقۋ-ادىستەمەلىك قۇرالداردى دايىندايدى، عىلىمي-پراكتيكالىق كونفەرەنتسيالار مەن تاقىرىپتىق ءىس-شارالار ۇيىمداستىرادى دەپ جوسپارلانىپ وتىر، – دەدى تاستانبەك ەسەنتاەۆ.

ايتا كەتەيىك، ارنايى مەديتسينالىق توپتاعى دەنە شىنىقتىرۋ ماسەلەلەرى بويىنشا «ۇلتتىق عىلىمي-پراكتيكالىق دەنە تاربيەسى ورتالىعى» بۇعان دەيىن دە قاراعاندى مەديتسينالىق ۋنيۆەرسيتەتىمەن مەموراندۋمعا وتىرعان بولاتىن.

دەنە تاربيەسى مەملەكەتتىك جالپىعا مىندەتتى ءبىلىم بەرۋ تالاپتارىنا جانە ۇلگىلىك (جۇمىس) وقۋ جوسپارلارىنا سايكەس، ءبىلىم بەرۋ ۇيىمدارىندا ساباق جانە ساباقتان تىس ۋاقىتتا جۇزەگە اسىرىلادى. ال، دەنساۋلىعى ناشار ءبىلىم الۋشىلار مەن تاربيەلەنۋشىلەر ارنايى مەديتسينالىق توپتار مەن ەمدiك دەنە شىنىقتىرۋ توپتارىندا اينالىسادى. دەنە مۇمكىندىكتەرى شەكتەۋلى ءبىلىم الۋشىلار مەن تاربيەلەنۋشىلەر بەيىمدىك دەنە شىنىقتىرۋ مەن سپورت قۇرالدارىن پايدالانا وتىرىپ اينالىسادى.

وسىعان وراي، بۇل قۇجاتتار مەكتەپتەردە ارنايى مەديتسينالىق توپتار ءۇشىن دەنە شىنىقتىرۋ باعدارلامالارىن ازىرلەۋگە جانە ەنگىزۋگە، سونىمەن قاتار ءاداپتيۆتى دەنە شىنىقتىرۋدى دامىتۋعا، ءاداپتيۆتى دەنە شىنىقتىرۋ بويىنشا مۇعالىمدەردىڭ بىلىكتىلىگىن ارتتىرۋ كۋرستارىن وتكىزۋگە مۇمكىندىك بەرەدى دەپ كۇتىلۋدە.