دەنە شىنىقتىرۋ ساباعى قاشىقتان وقىتۋدا قالاي ۇيىمداستىرىلۋدا؟

بءىلىم جانە عىلىم مينيسترلىگىنىڭ «ۇلتتىق عىلىمي-پراكتيكالىق دەنە تاربيەسى ورتالىعى» رمكق قاشىقتان وقىتۋ كەزىندە  جالپى ءبىلىم بەرۋ ۇيىمدارىنا «دەنە شىنىقتىرۋ»  ءپانى  بويىنشا پەداگوگيكالىق قىزمەتتى ۇيىمداستىرۋعا ارنالاعان ادىستەمەلىك نۇسقاۋلىق قۇراستىردى. سودان سوڭ، ونى ايماقتىق تاربيەسى   ورتالىقتارىنىڭ باسشىلارى، ادىسكەرلەرى، مۇعالىمدەر، مەكتەپكە دەيىنگى جانە ورتا ءبىلىم كوميتەتى مەن ۇلتتىق ءبىلىم اكادەمياسى وكىلدەرىنىڭ قاتىسۋىمەن  ونلاين كونفەرەنتسيا وتكىزىپ،  تالقىلاۋ جۇمىستارىن   جۇرگىزدى، جالپى پىكىر بويىنشا ادىستەمەلىك نۇسقاۋلىق دەنە شىنىقتىرۋ ءپانى بويىنشا قاشىقتان وقىتۋ كەزىندە  كومەك رەتىندە پەداگوگتارعا پايدالانۋعا ۇسىنىلدى. بۇل تۋرالى اتالعان ورتالىقتىڭ ءباسپاسوز قىزمەتى حابارلادى.

سونىمەن قاتار،  دەنە شىنىقتىرۋ ساباعىن  قاشىقتان وقىتۋعا بايلانىستى وقۋشى مەن اتا-اناعا ارنالعان انيماتسيالىق ۆيدەوروليك ءتۇسىرىلىپ فەيسبۋك، ينستاگرام، تەلەگرام پاراقشالارىندا جاريالاندى. پەداگوگتەرگە ساباق ۇلگىسى رەتىندە دەنە شىنىقتىرۋ ساباعىن قاشىقتان وقىتۋعا ارنالعان ۆيدەوكونتەنتتەر (جەڭىل اتلەتيكا، فۋتبول تاقىرىبى بويىنشا) قازاقستان فۋتبول فەدەراتسياسى جانە جەڭىل اتلەتيكا فەدەراتسياسى ماماندارىمەن بىرلەسىپ دايىندالدى.

ەندى جالپى دەنە شىنىقتىرۋ ساباعى بۇگىنگى كۇنى قالاي قاشىقتان ۇيىمداستىرىلىپ وتكىزىلىپ جاتىر؟ مۇعالىمدەر قاشىقتان وقىتۋدىڭ قانداي تۇرلەرىن پايدالانۋدا؟ قانداي ەلەكتروندى ءبىلىم بەرۋ پورتالىن، سەرۆيستى پايدالانىپ قىزمەت جاساپ جاتىر دەسەك، وندا ءىس جۇزىندە تاجىربيەلى مۇعالىمدەردىڭ پىكىرىمەن بولىسەيىك.

مىسالى، نۇر-سۇلتان قالاسىنداعى №64 مەكتەپ-ليتسەيىنىڭ دەنە شىنىقتىرۋ ءپانىنىڭ مۇعالىمى لءاززات سانسىزبايقىزى ورمانبەكوۆا:

–2020-2021 وقۋ جىلىنىڭ 1-توقسانى قاشىقتان وقىتۋ بولىپ جاتىر. دەنە شىنىقتىرۋ ساباعىن MicrosoftTeams پلاتفورماسىمەن ءوتىپ جاتىرمىن. سىنىپ وقۋشىلارىنا ۋوتساپتان توپ قۇرىلعان. «دەنە شىنىقتىرۋ» پانىنەن قاشىقتان وقىتۋدى ۇيىمداستىرۋ بويىنشا ادىستەمەلىك ۇسىنىمداماعا سۇيەنە وتىرىپ، ساباعىمدى ءبىر ساباق سينحروندى، ەكى ساباعىمدى اسينحروننى وتكىزىپ جاتىرمىن. بۇل پلاتفورماعا مۇعالىم دە، وقۋشىلاردا ۇيرەنىپ قالدى. ساباعىمدى سينحروندى جۇرگىزگەن كەزدە، پلاتفورماعا جۇكتەيمىن، وقۋشىلار ساباق باستالىسىمەن ساباققا كىرەدى. ءار وقۋشىنىڭ ءوزىنىڭ لوگين-ءپارولى بار. ساباعىمدى پرەزەنتاتسيا ارقىلى وقۋشىلارىما كورسەتىپ، ساباعىمدى اشامىن. بۇل كەزدە وقۋشىلار دا الدىنداعى باعىتتاۋ ساباق جوسپارىن اشىپ، دايىن وتىرادى. مۇعالىمنىڭ ايتىپ، كورسەتىپ وتىرعان پرەزەنتاتسياسىن تىڭداي وتىرىپ، تاپسىرمالاردى كەزەگىمەن ورىندايمىز. ساباق كەزىندە وقۋشىلارمەن بايلانىستا بولىپ وتىرامىن. كەرى بايلانىستى وقۋشىلارىم ۋوتساپ جەلىسى ارقىلى جازىپ جىبەرەدى. «ساباقتا نە ءتۇسىندى؟»، «جاتتىعۋلاردى ورىنداۋ قيىنعا سوقپادى ما؟»، «قانداي اسەردە بولدىڭىز؟» دەگەن سياقتى وزدەرىنىڭ ويلارىن جەتكىزىپ وتىر. مۇعالىم تاپسىرمانى ۆيدەوعا نەمەسە سۋرەتكە ءتۇسىرىپ جىبەر دەپ، وقۋشىنى مىندەتتەي المايدى. وقۋشىنىڭ جازباشا ءماتىن تۇرىندە جىبەرگەن كەرى بايلانىسىن دا باعالاۋعا جاتقىزامىن. سوندىقتان مۇعالىم وقۋشىعا سەنۋى كەرەك. ياعني، ءوز تاجىريبەمدە وقۋشىلارىمنىڭ اراسىنان سۋرەتكە جانە ۆيدەوعا ءتۇسىرىپ، جەكەمە جىبەرىپ وتىرعان وقۋشىلارىم بار. ولارعا كوپ راحمەت ايتىپ، موتيۆاتسيا بەرىپ، سمايليكتەر تۇرىندە، سوزدىك ماداقتاۋ تۇرىندە جەكە جاۋاپ جىبەرىپ وتىرامىن. وسى جاعدايدا وقۋشىلار مۇعالىم جىبەرىپ وتىرعان ماداقتاۋ سوزدەرىن، بولماسا سمايليكتەرىن كورگەندە، كوڭىل-كۇيىن سمايليك بولماسا ءسوز تۇرىندە كەرى بايلانىس جاساپ جاتادى. باعىتتاۋ ساباق جوسپارىمداعى تاقىرىبىمدى تولىق اشامىن. ساباقتى جازباشا ءماتىن تۇرىندە، تاقىرىپقا ساي سۋرەتتەردى جانە سىلتەمەنى قويا وتىرىپ جىبەرەمىن. سىلتەمەنى اشا الماعان جاعدايدا، وقۋشى جازباشا ءماتىندى جانە سۋرەتتەردى كورە وتىرا ساباقتان ماعلۇمات الادى. بۇل – دەنە شىنىقتىرۋ مۇعالىمدەرىنە ەسكەرەتىن ەڭ ءبىرىنشى جاعداي. اسينحروندى ساباعىمدى پلاتفورماعا جۇكتەپ جانە ۆاتساپقا جىبەرەمىن. ول جەردە دە وقۋشىلارمەن كەرى بايلانىستى ۆاتساپ جەلىسى ارقىلى جاساپ وتىرامىن، – دەيدى.

قاشىقتان وقىتۋ كەزىندە دەنە شىنىقتىرۋ ساباعىن ءتيىمدى ۇيىمداستىرىپ وتكىزۋدىڭ ماڭىزى زور.  دەنە شىنىقتىرۋ جالپى مادەنيەتتىڭ قۇرامداس بولىگى ەكەنى، ال جاستارعا وسى باعىتتا ءبىلىم بەرۋ دەنە شىنىقتىرۋ ساباعىنان باستالاتىنىن ەستەن شىعارماۋىمىز كەرەك. مۇعالىمدەر ءوز   شەبەرلىكتەرىنىڭ ارقاسىندا ساباقتى بالالارعا قىزىقتى، ءوز ىنتاسىمەن ورىنداۋعا  مۇمكىندىك جاساپ ۇيىمداستىرىپ جاتقانىن بىلدىك. وسى كەزەڭدە دەنە شىنىقتىرۋ مۇعالىمدەرى ءبىر-بىرىمەن تاجىريبە الماسىپ، ءبىر-بىرىنە قولداۋ كورسەتىپ وقۋشىلاردىڭ قيمىل-قوزعالىس بەلسەندىلىگىن تومەندەتپەۋگە مۇمكىندىك جاسايتىندارىنا سەنىمدىمىز.