ىزگىلىك ىزدەسەڭىز، وقىڭىز

الماتىداعى ك. احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ شاڭىراعىندا تاماشا ءبىر سپورتتىق شارا بولىپ ءوتتى. يگىلىكتى ءىس سپورت ءجۋرناليسى، قازاقستان جۋرناليستەر وداعىنىڭ مۇشەسى، س.بەردىقۇلوۆ اتىنداعى سىيلىقتىڭ يەگەرى اقىن ورداباي ۇلىنىڭ «ىزگىلىكپەن ورىلگەن ءومىر» اتتى كىتابىنىڭ تۇساۋكەسەرىنە وراي ۇيىمداستىرىلدى. اۆتور بۇل ەڭبەگىنە  جۋرناليستيكا سالاسىندا 30 جىلدان بەرى  ساراپتاپ سارالاپ جازعان ەڭبەگىن توپتاستىرعان. 

كىتاپتى قولعا العان وقىرمان قازاق سپورتىنىڭ اتىن  الەمدىك  ارەنادا اسقاقتاتىپ، بەدەلىن كوتەرگەن  ار ءتۇرلى سپورت ءتۇرىنىڭ مايتالماندارى مەن ەلىمىزدەگى سپورتتىڭ دامۋىنا ايىرىقشا ۇلەس قوسقان ازاماتتاردىڭ ءومىر جولدارىنان كەڭىنەن اقپار الا الادى. سونىمەن بىرگە، اۆتور بۇل كىتابىندا تەك قانا سپورت سپلاسىمەن شەكتەلمەي وتكىر ماقالالار، پورترەتتىك وچەركتەر، پروزا، پوەزيا، قويىن داپتەرىنە جازىلعان جولجازبالار مەن قاناتتى سوزدەر، ءدىن تاقىرىبىندا دا تولعاي جازعان شىعارمالارىنا كەڭىنەن ورىن بەرگەن. سونداي-اق، ايتۋلى كىتاپ قازاق سپورت جۋرناليستكاسىنا قوسىپ بەرەرى مول سۇبەلى تىڭ شىعارمالارمەن پارمەندى. وقۋعا جەڭىل، ءتىلى  جاتىق، ايتار ويى ورامدى.

«ىزگىلىكپەن ورىلگەن ءومىر» كىتابىنىڭ  تۇساۋكەسەرىن ۇلكەن سپورتتىق مەرەكەگە ۇلاستىرا بىلگەن اقىن ورداباي ۇلى شاعىن فۋتبولدان باق وكىلدەرى مەن ارداگەر سپورتشىلار، اۋەسقوي ويىنشىلار اراسىندا جارىس ۇيىمداستىردى. شاعىن فۋتبولدان وتكەن سىنعا 4 كوماندا كۇش سىناسىپ الماتى قالاسىنىڭ جۋرناليستەر قۇراماسى باس چەمپيون اتاندى.  قالامدى قارۋ ەتكەن جۋرناليستەر فينالدا الماتى  قالاسى  توتەنشە جاعدايلار  قىزمەتى دەپارتامەنتىنىڭ قىزمەتكەرلەرى قۇراماسىنا قارسى وينادى.  فينالدىق ماتچتا ەكى كوماندا دا  جەڭىس ءۇشىن ەشتەڭەدەن ايانعان جوق. وسى شارانىڭ ۇيىتقىسى، كىتاپتىڭ اۆتورى اقىن ورداباي ۇلى باستاپ شىققان جۋرناليستەر قۇراماسى 8-5 ەسەبىمەن توتەنشەلىكتەردى ءتۇتىپ جىبەردى.  ارداگەرلەر اراسىندا تاماشا تارتىستى ويىن كورسەتكەن سايفۋتدين، دارحان، قادەن،  باتىر، ەرتاي، قانات، ەرجان سىندى ازاماتتار ەردىڭ جاسى ەلۋدەن  اسسا دا  الا دوپتى ۇرشىقتاي ۇيىرەتىن ونەرىمەن  تانتى ەتتى.

ءتۋرنيردىڭ قولا مەدالى ءۇشىن تارتىستا الماتى قالالىق «قازپوچتا» مەكەمەسىنىڭ قىزمەتكەرلەرى «قارعالى» فۋتبول كومانداسىن 4:1 ەسەبىمەن ۇتتى.

كىتاپتىڭ سالتاناتتى تۇساۋ كەسەر  قۇرمەتى اتى ايگىلى قازاقتىڭ جەلاياعى، كسرو-نىڭ بىرنەشە دۇركىن رەكوردىن جاڭارتىپ، الەم كۋبوگىنىڭ  يەگەرى اتانعان  ارداگەر سپورتشى ءامين تۇياقوۆقا بەرىلدى. سەكسەننىڭ سەڭگىرىنە جەتكەن اتاقتى اقساقال الدىمەن كىتاپتىڭ بولاشاقتا جاس ۇرپاق ءۇشىن بەرەر عيبراتى وراسان  ەكەنىن ايىرىقشا اتاپ ءوتتى. سالتاناتتى شارانىڭ قۇرمەتتى مەيماندارى  اراسىنان جازۋشى، «ونەر» باسپاسىنىڭ ديرەكتورى اشىربەك كوپىشەۆ، ك. احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجدىڭ ديرەكتورى سەيىلحان قاراقوۆتىڭ ورىنباسارى دانارا قابدەنقىزى بايدوسوۆا،  «قازاقستان قىران» فەدەراتسياسىنىڭ ءتورايىمى باعدات مۇپتەكەقىزى، اقىن ورداباي ۇلىنىڭ ۇستازى، بەلگىلى كوممەنتاتور رابات جانىبەكوۆ، پق «جەلتوقسان اقيقاتى» رەسپۋبليكالىق قوعامىنىڭ توراعاسى بولات قۇرىمباەۆ، قازترانسگاز كومپانياسى  باسشىسىنىڭ ورىنباسارى مۇقان سادۋاقاسوۆ جانە قورداي اۋداندىق دەنەشىنىقتىرۋ جانە سپورت ءبولىمىنىڭ باسشىسى  ديدار مولداعاليەۆ  سوز الىپ كىتاپقا قاتىستى اقجولتاي اقجارما تىلەكتەرىن جەتكىزدى.

قانداي شارۋانى قولعا الساڭ دا ءبىر ۇشى قاراجاتقا بايلانىپ تۇراتىن قازىرگى زاماندا قالىڭدىعى كەرەقارىس كىتاپتى جارىققا شىعارۋعا از كۇش جۇمسالمايدى، قاراجات تابۋ دا وڭاي ەمەس.

اقىن ورداباي ۇلىنىڭ 30 جىلدان بەرى جازعان ەڭبەكتەرى وقىرمان قاۋىمعا كىتاپ بولىپ جەتۋىنە  دەمەۋشىلىك  كورسەتكەن الماتى وبلىسى دەنەشىنىقتىرۋ جانە سپورت باسقارماسىنىڭ باستىعى، وليپيادا ويىندارىنىڭ كۇمىس جۇلدەگەرى نۇرباقىت تەڭىزباەۆ، قازاق كۇرەسىن الەمگە تانىتقان، وليمپيادانىڭ قولا جۇلدەگەرى ماۋلەن مامىروۆ، دۇنيەجۇزىلىك قازاق كۇرەسى فەدەراتسيسىنىڭ قۇرمەتتى پرەزيدەنتى سەرىك تۇكيەۆ جانە الماتى قالاسى قازپوچتا مەكەمەسىنىڭ ديرەكتورى سايفۋتدين شامسۋتدينوۆ سىندى اتىمتاي-جومارت ازاماتتار قارجىلاي قولداۋ كورسەتتى.

كىتاپتىڭ تۇساۋكەسەر راسىمىندە  پق «جەلتوقسان اقيقاتى» رەسپبليكالىق قوعامدىق بىرلەستىگىنىڭ توراعاسى بولات قۇرىمباەۆ مىرزا  اقىن ورداباي ۇلى 1986 جىلى  جەلتوقسان كوتەرىلىسىنە  بەلەسەنە قاتىسىپ، قازاق ەلىنىڭ تاۋەلسىزدىگى ءۇشىن جانىن بەرۋگە دايار ەكەنىن كورسەتىپ، الاڭعا شىعۋى  ونىڭ ۇلتجاندى ازامات ەكەنىن پاش ەتەدى دەپ بىرلەستىك اتىنان ارنايى  مەدال تابىس ەتتى. سونىمەن بىرگە «ەر نامىسى» قوعامدىق بىرلەستىگىنىڭ توراعاسى ەربولات اليادينوۆ تە وردەن تاقسا، قورداي اۋدانى اكىمدىگى دەنەشىنىقتىرۋ جانە سپورت باسقارماسىنىڭ باسشىسى ديدار مولداعاليەۆ پەن الماتى قالاسى قۇتقارۋ  قىزمەتىنىڭ  اتىنان قۇرمەت گرامتولارىمەن كىتاپ اۆتورىن ماراپاتتادى.

جارىس جەڭىمازدارىن ماراپاتتاۋ راسىمىندە ءتۋرنيردىڭ تورەشىلەرى اقىن ورداباي ۇلىنىڭ بال كەزدەن بەرگى ۇستازى، پروفەسسور اسىلحان ابىشەۆ پەن اقىننىڭ تۋىستاس باۋىرى،اتى ايگىلى اقىن، كومپوزيتور كەنەن ازىرباەۆتىڭ تۋعان نەمەرەسى مۇرات كەنەنوۆتەر جەڭىمپازدار مەن جۇلدەگەرلەردى  باعالى سىيلىقتارمەن ماراپپاتتادى.

«نە ەكسەڭ سونى وراسىڭ» – دەمەكشى، بار عۇمىرىن ىزگىكتىڭ جولىنا ارناعان اقىن ورداباي ۇلىنىڭ «ىزگىلىكپەن ورىلگەن ءومىر» اتتى سياسى جاڭا كەپكەن، سۋ جاڭا تۋىندىسى وقىرماننىڭ جۇرەگىنەن جول تاۋىپ، جىلىلىق سىيلارى ءسوزسىز.

قۋان راحمەت،

الماتى

 

«قوردايىمنىڭ جىگىتتەر»

قورداي دەگەن قۇت قونعان ايماعىم بۇل.

ءبارى سوندا دەسەڭدەر قايدا ءدۇلدىل.

كەنەكەم ءان مەن جىردىڭ كەنى بولعان،

تەربەگەن ءسۇلۋتوردىڭ جايلاۋىن جىر.

نىعمەت ساۋرانباەۆ اكادەميك

ءتىل عىلىمىن زەرتتەگەن قايماعىم بۇل.

سانسىزباي سارعاسقاەۆ ادەبيەتتە

بالالارعا ارناعان ويلارىن كىل.

كاسىبي بوكستاعى مازىمباەۆ،

جەڭگەن سايىن جەلبىرەدى بايراعىم ءبىر.

كەنەننىڭ ءىزىن باسقان سايات مەدەۋ،

ءان سالسا دەپ تۇراسىڭ سايرا بۇلبۇل.

ماقسات بازارباەۆتىڭ قوڭىر داۋسىن،

ەستىگەندە كوڭىل ءبىر جايلانىپ ءجۇر.

كەنەكەڭەن باتا العان اقىن اعام،

قازاق دەپ ۇيقى بەرىپ، قايعى الىپ ءجۇر.

سپورت جۋرناليستيكاسىن ورگە سۇيرەپ،

سول جولدا الداسپانداي قايرالىپ ءجۇر.

سىرلى دا قۇندى جازعان ءار كىتابى،

مولدىرەپ اعىپ جاتقان قاينارىڭ بۇل.

قوردايدىڭ دالاسىنان شىققان ۇلدار،

الاشتىڭ دۇبىرىنەن بايگە الىپ ءجۇر.

اسۋدىڭ تابانىندا تۋعان ۇلدار،

عاسىردىڭ ادامىنا اينالىپ ءجۇر!

 

ايتىسكەر اقىن اسحات قىلىشبەك