جاماعات جارىسىنىڭ جالاۋى جەلبىرەدى

الماتى قالاسى مەشىتتەرىنىڭ جاماعاتى اراسىنداعى سپارتاكيادانىڭ جىل وتكەن سايىن اۋقىمى كەڭەيىپ كەلەدى.

 نۇر-مۇباراك ەگيپەت يسلام مادەنيەتى ۋنيۆەرسيتەتىنىӊ الاӊىندا وتكەن بۇل شاراعا 2000-عا جۋىق مەشىت جاماعاتى جينالدى. جارىسقا قاتىسۋشىلار ارقان تارتۋ، ارمرەستلينگ، كىر تاسىن كوتەرۋ،  قوشقار كوتەرۋ، اسىق اتۋ، پەتانك، دوپتى قاقپاعا تەبۋ سەكىلدى سپورت تۇرلەرىنەن باق سىنادى.

جينالعان جاماعاتتىڭ نازارىن وزىنە اۋدارعان – «قوشقار كوتەرۋ» سايىسى بولدى. شىن مىقتىلار باسەكەسىندە قوشقاردى يىققا سالىپ 101 رەت كوتەرگەن باۋىرجان ابدىقايىم جەڭىمپاز اتانسا، ەۆگەني كيم 2-ورىندى يەلەندى. 3-ورىنعا نۇربالات ەرتاس كوتەرىلدى. كىر تاسىن كوتەرگەن بىلەكتى جىگىتتەر دە كوپشىلىكتى تامساندىردى. تاستى 81 رەت اۋەلەتكەن ەركىن ەرىمبەتوۆ باس جۇلدەلى بولسا، 80 رەت كوتەرگەن اقجول جولداسباەۆ ەكىنشى، 60 رەت سەرپە كوتەرگەن ۋرماتبەك يبراگيموۆ ءۇشىنشى ورىن الدى.

ارقان تارتقاندا ۇيىمشىلدىق تانىتقان تولە بي مەشىتىنىڭ جاماعاتى توپ جاردى. فينالدا ەسە جىبەرىپ العان اباي مەشىتىنىڭ كومانداسى 2-ورىن، ءال-مۇحامەد مەشىتىنىڭ جاماعاتى 3-ورىنعا تۇراقتادى. دوپتى قاقپاعا تەبۋدە جاندوس تۇرىسبەك مەرگەندىك تانىتسا، قۇرامىندا ازامات دۇيسەنباي، بەكزات ريجانوۆ جانە سايات مۇحامەتكارىم ونەر كورسەتكەن «نۇر-مۇباراك» كومانداسى پەتانك ويىنىندا جەڭىسكە جەتتى.  ۇلتتىق ويىن – اسىق اتۋدا رايس جەڭىس ۇلى جەڭىمپاز بولدى. ال بىلەكتى جىگىتتەردىڭ باسەكەسى – ارمرەستلينگتە تولە بي مەشىتىنىڭ نامىسىن قورعاعان ابزال تىلەۋباەۆ مىقتى ەكەنىن دالەلدەدى.

جەڭىمپازدار مەن جۇلدەگەرلەر جارىس سوڭىندا باعالى سىيلىقتارمەن ماراپاتتالدى.

«جاماعات اراسىنداعى جارىستارعا دەگەن كوپشىلىكتىڭ ىقىلاسى جىل ساناپ ارتىپ كەلەدى. بيىل فۋتبول، ۆولەيبول جانە مەرەكە كۇندەرىنە ورايلاستىرىلعان ءتۇرلى سپارتاكيادالار ءوتتى. باستىسى وسىنداي يگى شارالار ارقىلى ەلدىڭ رۋحانياتى كوتەرىلىپ، مەشىت جاماعاتىنىڭ بىرلىگى نىعايا تۇسسە دەگەن تىلەك بار»، – دەدى جارىستى ۇيىمداستىرۋشى ءاليا شايحان.

شارانىڭ نەگىزگى ماقساتى دا مەشىت جاماعاتى اراسىندا دەنە شىنىقتىرۋ مەن سپورتتى، سالاماتتى ءومىر سالتىن ناسيحاتتاۋ. سونىمەن قاتار يسلامنىڭ ءداستۇرلى ەمەس اعىمىنىڭ جەتەگىندە جۇرگەن جاندارعا اسىل ءدىننىڭ وڭ جولىن كورسەتۋ.

جاماعات اراسىنداعى بيىلعى جارىستاردى ۇستەل تەننيسىنىڭ شەبەرلەرى تۇيىندەيدى. الدىمەن اۋدانارالىق باسەكەدەن ىرىكتەلگەندەر 21 قاراشادا وتەتىن فينالدا باق سىنايدى.

 

اقىن ورداباي ۇلى،

فوتو: ولگا اپەلگانەتس

الماتى