ۇلاعاتتى ۇستازدىڭ ەسىمى ۇلىقتالدى

وتكەن سەنبى جانە جەكسەنبى كۇندەرى الماتى وبلىسى ىلە اۋدانى وتەگەن كەنتىندەگى بالالار مەن جاسوسپىرىمدەر سپورت مەكتەبىندە 2009 – 2010 جىلدارى تۋعان ۇلدار مەن قىزدار اراسىندا پرەزيدەنتتىڭ قۇرمەت گراموتاسى جانە ءبىلىم جانە عىلىم مينيسترلىگىنىڭ «ى.التىنسارين» بەلگىسىنىڭ يەگەرى، ۇلاعاتتى ۇستاز، ارداقتى انا عاليا نادىربەكقىزى نادىربەكوۆانى ەسكە الۋعا ارنالعان دزيۋدودان جارىس ءوتتى.

وعان ىلە اۋدانىنىڭ بارلىق اۋىل-ايماقتارىنان 200-گە جۋىق بوتا بالۋان قاتىسىپ، قىزدار 6 سالماقتا، ۇلدار 9 سالماق دارەجەسىندە كۇش سىناستى.

تۋرنيردە قىزدار اراسىندا 52 جانە 42 كگ ساماقتاردا ونەر كورسەتىپ، جانكۇيەرلەردىڭ ىستىق ىقىلاسىنا بولەنگەن ايشا تۇردىباەۆا مەن ديدار زاكەن ءتۋرنيردىڭ ەڭ ۇزدىك بالۋاندارى اتاندى. ءبىر قىزىعى، بۇل ەكى بالۋان م.ماقاتاەۆ اتىنداعى مەكتەپتىڭ وقۋشىلارى.

نەگىزى، «شاكىرتسىز ۇستاز — تۇل»، دەمەكشى، عاليا نادىربەكقىزى نادىربەكوۆا م.ماقاتاەۆ اتىنداعى №13 ورتا مەكتەپتە ديرەكتور بولىپ قىزمەت ىستەگەن جىلدارى ونىڭ ءبىلىمپاز، ونەرپاز جانە سپورتقا جانى جاقى كوپتەگەن شاكىرتتەرى رەسپۋبليكالىق بايراقتى جارىستارعا قاتىسىپ، ولجا سالعان ەكەن. م.ماقاتاەۆ اتىنداعى مەكتەپتىڭ اۋدان، وبلىس كولەمىندە ۇزدىك مەكتەپتەردىڭ قاتارىنان كورىنۋىنە عاليا نادىربەكقىزىنىڭ ەڭبەگى زور بولىپتى. ۇلاعاتتى ۇستاز، بىلىكتى باسشى عاليا نادىربەكقىزىنىڭ باقيلىق دۇنيەگە ساپار شەككەنىنە ءبىراز جىلدىڭ ءجۇزى بولسا دا ارتىنان جاقسى ءىز قالدىرا بىلگەن انانى جۇرتشىلىق جىلى سوزبەن ساعىنا ەسكە الاتىنىنا كوز جەتكىزدىك. «ءولى رازى بولماي ءتىرى بايمايدى»، دەگەندەي، ارداقتى اپايلارىنا ءبىر ۇلكەن شارا ۇيىمداستىرۋدى بالالار سپورت مەكتەبىنىڭ ۇجىمى كوپتەن بەرى ويلاپ جۇرسە كەرەك. مىنە، ەندى رەسپۋبليكا كۇنىنە وراي كەلىپ، تاماشا ءبىر تارتىستى جارىستىڭ تۇساۋى كەسىلدى.

جارىستا تۋرنير يەسى عاليا نادىربەكقىزىنىڭ ۇلى مەن قىزى دينارا مەن قاسىم ءجاسوسپىرىم بالۋاندارعا تەگىن اس-تاماق تاراتىپ، كوپشىلىكتىڭ راحمەتىنە بولەندى. بۇل جارىس الداعى جىلى وبلىس دەڭگەيىنە كوتەرىلىپ، ءداستۇرلى  تۇردە جالعاسىن تاپپاق.

اقىن ورداباي ۇلى،

الماتى وبلىسى، ىلە اۋدانى