Ulaǵatty ustazdyń esimi ulyqtaldy

О́tken senbi jáne jeksenbi kúnderi Almaty oblysy Ile aýdany О́tegen kentindegi Balalar men jasóspirimder sport mektebinde 2009 – 2010 jyldary týǵan uldar men qyzdar arasynda Prezıdenttiń Qurmet gramotasy jáne Bilim jáne ǵylym mınıstrliginiń «Y.Altynsarın» belgisiniń ıegeri, ulaǵatty ustaz, ardaqty ana Ǵalııa Nádirbekqyzy Nádirbekovany eske alýǵa arnalǵan dzıýdodan jarys ótti.

Oǵan Ile aýdanynyń barlyq aýyl-aımaqtarynan 200-ge jýyq bota balýan qatysyp, qyzdar 6 salmaqta, uldar 9 salmaq dárejesinde kúsh synasty.

Týrnırde qyzdar arasynda 52 jáne 42 kg samaqtarda óner kórsetip, jankúıerlerdiń ystyq yqylasyna bólengen Aısha Turdybaeva men Dıdar Záken týrnırdiń eń úzdik balýandary atandy. Bir qyzyǵy, bul eki balýan M.Maqataev atyndaǵy mekteptiń oqýshylary.

Negizi, «Shákirtsiz ustaz — tul», demekshi, Ǵalııa Nádirbekqyzy Nádirbekova M.Maqataev atyndaǵy №13 orta mektepte dırektor bolyp qyzmet istegen jyldary onyń bilimpaz, ónerpaz jáne sportqa jany jaqy kóptegen shákirtteri respýblıkalyq baıraqty jarystarǵa qatysyp, olja salǵan eken. M.Maqataev atyndaǵy mekteptiń aýdan, oblys kóleminde úzdik mektepterdiń qatarynan kórinýine Ǵalııa Nádirbekqyzynyń eńbegi zor bolypty. Ulaǵatty ustaz, bilikti basshy Ǵalııa Nádirbekqyzynyń baqılyq dúnıege sapar shekkenine biraz jyldyń júzi bolsa da artynan jaqsy iz qaldyra bilgen anany jurtshylyq jyly sózben saǵyna eske alatynyna kóz jetkizdik. «О́li razy bolmaı tiri baımaıdy», degendeı, ardaqty apaılaryna bir úlken shara uıymdastyrýdy Balalar sport mektebiniń ujymy kópten beri oılap júrse kerek. Mine, endi Respýblıka kúnine oraı kelip, tamasha bir tartysty jarystyń tusaýy kesildi.

Jarysta týrnır ıesi Ǵalııa Nádirbekqyzynyń uly men qyzy Dınara men Qasym jasóspirim balýandarǵa tegin as-tamaq taratyp, kópshiliktiń rahmetine bólendi. Bul jarys aldaǵy jyly oblys deńgeıine kóterilip, dástúrli  túrde jalǵasyn tappaq.

Aqyn ORDABAIULY,

Almaty oblysy, Ile aýdany