«ۇلكەن دۋلىعا» ءتۋرنيرى: قازاقستان دزيۋدوشىلارى توبە كورسەتتى

ازەربايجاننىڭ باكۋ قالاسىندا دزيۋدودان ءوتىپ جاتقان «ۇلكەن دۋلىعا» حالىقارالىق تۋنيرىندە قازاقستاننىڭ ەرلەر جانە ايەلدەر قۇراماسى جارىستى باستاپ كەتتى.

اۋەلى 66 كەلىگە دەيىنگى سالماق دارەجەسىندە عۇسمان قىرعىزباەۆ تاتاميگە شىعىپ، موڭعوليا سپورتشىسى بايانمۋنح نارمانداحتتان باسىم ءتۇستى. ودان كەيىن گرۋزيالىق دزيۋدوشى گەورگي تۋتاشۆيليمەن كەزدەسىپ، ونى دا ۇتتى. ال ءۇشىنشى بەلدەسۋدە عۇسماننىڭ جولى بولمادى. ول مولدوۆالىق دەنيس ۆيەرۋمەن كۇش سىناسىپ، ۇتىلىپ قالدى. ەندى  شيرەك فينالدا جەڭىلگەن سپورتشىمىز جۇبانىش بەلدەسۋىندە يسپانيالىق گارسيا تورنە داۆيدپەن بەلدەسەدى.

ودان باسقا باۋىرجان نارباەۆ (60 كگ) پەن شەحزود داۆلاتوۆ (60 كگ) قارسىلاستارىنان ۇتىلدى.

تاعى ءبىر سپورتشىمىز الماس عالىموۆ كوستا-ريكالىق دزيۋدوشى يان سانچو چينچيلا مەن سەربيالىق ستراحينيا بۋنچيچپەن كۇش سىناسىپ، ۇتتى. ول سەرب بالۋانىن 14 سەكۋندتا «يپپون» ادىسىمەن جەڭدى.

ايەلدەر كۇرەسىندە دانا ءابدىروۆا مەن عاليا تىنباەۆا قارسىلاستارىنا ەسە جىبەردى.

«ۇلكەن دۋلىعا» كەزەڭىنىڭ ءبىرىنشى كۇنىندە 57 كەلى سالماق دارەجەسىندە كۇرەسكەن ءابدىروۆا يتاليان تونيولو ۆەرونيكادان جەڭىلسە، 48 كەلى سالماق دارەجەسىندە ونەر كورسەتكەن تىنباەۆا فرانتسيالىق بوۋكلي شيرينەدەن ۇتىلدى.

حالىقارالىق دودادا 63 ەلدىڭ 400-گە جۋىق سپورتشىسى كۇش سىناسىپ جاتىر.

داستان كەنجالين،

استانا