جۇگىرۋدى ءومىرىنىڭ سەرىگى ەتكەن سپورت شەبەرى

ءبىزدىڭ ەلدەگى سپورت تاريحىنىڭ بەتتەرىن پاراقتاي وتىرىپ، كوپتەگەن ۇمىتىلىپ بارا جاتقان ەسىمدەردى كەزدەستىرىپ جاتامىز. كەڭەس وداعى كەزىندە قازاقستان سپورتىن الەمگە تانىتقان جارىق جۇلدىزداردىڭ كەيبىرى ماڭگىلىك مەكەنگە ساپار شەكسە، كەيبىرى جاستارعا باتاسىن بەرىپ ورتامىزدا ءجۇر.

ءيا، ول ءومىردىڭ ءبىر زاڭدىلىعى دا بولار. مۇمكىن، وتكەن ۋاقىت ءوز تاريحىن قويىنىنا باسىپ الا كەتە مە كىم ءبىلسىن، دەگەنمەن دە ەل سپورتىنا ءىزىن قالدىرعان جاندارمەن كەزدەيسوق كەزدەسىپ قالعاندا قولعا قالام الىپ، ءومىر جولىنان سىر شەرتىپ، حالىققا قايتا قاۋىشتىرعىم كەلىپ تۇرادى. ويتكەنى، جاستارعا سول تۇلعالار ارقىلى تاربيە بەرۋدىڭ ماڭىزى زور دەپ بىلەمىن. ايتالىق، اتى ايگىلى مارافونشى، الەم مارافونىنىڭ چەمپيونى، قازاقستان رەسپۋبليكاسىنىڭ قۇرمەتتى سپورت قايراتكەرى، كسرو سپورت شەبەرى الپىس ارىقباي ۇلى ەرماعانبەتوۆ اعامىزدىڭ سپورتتاعى جارقىن جولى ەستەرىڭىزدە بولار. ال، سول اتى ايگىلى جەلاياق مارافونشى تۋرالى بىلمەگەن جان بولسا، قايتا تانىستىرىپ وتسە ارتىق بولماس. ويتكەنى، تۋمىسىنان وزگەگە ۇقسامايتىن ەرەكشە جاننىڭ سپورتتاعى جەتكەن جەتىستىگى ايتارلىقتاي.

جۋىردا ەسىك قالاسىندا ورنالاسقان بالالار مەن جاسوسپىرىمدەر سپورت مەكتەبىنىڭ ستاديونىندا اتى تانىمال اعامىز الپىس ەرماعانبەتوۆتىڭ جۇلدەسىنە ارنالىپ جەڭىل اتلەتيكادان 1946 مەتر قاشىقتىققا «دەنساۋلىق شاقىرىمى» اتتى ۇلكەن جارىس  وتتى.

جارىستى ەسىك قالاسىنىڭ اكىمدىگى مەن بالالار مەن جاسوسپىرىمدەر سپورت مەكتەبى ۇندەسىپ وتكىزىپ، سپورت قۇمار حالىققا ءبىر تاماشا كوڭىل-كۇي سىيلادى. جارىس جولىنا شىققان ءجاسوسپىرىم جەلاياقتارعا الپىس ارىقباي ۇلى اقساقالدىڭ ءوزى الدارىنا تۇرىپ قولىن جايىپ، اق باتاسىن بەردى. وسىنداي جارىستى ۇيىمداستىرۋداعى نەگىزگى ماقسات — مارافون جارىستارىنا جاستاردى قىزىقتىرىپ، تارتۋ ءارى دەنساۋلىقتى جاقسارتۋ.

نەگىزى، الپىس اتامىز 70 اسقان جاسىندا ءالى دە تىڭ، سەرگەك. اياق-قولعا تۇرماي ارى-بەرى جۇگىرە جورتىپ جۇرگەنىن كورىپ ريزا بولدىق. ارداگەر سپورتشى 1984 جىلى قاراعاندى مەن الماتى اراسىندا وتكەن 42 كم، 195م مارافوندا توپ جارىپ، مارەگە ءبىرىنشى بولىپ كەلسە، 1997 جىلى تۇركيانىڭ ستامبۋل قالاسىندا حالىقارالىق ەۆرازيا مارافونىندا چەمپيون اتانادى. 2007 ج ىلى ماسكەۋدىڭ 860 جىلدىعىنا وراي ۇيىمداستىرىلعان بۇكىل دۇنيەجۇزىلىك مارافون جارىسىندا الدىنا جان سالماي جەكە دارا كەلەدى. الپىس اعانىڭ العان جۇلدەلەرىن ساراپتاپ ايتۋدىڭ ءوزى ءبىراز ۋاقىتتى الارىندا ءسوز جوق.

جەڭىس مەدالدارى ءبىر تۇيەگە جۇك ارتقانداي شىعار ءسىرا. بۇل كىسى ءالى كۇنگە دەيىن تاڭمەن تالاسىپ تۇرا سالىپ، جۇگىرىپ كەتەدى ەكەن. جالقاۋلىق، ەرىنشەكتىك الپىس اعامىز ءۇشىن جات قىلىق. سوندىقتان بولار ۇتپاعان جارىسى، الماعان مەدالى قالماعان. سول ماراپات، ابىروي، قۇرمەتتىڭ ءبارى دەرلىك ەرىنبەي ەتكەن ەڭبەكتىڭ ارقاسىندا كەلگەنىن كورەمىز.

بۇگىندە جاسى 70 اسىپ كەتكەن الپىس اعامىز بالالار مەن جاسوپىرىمدەر سپورت مەكتەبىندە جاس شاكىرتتەرگە ۇزاق جىلدار بويى جيناعان تارجىربيەسىمەن ءبولىسىپ، بىلگەنىن ۇيرەتىپ ءجۇر ەكەن. اعامىز بار عۇمىرىن سپورتقا سونىڭ ىشىندە جۇگىرۋگە ارناعان ادام. «جۇگىرۋ — ءومىرىمىڭ نەگىزگى تىرەگى»، -دەپ العان ارداگەر مارافونشىنى قازىر جارىس جولىنا شىعارساڭىز جەر تارپىپ توپتان قارا ءۇزىپ جۇلدە الۋعا دايىن تۇرعان تۇلپارداي شيراق، قيمىلى شاپشاڭ. ومىرگە قۇلشىنىسى جوعارى، اينالاسىنا ۇلكەن ۇلگى وسىنداي اعا بۋىن ارداقتى جاندار جانىمىزدى جۇرگەندە ءبىز ءوزىمىزدى باقىتتى سانايمىز. ويتكەنى، بۇل كىسىلەر شەبەرلىك مەكتەبىنىڭ شىڭىنا شىققان الىپ جاندار. سوندىقتان جاس مارافونشىلارعا قازىنالى اتالارىنان ۇيرەنىپ الىپ قالار دۇنيە جەتەرلىك دەپ بىلەمىن.

اقىن ورداباي ۇلى،

الماتى