Azııa chempıonaty: Qazaqstan quramasynda 21 medal bar

Bokstan Qazaqstan ulttyq qurama komandasy Iordanııanyń astanasy Amman qalasynda ótip jatqan XXXII Azııa chempıonatynan kem degende 21 júldemen oralady.

Keshe, Azııa chempıonatynyń segizinshi kúni rıngke shyqqan barlyq boksshymyz jartylaı fınalǵa joldama aldy.

Áýeli ulttyq quramanyń kapıtany Aslanbek Shymbergenov úndistandyq Sachındi esh qıyndyqsyz tize búktirdi. Onyń izin ala Nurqanat Raıys qyrǵyzstandyq Sagyn Satybaldyýlýmen kezdesip, ekinshi raýndta jeńiske jetti. Aǵaıyndy Aıbek pen Nurbek Oralbaılar da jeńisti serııany sátti jalǵastyrdy. Nurbek taılandtyq Djondjoho Vırapýndy 3:1 esebimen utsa, Aıbek úndistandyq Navın Kýmardy eki ret nokdaýnǵa túsirip, tehnıkalyq nokaýtpen kelesi aınalymǵa shyqty.

Amman qalasynda alǵash ret óner kórsetken Saǵyndyq Toǵambaı (86 kg) da tájikstandyq Navrýz Djafoevty oısyrata utyp, kemi qolaǵa qola júldeni alatyn bolady. Áýesqoı boksqa qaıta oralǵan asa aýyr salmaqtaǵy Qamshybek Qońqabaev ońtústik koreıalyq Do Hıon Kımdy utty. Qamshybek osy jeńisin anasynyń týǵan kúnine arnady.

Keshki sessııada ulttyq qurama sapynan synǵa túsken  eki dúrkin álem chempıony Nazym Qyzaıbaı tóreshiler sheshimimen mońǵolııalyq Balsangıın Mengensarannan basym tústi. Esep – 3:2.

Qaırat Satjanov jattyqtyratyn erler quramasyndaǵy 13 boksshynyń 12-si jartylaı fınaǵa joldama alsa, О́zbekstannyń 10 boksshysy ½ fınalǵa shyqty.

Al áıelder básekesinde de Qazaqstan jeke dara kósh bastap kele jatyr. Osy joly 9 boksshymyz jartylaı fınalda óner kórsetedi.

Azııa chempıonatynyń jartylaı fınaly 9-10 qarashada ótedi. Fınal 11-12 qarashada bolady.

Dastan KENJALIN,

ASTANA

Foto: Aıan TО́LEGEN